Da co'uaataxanaxaic lauegaxanaxac yi Jerusalén
1Mashic naata ca na'xa'a ñi qara'gaxala', ma' ỹovita quiyim na rouenaxahipi qaneuagaxachigui quena Jerusalén. 2Ca ma' ỹovire'oga cajo na'xa'a, ca' ñi qara'gaxala' lapoonta' ma'le ná'ogue na ỹoreta'oguit qomyipi, quiyim nco'ỹa'e' na Jerusalén. Chaqai noxonec ma'le na na'a' lodegaxat, qai'xat na hueetauguilo naua 'imqa, qaỹocat na 'aallipi. Ime, ca' qai'xat quiyim na'ac na lavinñi na qomyipi, ca ná'maq liỹaripi, ca' qano'ueenaqtañi quena'maxare. 3Qam ma' ime, ca' ñi qara'gaxala' eec nalauate'e' sá'ogue so qomyipi, 'ec dá'maq quena' ỹovire'oga ca na'xa'a nalauataxaqui. 4Ca' cajo na'xa'a, ca ñi qara'gaxala' ca' co'uejlec ma'le ada qa' ladocai qaỹamata'gue huaalec ana olivo lashi, adá'maq reloqota'oga yi Jerusalén queda lqodoigue. Queso ca'megue lodegaxat taỹa'gue da lqodoigue chaqai da lauashiguim, ca' shicchigui ma'le na lavinñi ada qa' ladocai huaalec ana olivo lashi. Ca' na lavinñi ada qa' ladocai taigue da rapiguim ma' redaa, chaqai da liỹa lahi, ca' taigue da 'guiñi ma'le. 5Ca' qamiri 'iichii ma'le 'guiñihe'oga ma'le so ca'megue quiichicñigui na lavinñi ada qa' ladocai, ca' viitañigui na lavinñi ma'le daua qari ladocahi, ca so'maxare ỹovira'a ma'le yi Azal, ca' queda lahi quii'tegue. Ma' 'iichii qamiri 'nejem quesom na' 'eete' saua 'auaxaqa qata'allii na' i'loxol na 'laua só'maq viichigui na' neetaho quiyim nashi so Uzías ỹoiquentac yi Judá. Ca nanac ma'le ñi na'gaxala' ñí'maq qota'olec caỹim, nauequeta'pegue' ná'ogue ná'maq na'xaỹaxanta.
6Ca' quecajo na'xa'a qaica ca no'oomaxa ma'le, vire'ta aca loñi sqaca ma'le. 7Qaicaata cajo na'xa'a qaỹa'deenta ma'le quiñi qota'olec. Ca queca'maxare ma'le, ca sqa ỹaataq ma'le ca na'xa'a chaqai ca pe, ma' cá'ogue ca pe ma'le richiichiguiñi. 8Ca' ma'le, ca' nac ca huaxaỹaq 'oom chicqota'a yi Jerusalén, ca ná'maq huaxaỹaq naquetac quiyi no'oomaxa chaqai yi nosaxa. So lavinñi taatapegaqso'ma aso huaaxai qaỹamata'gue leuaxai, chaqai so liỹa lavinñi taatapegaqso'ma aso huaaxai hueetegueñigui ana delec. 9Ca' quecajo na'xa'a, ca' ñi qara'gaxala' ỹoiquentac ma'le ná'ogue na 'laua. Ca ma'le, ca' qaiñiita ñi qara'gaxala', chaqai qai'neeta qanodaqajantec da leenaxat. 10Ná'ogue na 'laua ma'le ñigui ca quemarelec, chicqochi'ñi yi Geba queda rapiguim, ca ỹovira'a yi Rimón pa'a'gue da 'guiñi quiyi Jerusalén. Ca' yi Jerusalén qoỹoqoshi'ma ma'le. Ca ma'le, ca' qoyintalec ma'le yi'maxare, chicqochi'ñi ñi lasom nasom so Benjamín, ca' ỹovirau'a añi lasogue ñi lasom yí'maq na'ñi na'le ca ñaauapec lasom, chaqai cada ladocai na'ajnaxanaxalate quiyi Hananeel, ca' ỹovirau'a yi novigoxosoqo' ana nanecsec ala quena' qanaqat na ne'aceite, ñí'maq lalamaxarete looỹac ñi nashi. 11Ajá'a, quena Jerusalén liỹa 'xoic na qom neetaugui ma'le, ca' tot liỹa qanopoxoỹaxajñi. Ca' na qomyipi neetaugui na'maxare i'maqajlem, qaica ca no'chiitaque.
12Qam quená'maq ỹoreta'oguit qomyipi ná'maq nco'uaata'pegue' na Jerusalén, ñi qara'gaxala' ỹa'ue ma'le ca nouaxanaxaset. Ca' na qomyipi ma'le ñaq nca'leetauec, qam nichiga'. Ca nichiguete' ma'le naua nqote' quenaua lomaate' chaqai ñi lo'legaxanaxat quena lap. 13Quecajo na'xa'a, ca ñi qara'gaxala' 'xoic nqai'en ca lqolonaxa. Ca' chaqai taỹata' nco'ỹata' ma'le. 14Ca ma'le, ca' nco'ua qai'neeta yi qomyipi neetalec yi Judá quiyi Jerusalén, ca' nouo' ma'le na na'aateripi sqoỹoqaque quena lesallaxa, cana lam plata chaqai na 'oro chaqai na nooỹac. 15Ca' dajo nouaxanaxaset taalec yi qomyipi npa'guenaxauaripi, taalec qai'neeta na shipiguiripi, na que'laipi, ana nauaanaxanaxa late'ellipi, na 'ashinyipi chaqai ná'ogue na liỹa laloipi neeta'ñi yi nco'matqa'.
16Ca ma' ime dajo, ca só'maq ca'laaxaiquipi quesó'maq nco'uaata'pegue' yi Jerusalén, ca naua'que naua ñaxari taatapegueu'a ñi nashi quiyim nqouagaxainot, ñí'maq na'gaxala' sqaica lqalanec, chaqai ỹo'uet so lemaqachic quena' imaqachine' saua na'xata' quena' qoyintauguilo naua 'imqolqai' na'derañi. 17Chaqai no'm 'ue ca qomyipi quena 'laua mesqai quepegue' yi Jerusalén quiyim nqouagaxainot ñi nashi, ñí'maq qara'gaxala' sqaica lqalanec, ca' sqaica ma'le ca ỹaxat quiyi na'laua. 18Chaqai no'm sqai eec na Egipto laseripi, ca' ñi qara'gaxala' ỹa'ue ca nouaxanaxaset, 'nejem nqai'en ca nouaxanaxaset canchaqaica liỹa quena qomyipi quena 'laua ná'maq se imaqachine' saua na'xata' quena' qoyinaugui na 'imcoqui' na'daañi. 19Ca' chaqaida dá'maq 'neeta ma'le ca nouaxanaxaset yi Egipto chaqai quená'ogue na liỹa qomyipi quená'maq se imaqachine' saua na'xata' quena' qoyinauguilo naua 'imqolqai' na'derañi.
20Quecajo na'xa'a, ca' ỹovire'talo naua lasaquinata na shipgaq 'ue na lerqaipi quiyim lalamaxaret ñi qara'gaxala'. Ca' na 'ueenallipi chaqai na 'taxaquiripi ỹaatqajam qaỹa'maxate'teguelo ma' lalamaxarete ñi qota'olec hueesa'ñi ada ncopatoxonaxalate. 21Ná'ogue na 'ueenallipi chaqai na 'taxaquiripi quiyi Jerusalén chaqai quiyi Judá qoỹaanot ñi qara'gaxala' sqaica lqalanec. Ca' cá'maq ỹoviro ỹodouo ca lachitaxanataxanaxat, ca' ỹouene'. Ca' reuoshiguilo quena la'at ná'maq iseripi nachitaxanataxanaxat. Ca' quecajo na'xa'a, ca' tot qaica ca nemeentac ma'le quiñi lo'ueenaxanaxaqui ñi qara'gaxala' sqaica lqalanec.
