1Ca na' pi'chigui aso lpe'te so liỹa nelaatec piguim le'ec, ca seuane'ta aso huaqajñi shi'co' najñi, chicqo'ot na piguim, hueetalec na 'laua. Ca' asojo huaqajñi qoỹaanem aso lauaatqate aca tema lapooqo' na lqui'i na leuaxaiquipi. 2Ca na' ime, ca ỹauachi'ña caso tema. Ca' quiyi, ca taashiguim na lesalaxaripi 'ec chicqaugui ca chalego lecaic nqatelaxanaxaqui. Ca' so lesalaxaripi aso tema, ca chicqochigui 'ue so napalaxa, ma' ỹapolec añi ra'aasa chaqai ná'ogue. 3Ca' quesojo nesalaxaripi chicqotougui aso 'xoic piñai, ỹouec, quelec na 'laua. Ca' aso piñai qoỹaanem quiyim 'ue na ledoonaxa 'nejem na pa'lotoxoic late'e hueetalec ana 'laua. 4Qaila', qam quiyim se na'axat na 'uaqapi, chaqai ana qo'paq, chaqai ná'ogue ana peue ladala hueetalec na 'laua. Ta'ta'a quiyim nodaqajantec ná'maq qom quená'maq sqaca aca letanaxanqate ñi qota'a quena latap. 5Qam se qaỹa'maxaren quiyim ỹalauat na qom. Ta'ta'a quiyim chi ỹo'uet da nqui'ic quecaua cinco shiriguiri. Ca dá'maq nqui'ic nqai'en queca qom 'ec dá'maq quena' qaỹa'caañi caca pa'lotoxoic late'e. 6Ca' quecauajo na'xata' na qom idaantaque ma'le ca lelauaxa, qam se ỹanata. Chaqai 'eno'm ỹahotaque ileu, qam da nelauaxa 'eetapeguem ma'le na qomyipi.
7Ca' aso piñai da no'ueenataxac 'nejem na shipgaq lauataq lo'o. Na lqahic neetagui aso 'ec nashi nado'o 'oro, chaqai na lashic 'nejem na qom lashic. 8Chaqai 'ue na laue 'nejem na 'aalo lqahic laue, chaqai naua loue 'ec na sauaxaic leta'a loue. 9Chaqai na loshicmaxa pootalec caso lauataxaqui 'ec fierro, chaqai naua lelamqa' naua laua' 'ec na lelamaxa na 'xoic nahoglena shipgaq na lo'o quena' i'guentaho queca lauataq. 10Ca na lqai'it ana'maxare 'nejem lqai'it ana pa'lotoxoic late'e, 'ue añi la'na, 'ue da ledoonaxa, qaiyi ishit na'axat na qom quecaua cinco shiriguiri. 11Ca' aso piñaipi 'ue so lashi só'maq neloxoỹaq queca lapooqo' na lqui'i na leuaxaiquipi. Sojo nashi leenaxat quenaua hebreo la'qaatqa Abadón. Chaqai quena griego la'qaatqa Apolión, loqo'm lauataxanaxai.
12Ca ỹoxogue só'maq 'auaxaic ne'xoric lodegaxat, qam ñaqa 'vii caua liỹa' naate' dos.
13Ca' so liỹa nelaatec piguim le'ec pi'chigui aso lpe'te, ca' 'ue so sa'xaỹaque na'qaatec 'maxañiguilo saua cuatro lasote aso ncopatoxonaxalate 'oro neeta'ñi da reloqota'gue ñi qota'a. 14Ca' so na'qaatec 'naac quesó'maq nelaatec piguim le'ec só'maq pe'teetapigui aso lpe'te, 'naacsa':
—So'irec ñaua cuatro nelaatqa piguim lase' qaicoñiretasa'lo neeso'ot na lahi aso lachiugue late'ogue' Eufrates.
15Ca na'le, ca' qaỹosoorec saua cuatro nelaatqa, qaiyi ỹalauate' ñi 'óna quecaua tres qomi' quená'ogue na qomyipi. Ma' chaqaido' dá'maq 'em qaỹa'maxatesañi quiyim ỹovita ca na'xa'a naloqojnec hueetougui ca shiraigo chaqai ca ñaaxa, ca qaleuote'talo. 16Ca' sa'xaỹaque só'maq ỹorete' só'maq nalauataxaiquipi neetashiguim quena shipgaq. So'maxare ỹovi' doscientos millones.
17Ca' chaqaida dá'maq 'neeta na'le queso iuanaxanaxac na' seuana so shipiguiripi chaqai só'maq neetalec. So'maxare hueetalec ana lotogue na lquepaqataxanaxat quena no'goxonaxat, 'ue na toc, icolaq, chaqai na qoñi na lashic. Chaqai na shipiguiripi na lqahic 'nejem na sauaxaic leta'a lqahic. Chaqai naua laapi' naquetapougui na norec, nesalaxaripi, chaqai na 'ec quiquiaxaic. 18Ca' quecaua tres, 'óna ca qaỹalauat quená'ogue na qomyipi, sauaxat saua tres se no'viiñi naquetapougui na lap na shipiguiripi: so norec, nesalaxaripi, chaqai so 'ec quiquiaxaic. 19Ma' da lquesaxanaxa sojo shipiguiripi hueetaugui na lap chaqai na lqai'it. Ma' na lqai'iteripi 'ec na nanaic 'ue na lqahic, ca' ishit quiyim ra'gaxana na lqai'it.
20Qam quená'maq no'ueenañi qomyipi se ileuapeguema saua nqa'viico, ñaqaina queetalec quiyim ỹo'ueetetac na se no'uen, chaqai sqai ỹaxanñi quiyim pe'eetapega na lelaatqaipi se re'xogui so na'ỹaapec, chaqai na nashiilec nqolac 'oro, plata, bronce, qa', chaqai na qo'paq, ná'maq se ishit reuanaxan, sqa 'qaa, chaqai se qaua. 21Chaqai qai'neeta sqai ỹaxanñi da lalauataxanaxac, da le'naxanaxac, chaqai da nedequenaxac, chaqai da locataxac.
