Aso pa'aatec netanaxanqate chaqai aso nichiinaxanaxat lahi' 'oro
1Ca na' so qagreta llaalec naqat aso pa'aatec netanaxanqate caso lere, ca 'uo' ca media hora nachicochiguiñi queda piguim. 2Ca na' ime, ca seuane'talo saua siete nelaatqa piguim lase', nachaatesañi, reloqoso'ot ñi qota'a. Ca saua'maxare qoỹaanema saua siete npe'tel. 3Ca na' ime, ca lotqai novi' so liỹa nelaatec piguim le'ec no'qoota'a so nichiinaxanaxat lahi' 'oro. Ca' nachaato caso ncopatoxonaxalate. Ca 'xoic so qoỹaanem nichiinaxanaxat, ma' qaỹahotaque ỹaano liỹaataho nqai'en na nqouagaxainaxaquipi ná'maq lalamaxareteripi ñi qota'a, qaillaalec aso ncopatoxonaxalate 'oro queda reloqota'gue so nashi nqa'xanqa'. 4Ca' queda lqai'laxat so nelaatec piguim le'ec chicqochigui so nesalaxaripi, taashi'ma ñi qota'a, liỹaatashiguim na nqouagaxainaxaquipi na lalamaxareteripi ñi qota'a. 5Ca na'le, ca' so nelaatec piguim le'ec icona aso lahi' na nichiinaxanaxat, ca ỹemqot aso norec lpoqo hueetalec aso ncopatoxonaxalate. Ca' ỹocorelec na 'laua. Ca na'le, ca' 'ue na soxonaxallipi, chaqai na nalataxa, nqai'legaxaripi, chaqai i'loxol na 'laua.
So npe'tellipi
6Ca na'le, ca' saua siete nelaatqa piguim lase' na'maxachiñi quiyim pi'chiguilo saua lpe'tel.
7Ca na' pi'chigui aso lpe'te so 'auaxaic nelaatec piguim le'ec, ca' anac aso qalachi chaqai so norec ỹalequeta'guit na neuoripi, ca' qaỹocorelec ná'ogue na 'laua. Ca' ỹavic añi 'óna quecaua tres qo'pa', chaqai qai'neeta na 'laua 'vii naua lavicqate', chaqai na 'uaqapi ladala.
8Ca' lotqai pi'chigui aso lpe'te so liỹa nelaatec piguim le'ec, ca' 'ue aso qaỹamaxañigui aso huaaxai 'ec ana quemaralec qa' ladocai ỹaviquetaugui. Ca' 'ue na hua'ñi quiyim ñigui neuoripi cana huaaxai. 9Ca' quecaua tres, 'óna ca ileu quená'ogue ná'maq hueetañigui ana huaaxai, chaqai quecaua tres, 'óna ca ropoqogui nqohin caná'ogue ana qom lahi' huaxaỹaqse.
10Ca' so liỹa nelaatec piguim le'ec pi'chigui aso lpe'te, ca' najñi aso chalego lecaic huaqajñi, chicqo'ot na piguim, ỹaviquetaugui 'ec ana ncoỹeraxanaxaqui. Ca' 'óna ca tajlec quecaua tres quená'ogue na lachiuguellipi chaqai ná'maq hua'ñi na ne'paxantashiguim huaxaỹaq. 11Ca' aso huaqajñi leenaxat Chim. Ca 'óna ca lahi quecaua tres huaxaỹaq chim, ca 'xoic na qom ileu, sauaxat na huaxaỹaq paguec na lichimaxa.
12Ca' so liỹa nelaatec piguim le'ec pi'chigui aso lpe'te, ca 'om nalahi añi ra'aasa chaqai ñi shiraigo. Chaqai quecaua tres, 'óna añi 'om caná'ogue ana huaqajñi, ca sham lavinñi yi na'xa'a chaqai yi pe 'ue so napalaxa.
13Ca na' ime, ca' ñamatashiguim, ca' sa'xaỹaque so nelaatec piguim le'ec ỹootegueri' quena lavinñi na piguim, ỹaatqajam netenegue da la'qaatec, 'naacsa':
—¡'Agai! ¡Ỹaatqajam chalego le'xoric ná'maq neetalec ana 'laua, ma' ilamiguilo daua npe'tel ma' qaipi'chiguilo quedaua liỹa' tres nelaatqa piguim lase'!
