Salmos 22

₁Qami' qota'olec,

¿chi'negue ma' yo'ueenaxachisañi?,

¿chi'negue ma' sqa na'itquena, ca yca'laxachirec?,

¿chi'negue ma' se quelollita da ñoỹenaxac?

₂Qami' qota'olec,

soỹaxantaque qami' quiyi na'xa'a chaqai yi pe,

qam sqai saachichiguit aỹim;

¡chaqai mashic qaica ca ñco'matqa'!

₃Qam ỹaatqajam co'teeta qami';

qami' nashi, ca imaqachintac qami' na Israel.

₄So qareta'allipi pi'ỹa'a na' qami';

pi'ỹa'a na' qami', ca' qami' nca'laxachirec;

₅rashiila'e' quiyim tauañi', ca' qami' souec nqai'ñi';

pi'ỹa'a qami', ca' qami' sqa yiñi'.

₆Qam ỹim sqaỹim ỹale, ta'ta'a quiyim 'ec ỹim ñilo';

¡chaqaỹim le'nec na qomyipi!

₇Ná'ogue ná'maq iuañiua' chi yi'neetac;

ileguemaxachigui na lashic, ca' ỹaxaỹaxan na lqahic.

₈Ca 'naac:

Ñijo ỹale pe'eetapega quen ñi qara'gaxala';

ca ñi'maxare souec nqai'en ma'le,

ma' lqo'itaxat, ca' nca'laxatec.

₉Ca' chaqaida 'neeta:

ne'qaañi nqai'ñi' na'le aỹim sachicqotougui aso ỹate'e;

ca nco'mataxañirec na'le aỹim na' seuetalec ana lotogue.

₁₀Shi'gue na' saqa' ñi'qaañi,

qa' cochi'sapiguiỹa';

na' ñaqai seuetaugui na lauel aso ỹate'e,

ca qami' qota'olec caỹim.

₁₁Sqoỹoqaque nqai'ñi' aỹim,

ma' sqo ỹoxe'oga da i'xoric,

chaqai qaica ca yotauan.

₁₂Na ñpa'guenaxauaripi yahiquinchiguiñi 'ec toorollipi,

'ec na nocqaic toorollipi quiyi 'laua Basán;

₁₃da lonoxoỹaxac 'ec na toxonaxai sauaxaic leta'allipi,

ỹauachigui na lap, ca' i'guentailec.

₁₄Mashic shinta na huaxaỹaq qaỹocorec;

naua ipi'naqa 'ec sootaguilo.

Añi i'taxanata 'ec ana lapa,

'ec quiguiñi quena iuel.

₁₅Rashivichigui na ỹap 'ec ca nehoma lahi nqateleguesec;

ñi ỹo'legaxanaxat mashic ronaỹo'ot na ñoquiaq.

¡Yilli'sa'guit na namoxoỹaxa 'ec yileu!

₁₆'Ec na pioxoripi na' lapoỹata' na hualoxonyipi

ỹaatqajam lapoỹa'asop aỹim,

coñirqachite' naua ñapoquenal chaqai naua ipiaate'.

₁₇¡Seshit ñaloqochine' naua'que naua ipi'naqa!

Na ñpa'guenaxauaripi ỹaatqajam qaica ca liỹa ra'ỹa'gue, qaỹimeta;

₁₈nallichiguilo saua ỹoho,

ca' neuagaxachiguilo saua'maxare.

₁₉Qam qami' ỹa'gaxala', qami' iquesaxanaxa,

¡se loỹoochiraque aỹim!,

¡chaqa'ma' nanaqui' quiyim yotauañi'!

₂₀'Ootaxañirelec aỹim quiyim qayalauat quena lecat,

mesqai 'xañitegue quiyim yalauat najo pioxoripi,

₂₁'ootaxañirelec aỹim, qaiyi se ya'ic najo sauaxaic leta'allipi,

¡quepaqataxañirelec aỹim cana lasote najo toorollipi!

₂₂Ỹim sa'xat qami' ma'le quena ỹaqaỹaripi,

semaqachintac qami' ma' salequetau'a ca lapoxoc.

₂₃Qamiri ma' maqachiñitac ñi qara'gaxala', ca ¡maqachiñii ma'le!

¡Qamiri llaalqaipi so Jacob, qamiá'ogue pacqajñiỹauec ñi'maxare!

¡Nqouagaxainot ma'le ná'ogue na llaalqaipi so Israel!

₂₄Ma' qaica quet cá'maq imaqa'guit ñi'maxare

chaqai qaica ca napacalec quena leuogoxo ca 'xoraic,

chaqai se nañoxotapeguem.

¡Quena' rashiilaxan quiyim qaỹotauan, ca na'xaỹaxanta!

₂₅Ỹauanchigui nqaishin ná'ogue na ralamaxarichi'ipi

semaqachintac quiyim ipaquichigui nqai'ñi' da ra'qaachiqui';

ca ỹauanchigui nqaishin ná'ogue ná'maq remaqachiñi'sac quiyim somachichigui dá'maq ỹa'qaatec na'le.

₂₆Qui'ii, qamiri 'xoraiquipi,

chi ỹovireta'a quiyim rquemarii;

qamiri ma' daañitaque ñi qara'gaxala', ca' maqachiñii,

ca 'xoic ca ñaxaripi rca'lliitauec.

₂₇Qamiri ni'ic, chaqai ná'ogue na ỹoreta'oguit qomyipi

quenaua'que naua lahil na 'laua:

o'lliinchii'a ñi qara'gaxala', ca' naguipegue';

¡'yiỹoto naua re'cootallii ñi'maxare!

₂₈Ma' ñi qara'gaxala' chaqaiñi ñí'maq nashi,

ñi'maxare ỹoiquentac ná'ogue na ỹoreta'oguit qomyipi.

₂₉Qaiñiita 'yiỹoto naua re'cootallii, ca nqouagaxainot

ná'ogue ná'maq qaica ca ỹouen,

ná'ogue ná'maq pilougui ma'le na 'laua,

ma' qaica quet cá'maq chi nanoiquentac nca'leetauec.

₃₀Na ỹaxataxahipi nqouagaxaintacot ma'le ñi qara'gaxala',

chaqai ỹa'xatetac ma'le ñi'maxare quedá'ogue da nachaalataxac;

₃₁ca ná'maq dalaxaic ne'qaañi qara'qaataxana ma'le

quedá'maq 'maxaraic no'ueenataxac chaqai quena lo'ueenataxanaxaquipi.