Marcos 6

₁So Jesús ca'e yi hueete'e, ca' quepegue' yí'maq chaqai'en la'a' ỹa'ñi, liỹaata'pe saua lapaxaguinatqa. ₂Ca co'na' ỹovire'oga so co'mataxaqui na'xa'a, ca rapaxaguinataxan caso lapoxoqui na judioipi. Ca' ỹaatqajam 'xoic so qomyipi quesó'maq na'xaỹaxantac 'xoic da le'laxa. Ca 'naaco' quen:

—¿Negue' cá'maq ỹachigoxota'gue dá'ogue dá'maq la'deenaxanaxa da ỹale? ¿Nega'ỹo' dá'maq na'deenaxanaxa qoỹaanem, chaqai ná'maq ỹo'ueetetac se qaiuanapega? ₃Ma' chaqaida dajo dá'maq qo'paq lo'o, llaalec aso María, chaqai lqaỹa so Jacobo, José, Judas chaqai so Simón, chaqai saua lqaỹa' 'aalo nera'ñi najo qai'neeta.

Ca' se qana'xaỹaxana. ₄Qam so Jesús 'naaco':

—Ná'ogue na qomyipi ỹaatqajam nqo'ta ca letaxaỹaxanqajnec ñi qota'a, qam ná'maq chi la'aayaxauaripi, chaqai chi lauo' laseripi, chaqai quiyim cá'ogue ca na'ñi, ca' sqai huelec.

₅Ca' so Jesús se ishit 'ue ca ỹo'uet quena se qaiuanapega. Ta'ta'a quiyim 'uo' na ỹashil-lec, ca ỹomatec ná'maq 'ue na le'ne', qam sqo vito'olqai'. ₆Ca so Jesús 'uo' da le'laxa, ma' se qoyiuelec. Co'na'le, ca eec, ca' queetaguilo naua na'aaterolqai', ca rapaxaguinataxantac.

₇Ca co'na'le, ca roỹaxanalo' saua doce lapaxaguinatqa, ca ilate' dooseta'pe nqai'ne', ca ỹaanema da lquesaxanaxa quiyim ỹo'derauec na ne'equipi lecmaxaiquipi. ₈Ca 'naapegalo quiyim se ỹahose'e nouente' queca nayic, ta'ta'a aca lashilete. Se ỹahose'e aca lloxoqui', chaqai ca loxe', chaqai aca lame'. ₉Chaqai ỹa'vii lapelate', chaqai 'oonoqui' ca nelamaxaqui, mesqai dos. ₁₀Ca 'naaco' quesaua'maxare:

—Qamiri quiyim ỹovita noxoñiu'a cá'maq canchaqaica 'imec, ca chaqa'ma' chaqaica ñiỹa'ñi, chi ỹovireta'a quiyim oquiỹa'e cajo 'laua. ₁₁Chaqai no'm 'ue ca hua'ñi quiyim se qaicoñiguita chaqai se qana'xaỹaxanalo qamiri, ca' oquiỹa'e ca'maxare, qam ma'le, ca ochigoxoiuec na namoxoỹaxa inocaho quenaua qapelachiri, ca dajo netanec quiyim ca'maxare chi nasauaxatalta'. Qam ỹaatqajam llic da shinac quiyim ma' ỹovita ca pa'aatec na'xa'a ma' imit na nasauaxaseteripi ñi qota'olec, ca' paguec lecaic ma'le ca nouaxanaxaset queso na'ñi yi Sodoma chaqai yi Gomorra ná'maq na'aateripi se icoñiguita qamiri.

₁₂Ca saua'maxare que', ca ỹa'xate' da na'qaatec quena qomyipi, qaiyi ỹaxañiñi naua shi'gue loico. ₁₃Chaqai qai'neeta 'xoic na ỹo'derauec ne'ec lecmaxaic, chaqai 'xoic na ralolaxaiquipi quena' qaỹa'men quena aceite, ca imeuec nqohin.

₁₄Ca co'na' ỹa'den dajo so nashi Herodes, ma' mashic ná'ogue na qomyipi ỹa'deenta da na'qaataxac so Jesús. Ca' so Herodes 'naaco':

—Ỹaatqajam chaqaida dá'maq nachilaxanataxanaq Juan liỹa nca'leuec, vichiguiño' 'ue dajo lquesaxanaxa.

₁₅'Uo' quen na 'naac:

—Dajo dá'maq letaxaỹaxaqui ñi qota'a leenaxat Elías.

Chaqai 'uo' quen na liỹa 'naac:

—Dajo letaxaỹaxaqui ñi qota'a, 'nejem so 'auaxaic letaxaỹaxaquiripi.

₁₆Ca co'na' so Herodes 'ue da la'xaỹaxac quedajo, ca 'naaco':

—Dajo chaqaida da Juan dá'maq selaataxanlec na'le quiyim qaichaxauec ñi lqahic, qam nagui lotqai liỹa nca'leuec.

₁₇Ma' so Herodes relaataxanlco' quiyim qaicoñi' so Juan, qaicoñira'gue na caréna, ca qoỹanaugui aca ncoñiitaxanaxaqui, sauaxat aso Herodías. Sojo Herodías louo' na'le so Felipe, chi lqaỹa so Herodes. Qam so Herodes rouootaxana'co' na'le, ca' loua. ₁₈Ca' so Juan 'naaco' na'le queso Herodes:

—Se ỹa'maxañi quiyim loqoichiguit añi loua so rqaỹa'e'.

₁₉Ca' aso Herodías ỹaatqajam noquii'o' na'le so Juan, ca' ỹahotaque ỹalauat, qam se ishit. ₂₀Ma' so Herodes ỹa'deenta quiyim so Juan ỹaatqajam 'maxaraic da llicyaxac, chaqai co'teeta, ca no'chaalec. Vichiguiño' sqai ỹaxanegue aso'maxare quiyim 'ue ca 'ne'tegue so Juan. So Herodes, 'eno'm sqailligueme' quiyim ỹaatqajam ỹa'yiinchigui da ỹa'xatetac so Juan, qam nqo'ta quiyim na'xaỹaxantapega. ₂₁Qam aso Herodías ỹanato' yi la'maqa' co'na' so Herodes ỹo'uet so lemaqachic na' ỹovirec so niñaaxa. Ca ỹo'uet so nqui'ỹaxac, ca' roỹaxana na lotauaripi nashillipi, chaqai na nouaataxanaq lashillipi, chaqai na nesallaxanqaipi na'ñi yi Galilea. ₂₂Ca' aso llaale aso Herodías inoxoneu'a yi hua'ñi ca nqui'ỹaxac, ca' rasot. Ca' dajo rasotaxac aso'maxare ỹaatqajam nqo'ta so Herodes, chaqai so lqui'ỹaxauaripi. Ca' so nashi Herodes 'naaco' caso'maxare:

—Yashiila'e' quecá'maq vi'saque, ca' ỹim saanem qami' ma'le.

₂₃Qam i'taxajñi da la'qaatec quiyim ipacqajanchigui ỹaanec cá'maq canchaqaica qaroỹaxanaque, 'eno'm taachiguiñigui na lavinñi yá'ogue yi 'laua reloqota'a so'maxare. ₂₄Ca' aso'maxare inoxonec, ca inat aso late'e, 'naaco':

—¿Negue' ca sashiilaxanaque?

Ca aso'maxare 'naaco':

—Shiilaxañitegue ca lqahic ca nachilaxanataxanaq Juan.

₂₅Ca' aso nequetegaxai pila'a yi neeta'ñi so nashi. Ca 'naaco':

—Sahotaque quiyim nagui nañaañirim ca lqahic ca nachilaxanataxanaq Juan, hueetagui nqai'ñi' ca peguet.

₂₆Ca' so nashi ỹaatqajam 'ue na lachicoxo. Qalaxam mashic ỹaanec da la'qaatec quiyim 'naac ipacqajanchigui, chaqai mashic qara'qaachigui queso lqui'ỹaxauaripi. Ca' se ishit quiyim ỹopilaxatauec dá'maq nashiilaxanaxac. ₂₇Ca' so nashi chaqa'ma' ila' so nouaataxanaq le'ec quiyim nodouo ca lqahic so Juan. ₂₈Ca' so nouaataxanaq le'ec quepegue' añi ncoñiitaxanaxaqui, ca ichaxauec na lqahic so Juan, ca ỹodouo, hueetañigui nqai'en so peguet, ca ỹaanem aso nequetegaxai. Ca so'maxare ỹaanem aso late'e.

₂₉Ca co'na' ỹa'den dajo só'maq queeta'pegue'o' na'le so Juan, ca' qoyiga'a so loshicmaxa, qaỹodouec, ca qaishinñi.

₃₀Ca co'na' ime dajo, ca' saua nelaatqa lapoirau'a so Jesús. Ca' qara'qaataxanem quená'ogue ná'maq qaỹo'uet, chaqai ná'maq rapaxaguinataxansa'pegue. ₃₁Ca' so Jesús 'naaco' quesaua'maxare:

—Ỹalahi, qolaq, ñoỹootqatec, qaiyi ñco'matqauec lecocho'qui'.

Ma' ỹaatqajam 'xoic na qomyipi naatapegueu'alo saua'maxare, vire'ta quiyim qaica ca ledaaqate' quiyim qui'ỹe'. ₃₂Ca' so Jesús chaqai saua lelaatqa nodaaterec que', nerañigui aso qom lahi' huaxaỹaqse, taare'oga yi 'laua qaica qom. ₃₃Qam 'xoico' na iuane'tegue na' eec, chaqai no'uenegue so Jesús. Ca qara'aua'gue da taira'gue 'laua, chicqote'ogalo quena na'aateripi, ca 'au ỹovi' na' saqa' ỹovite' saua'maxare. ₃₄Ca co'na' renotec so Jesús caso lahi', ca' iuane'ta so 'xoic qomyipi. Ca ỹaatqajam 'ue da le'xorenataxanaxa queso qomyipi, ma' 'neetari' aca qagreta quiyim qaica ca neloxoỹaq. Ca queetalec 'xoic na ỹapaxaguinegue. ₃₅Qam co'na' mashic avit, ca' saua lapaxaguinatqa nagrepegue' so'maxare, ca 'nerapego':

—Mashic avit, qam na seuqata'ñi qaica ca qom naalec na'maxare. ₃₆Ca 'maxaraic 'ñirapega na qomyipi quiyim quepegue' na sqoỹoqapigui na'aaterolqai', ca rishiujnaxanaque ca loq, ma' ná'maq qomyipi qaica ca ỹa'ic.

₃₇Qam so Jesús 'naaco' quesaua'maxare:

—Qamiri 'ỹaañim ca loq na'maxare.

Ca saua'maxare 'neraco':

—¿Qa' seshitaq quet seshiujnaxanqaque ca doscientos denarios queca na'ic quiyim squi'ỹaxanaq ná'maq qomyipi?

₃₈Ca' so Jesús 'naaco' quesaua'maxare:

—Ñaqa 'ajñii, ỹote' caua paañi' ñaqa 'vii caqamiri.

Ca co'na' qaỹa'deene', ca qohinaco':

—Cinco paañi', chaqai yaua dos nalliñi'.

₃₉Ca 'naapega so qomyipi quiyim nqa'xanñi, ỹahota'ahi naua lapooqote', nqa'xanaxanlec na 'uaqapi ladala. ₄₀Ca nqa'xanñi so qomyipi, ỹahota'ahi naua lapooqote', 'ue na cien, chaqai 'ue na cincuenta. ₄₁Ca' so Jesús ỹaconalo' saua cinco paañi' chaqai saua dos nalliñi', ca' ra'ishiguim quena piguim, ca ỹaanoto' da na'aachic ñi qota'olec, ca ỹasectaxachiguilo saua paañi' chaqai saua nalliñi', ca ỹaanouguilo saua lapaxaguinatqa. Ca saua'maxare, ca imeendec quesá'ogue so qomyipi. ₄₂Ca sá'ogue so qomyipi que'e, chaqai sá'ogue quema'. ₄₃Ca co'na' ime, ca qalapoon so ni'ỹoxot, ca no'xataqterañi saua doce canastos queso pan lahillipi chaqai saua nalliñi'. ₄₄Ca só'maq que'eetaco' na'le queso pan 'uo' ca cinco mil qomyipi.

₄₅Ca co'na' ime dajo, ca' so Jesús ỹa'auaxane' saua lapaxaguinatqa, nerañigui nqai'ne' aso qom lahi' huaxaỹaqse, paquera'ta aso latogot late'ogue', taareta'gue yi na'a' Betsaida. Ca' so'maxare no'ueenañi, niquinta'pegue' so qomyipi. ₄₆Ca co'na' ime niquinta'pegue' so qomyipi, ca' eec, taashi'megue aso quemaralec ladocai, ca' nqouagaxain. ₄₇Ca co'na' mashic pe, ca' aso qom lahi' mashic huaañigui yi lavinñi aso latogot late'ogue', qam so Jesús qaisoota hueetalec yi 'laua. ₄₈Ca' so Jesús co'na' ỹa'den quiyim mashic nco'terec queda lallicotaxanaxague', ma' saua'maxare reloqochichiguit so nonot. Qam co'na' na'xa'atac, ca' so Jesús quepegueto saua'maxare, qauaata, queetalec na huaxaỹaq. Ca mashic sham ỹa'ỹaalgoto. ₄₉Ca co'na' qaiuane'tegue queetalec so huaxaỹaq, ca 'neesapega nqo'ỹoqotaxanaq. Ca ỹaualqagui, ₅₀ma' saua'que iuanta so'maxare, ca ỹaatqajam 'ue da lqolonqa'. Qam so Jesús 'naapegalo' saua'maxare:

—¡Na'ñaxachii, chaqaỹim, totaxan ro'chii!

₅₁Ca so'maxare renojshiguim casó'maq neesañigui saua'maxare. Ca' qaguiguit so nonot, qam saua'maxare ỹaatqajam 'uo' da le'laqa'. ₅₂Ma' saua'maxare saqa' ỹa'deene' da se qaiuanapega queso pan, ma' ñaqa 'ue da la'ñaxague' naua le'taxanata saua'maxare.

₅₃Ca ỹapaquera'ta aso latogot late'ogue', ca ỹovirereta'a yi 'laua Genesaret. Ca' coñirera'ta aso lahite' quiyi lqodoc yi huaxaỹaq. ₅₄Ca co'na' renoterec caso'maxare, ca' so qomyipi chaqa'ma' no'uenegue so Jesús. ₅₅Ca' so qomyipi queuguilo naua na'aate' quiyi 'laua, ca qanodouo na ralolaxaiquipi, hueetalec nqohin na lacanec, qanodou'a yí'maq qaỹa'den hueeta'ñi so Jesús. ₅₆Ca quecanchaqaica tau'a so'maxare quenaua na'aaterolqai', chaqai quena na'a' leta'allipi, chaqai naua no'ueenaxari, ỹodo'oga na nayiquipi na ralolaxaiquipi. Ca qane'xoresene'tot so Jesús quiyim ỹasenta quiyim chi qaipootau'a na lahi so napoxoqui. Ca ná'ogue ná'maq ipootau'a so'maxare, ca chaqa'ma' imeuec.