Marcos 5

₁Ca co'na' mashic ỹovirereta quiyi 'laua Gadara. ₂Ca co'na' mashic renotec so Jesús caso qom lahi' huaxaỹaqse, ca qoyica'guit queso ỹale chicqaugui yi napalyipi 'ue so le'ec lecmaxaic. ₃Sojo ỹale chaqai'eno' quen neeta'oga yi napalyipi, chaqai qaica ca ishit coñi', 'eno'm ra'ñi nqohin ca lequet. ₄So'maxare mashic 'xoico' quen qaicoñirari', qaicoñijta' na lichil chaqai naua laua', qaỹahote'e na lequet ra'ñi, qam qaiyiita ỹachipiaxat. Ca' qaica cá'maq ishit coñirari' so'maxare. ₅So'maxare chaqai queetegueri' quiyi na'xa'a chaqai quiyi pe, ỹaualqata'pegue', queeteguelgoto naua quemaralgoto chaqai na napalyipi, chaqai coñirqachitetac na chi loshicmaxa quena qa'. ₆Qam co'na' iuañi'chiguit so Jesús ñaq qoỹoqo'chiguit, ca ca'guit ne'guenta, ca ỹa'chi'iñi naua le'cootal quiyí'maq reloqota'ñi so'maxare. ₇Ca' ỹaatqajam nelamaxaren, ca 'naaco':

—Qami' Jesús, qami' llaalec ñi qota'olec ỹapacauec quená'ogue, ¿chi'neco' ma' 'iisapegueu'a aỹim? Nagui ñi'xoresene'tot qami' quiñí'maq qota'olec quiyim se qa'vi'rahic.

₈'Naaco' dajo, ma' so Jesús shi'co' 'neetapega so'maxare:

—¡Qami' ne'ec lecmaxaic, oquire'e najo ỹale!

₉Ca' so Jesús inato':

—¿Negue' ca qadeenaxachi'?

Ca so'maxare 'naaco':

—Ỹim ỹeenaxat 'xoic, ma' qomi' 'xoic.

₁₀Ca ne'xoresentacot so Jesús quiyim se qoỹoqo'tegue ca qailategue quiyijo 'laua. ₁₁Qam ma' 'uo' so 'xoic cooshipi sqoỹoxe'oga, que'eetac, neetalec aso quemaralec late'ogue', ₁₂ca' so ne'ec lecmaxaiquipi ne'xoresene'tot so Jesús, 'naaco':

—Qarelachire'oga yi cooshipi, qaiyi saxougui ma'le.

₁₃Ca' so Jesús ỹaanem da ỹahotaque. Ca' so ne'ec lecmaxaiquipi inoxonec queso qom, ca' taugui so 'uo' ca dos mil cooshipi. Ca so'maxare 'eet, ca ilamqañi caso latogot late'ogue', ca sá'ogue homac.

₁₄Ca sauá'maq neloxoỹa' queso cooshipi 'eet, no'chi. Ca' que', ra'qaataxane' quiyi na'a' chaqai quena neeta'oga na no'ueenaxa. Ca anac so qomyipi ra'ajnaxana negue' cá'maq 'neeto' dajo. ₁₅Qam co'na' ỹovita yi hueete'e so Jesús, ca iuane'ta so ỹale só'maq 'uo' na'le so le'ec lecmaxaic, nqa'xantañi, ỹansañi saua loho, naỹajanchiguiñi. Ca' so qomyipi no'chi. ₁₆Ca só'maq ỹauantalec ra'qaataxan quedá'maq 'neeto' na'le so ỹale 'ue so le'ec lecmaxaic, chaqai dá'maq 'neeto' na'le queso cooshipi. ₁₇Co'na'le, ca qane'xoresene'tot so Jesús quiyim ca'e yi 'laua neetalec so qomyipi.

₁₈Ca co'na' so Jesús renojñigui aso qom lahi' huaxaỹaqse, ca só'maq ỹale 'uo' na'le so le'ec lecmaxaic ne'xoresenta huateta'pegue so'maxare. ₁₉Qam so Jesús se icoñiguit. Ta'ta'a quiyim 'naapega:

—Quirepegue' ca ra'aachi', chaqai ca qauochi' laseripi, ca 'qaataxañita dá'maq ỹo'uet ñi qara'gaxala' caqami', chaqai dá'maq 'neeta da lqouagaxa caqami'.

₂₀Ca só'maq ỹale eec ra'qaataxantapougui yi na'aateripi quiyá'ogue yi Decápolis dá'ogue dá'maq 'ne'teco' na'le so Jesús queso'maxare. Ca sá'ogue 'xoic da le'laxa.

₂₁Co'na' liỹa pilta so Jesús, neetañigui aso qom lahi' huaxaỹaqse, chicqa'ta'gue da laseego añi latogot late'ogue', ca 'xoic na qomyipi novita yí'maq hueeta'ñi so'maxare. Ca so'maxare hua'e yi lqodoc yi huaxaỹaq. ₂₂Ca novi'o' so 'óna queso lashillipi añi lapoxoqui na judioipi leenaxat Jairo. Ca so'maxare co'na' iuane'ta so Jesús, ca quepegue' ỹa'yi'iñi naua le'cootal. ₂₃Ca ỹaatqajam ne'xoresene'tot, 'naaco':

—Ayi ỹaale mashic ileuetac. Anaqui' quet, ca' shillirelec, qaiyi imeuec chaqai nca'leuec.

₂₄Ca' so Jesús quegue na'le so'maxare. Qam 'xoic so qomyipi eec qai'neeta, mashic npataxata'. ₂₅Qam queso qomyipi 'uo' aso 'aalo ỹalequetaho ralolaxai, ca mashic ỹovite' doce ñaxari naqueta'pe naua leuo'. ₂₆Ca ỹaatqajam 'xoico' da le'xoric, queetagui na natarenataxanaripi, chi ỹomatetaho sá'ogue so louenqaipi. Qam qaica quet cá'maq naquitetaque, chaqaidaata quiyim lama'xa noquiiquetañi. ₂₇Qam co'na' 'xaiguelec so Jesús, ca' aso 'aalo nqo'neu'a quena lelaq, queetou'gue so qomyipi, ca' ipootau'a so napoxoqui. ₂₈Ma' 'ñiichiguio' lauel: “Quiyim 'eno'm chi sepootau'a da napoxoqui, ca chaqa'ma' yimeuec.” ₂₉Ca chaqa'ma' qaguiguita saua leuo', ca nauata'guit quiyim na loshicmaxa imeuec queso le'ne'. ₃₀Ca' so Jesús retan quiyim da lquesaxanaxa 'uo' so ỹomatec, ca nqovilcaugui so qomyipi. Ca' renataxano':

—¿Negue' cá'maq ipootau'a na ñapoxoqui?

₃₁Ca' saua lapaxaguinatqa 'neraco':

—'Yiiñi' quiyim npataxagui qami' na qomyipi, qam nataxañisac: “¿Negue' cá'maq ipootau'a aỹim?”

₃₂Qam so Jesús ra'iitegueñi, ỹahotaque iuana cá'maq ipootau'a so'maxare. ₃₃Ca' aso 'aalo i'loxolqachit da lqolonaxa, ma' ỹa'deenta dá'maq 'neeta. Ca' quepegue', ca ỹa'dooto naua le'cootal so'maxare, ca ỹa'xatem dá'ogue dá'maq 'neeto' na'le. ₃₄Ca so Jesús 'naaco' caso'maxare:

—Qami' ỹaalole, qami' qaromachirec, ma' vi'relec. Ca' nagui, ca' qui', qaica ca huapigui qavilli', mashic remi'rec queso ralolaxa'e'.

₃₅Ca co'na' ñaq retaqatac so Jesús, ca novite'o' saua chicqora'a yi la'a' so lashi aca lapoxoqui na judioipi. Ca qara'qaataxanem so leta'a, qohinac:

—Ayí'maq qachaalli'i' tot qaca, ca' ¿chi'negue ma' vi'saque ledaxac ná'maq rapaxaguinataxantac?

₃₆Qam so Jesús se quelola dá'maq na'qaataxanaxac. Ca 'naapego' só'maq lashi aca lapoxoqui na judioipi:

—Se ro'chi'i', ta'ta'a quiyim vi'relec.

₃₇Ca so'maxare qaica ca liỹa naueca'pegue', qaisauate' saua Pedro, chaqai Jacobo, chaqai so lqaỹa Juan. ₃₈Ca co'na' ỹoviro quiyi la'a' so la'gaxala' aca lapoxoqui na judioipi, ca iuane'ta quiyim so qomyipi ỹaualqatagui chaqai noỹentagui. ₃₉Ca co'na' inoxono so Jesús, ca 'naaco':

—¿Chi'negue ma' raualaxaitagui chaqai noỹeñitagui? Ma' yí'maq nocto'lli' se ileu, ta'ta'a quiyim chaqai laqata.

₄₀Qam chi qai'neetac so'maxare. Ca' so Jesús inoxonec nqai'en sá'ogue so qomyipi, ca' ỹauego so leta'a chaqai aso late'e chaqai sauá'maq chi nauegaxaua', ca inoxona'a yí'maq hueeta'ñi aso nocto'lli'. ₄₁Ca' ỹacona na lqai'laxat, ca 'naaco':

—Talita, cumi —ca' da leloxoỹaxac dajo na'qaatec 'neetasa': Nocto'lli', shinapega qami', ne'laxachirishiguim.

₄₂Ca só'maq nocto'lli' mashic ỹovite' doce ñaxari chaqa'ma' ne'laxashiguim, ca ỹouoiguiri'. Ca' so qomyipi ỹaatqajam 'xoic da le'laxa. ₄₃Qam so Jesús ỹaatqajam 'xoic da laqataxac quiyim qaica ca qara'qaataxanem. Ca relaataxan quiyim qaỹa'ue ca loq aso nocto'lli'.