Marcos 16

₁Ca co'na' ime'uegue so na'xa'a co'mataxaqui, ca' aso María, lase yi Magdala, chaqai aso liỹa María, late'e so Jacobo, chaqai aso Salomé, saua'maxare rishiujnaxandaque so coraxat lo'daxaraic lahita, ca' querepegue' ỹahosaque ỹocorrelec so Jesús. ₂Qam ñaq nete'eto' na'le queso 'auaxaic na'xa'a no'ueenataxanaxaqui mashic nenoxonshiguim aso ra'aasa co'na' ỹovirere'oga aso lahi'. ₃Co'na'le, ca retaqatecta', 'neraco':

—¿Nega'ỹo' cá'maq naqat ma'le ñí'maq qa' lapooque' añi lahi'?

₄Qam co'na' ra'iraho, ca' iuanteta so qa' lodegaxat lapooque' aso lahi', qaica, shi'co' nac. ₅Ca' inoxondougui aso napal lahi', ca' iuanteta so ne'nec nqa'xantañi pa'aata'gue da loic, ladocaqa saua loho lalagaxaqa, ca no'daxateterec. ₆Qam so'maxare 'naaco' quesaua'maxare:

—Totaxan ro'chii, qamiri daañitaque ca Jesús, le'ec yi Nazaret, cataq qaipateno na'le. Qam shi'gue qanca'laxatec, qaica quenajo. 'Ajñii ná'maq qailla'ñi na'le. ₇Mohi, quiipegue' ca Pedro chaqai ca liỹa napaxaguinatqaipi, ca 'ñiỹapega: “So'maxare 'aueta'gue da Galilea caqamiri. Ca' quiyi, ca huañiỹa ma'le, ca' ipaquichigui dá'maq la'qaatec na'le caqamiri.”

₈Co'na'le, ca' saua 'aalo que', reloqorec caso napal lahi', ca' 'eete', ma' ỹaatqajam i'loxole' queda lqolonqa'. Qaica ca ra'qaataxanta, ma' ỹaatqajam no'chi'.

₉Co'na' ime quiyim liỹa qanca'laxatec so Jesús na' richiguiñi queso 'auaxaic na'xa'a no'ueenataxanaxaqui, ca' 'au nachaxana aso María lase yi Magdala, só'maq ỹo'dauco' na'le so siete laseripi lecmaxaiquipi. ₁₀Ca aso'maxare, ca' eec ỹa'ue la'xaỹaxac sauá'maq nauegaxaua'o' quen na'le so'maxare, qam saua'maxare rachicotem' chaqai noỹenta'pe. ₁₁Ca co'na' saua'maxare la'xaỹaxague' quiyim so Jesús liỹa nca'leuec, chaqai asó'maq 'aalo mashic iuana so'maxare, ca' sqai huerelec.

₁₂Ca co'na' ime dajo, ca so Jesús nachaxanalo saua dos na' taasa'uegue da no'ueenaxa, qam ỹoqa'a da no'ueenataxac. ₁₃Ca saua'maxare pilero quiyim ỹahote la'xaỹaxague' so liỹaripi, qam vire'talo saua se qoyiuelgoto.

₁₄Ca co'na' ncopa, ca' so Jesús nachaxana so once lapaxaguinatqaipi na' ñaq nqa'amtañi, reloqotalec so nqui'ỹaxala'. Ca so'maxare nelaqauguilo saua'maxare, ma' sqaica ca lpi'ỹaxague' chaqai da la'ñaxague' naua le'taxanatal, ma' sqai huerelec ná'maq mashic iuana so'maxare quiyim shi'gue liỹa qanca'laxatec. ₁₅Ca 'naaco' quesaua'maxare:

—Mohi, oquii, quiipegue' na qomyipi neetalec ná'ogue na 'laua, ca 'xachim da na'qaatec chicqaugui da nca'laxa. ₁₆Ca cá'maq huelec, ca' qanachilaxan, ca' chaqaica cá'maq qanca'laxatec ma'le; qam cá'maq sqai huelec, ca' chaqai 'neetari' sqa nac ca lasauaxaset. ₁₇Ca' quecá'maq hueeta'gue cá'maq huelec, ca' ỹo'uet ma'le na netanqaipi, 'neetasa': Da ỹeenaxat ro'ootaxana quena ne'ec lecmaxaic, chaqai ỹa'xate' naua ỹoqa'alo na'qaatqa, ₁₈chaqai quiyim ỹacoñigui ca nanaic, loqo'm 'ue ca ni'chigui ca redoonataxan, qam qaica ca 'negue; chaqai quiyim ỹashil-lec ca 'ue ca le'ne', ca' imeuec nqai'en.

₁₉Ca co'na' ime ỹa'xatema dajo saua'maxare, ca' so qara'gaxala' Jesús naỹoxonshiguim nqohin, ca' taigue da piguim, ca' nqa'xanñi queda loic ñi qota'olec. ₂₀Ca saua'maxare que', ca' ỹa'xate' da na'qaatec chicqaugui da nca'laxa quecanchi ỹovijtegue. Ca' so qara'gaxala' ỹotauanta'pe saua'maxare quiyim ỹaatqajam ipaquichiguilo nqai'ne' naua la'qaatqa, chaqai re'oq nqai'en na netanqaipi se qaiuanapega. Ajá'a, ca' chaqaida 'neeta dajo.