Marcos 15

₁Ca co'na' mashic richiguiñi, ca' so la'gaxalateripi so netaxaỹaxanqajanqaipi chaqai so qo'xoiquipi chaqai so rapaxaguinataxanta'pegue na naqataxaquipi chaqai sá'ogue só'maq nashillipi ỹo'ueetegueñi na leloxoỹaxaquipi nanchaqaina, sá'ogue lapoỹata', ca' qoỹaxateta so Jesús, ca' qaỹauegueu'a so Pilato. ₂Ca' so Pilato inato' so'maxare, 'naaco':

—¿Qami'o' ná'maq qami' lashi na judioipi?

Ca' so Jesús 'naaco':

—Ajá'a, chaqaida dá'maq 'ñirac qami'.

₃Ca só'maq la'gaxalateripi na netaxaỹaxanqajanqaipi ỹaatqajam 'xoic na imaqateguelec quiyim lasauaxaset so'maxare. ₄Ca' so Pilato lotqai liỹa inat so'maxare, 'naaco':

—¿Chi'neco' ma' qaica ca 'ñirac? 'Ajñi' mashic chalego ná'maq qaimaqateguelec qami' quiyim rasauaxashichi'.

₅Qam so Jesús qaica ca ỹa'xat, ca' so Pilato se ỹa'den ca 'neeta.

₆Qam so Pilato 'uo' quen da lanatec quiyim ỹa'ue ca ỹaxanec quena lcoñiitecseripi cá'maq qarashiilaxanegue quena qomyipi. ₇Ca 'uo' so ncoñiiteguesec, leenaxat Barrabás. Qam so'maxare 'vio' saua nauegaxaua' quiyim 'uo' na ỹalauate' qom na' qanpa'guene'e' so nashi. ₈Ca' so qomyipi noquiigo, ca' ỹashiila so Pilato quiyim chaqaida ipacqajanchigui nqai'en da lanatec. ₉Ca' so Pilato 'naaco' queso qomyipi:

—¿'Maxariñita quiyim saxanec ñi lashi na judioipi?

₁₀Ma' so'maxare retan quiyim chi lpa'guenaxanaxa so la'gaxalateripi na netaxaỹaxanqajanqaipi quiyim qoỹaano so Jesús. ₁₁Qam só'maq la'gaxalateripi na netaxaỹaxanqajanqaipi 'naapega so qomyipi quiyim ipacalec qarashiilaxanegue so Barrabás quiyim qaỹosouec. ₁₂Co'na'le, ca' renataxano' so Pilato, 'naaco':

—¿Negue' cá'maq viitaque quiyim shine'tegue dá'maq machiỹa'gue nashi quena judioipi?

₁₃Ca so qomyipi nemaashiguim ỹaualqagui, 'naaco':

—¡Pachiñiro!

₁₄Ca 'naaco' so Pilato quesaua'maxare:

—¿Nega'ỹo' cá'maq ỹo'uet se ỹa'maxañi da'maxare?

Qam saua'maxare lotqai liỹa ỹaualqagui, 'neraco':

—¡Pachiñiro!

₁₅Ca' so Pilato, ma' ỹahotaque quiyim sqaicanqaida queso qomyipi, ca ỹosouec so Barrabás. Ca co'na' ime relaataxanlec quiyim qaỹouaxantac so Jesús, ca' ỹaanec quiyim qaipateno.

₁₆Co'na'le, ca' qaỹaueguec so Jesús queso nouaataxanyipi quiyi nasoxoc so nashi. Ca lapoỹata' sá'ogue so nouaataxanyipi. ₁₇Ca' qoỹañiguilo' saua noho naue' letocqa', chaqai qoỹañigui na lqahic aso no'ueenata le qaipaxajta'. ₁₈Ca co'na' ime, ca qaiquintac qaỹaualqato'ot qohinaco' quen:

—¡Laa', qami'o' ná'maq qami' lashi na judioipi!

₁₉Ca qaỹouaxanquio' quen na lqahic, qaỹodootapega so pon, chaqai qanatoqotacot, chaqai qaỹa'dooto naua ne'cootal, 'ec nqohin cá'maq 'ue ca 'negue. ₂₀Ca co'na' ime da ne'naxac so'maxare, ca' qanaqate' saua noho ỹansañi naue' letocqa', ca' qoỹañiguilo sauá'maq chaqa loho. Ca na' ime, ca qaỹauegue'oga yi npatenqa'.

₂₁Ca 'uo' so ỹale na'ñi yi Cirene, leenaxat Simón, so'maxare leta'a' so Alejandro chaqai so Rufo. Noviro, chicqauec queda no'ueenaxa. Ca co'na' que'tegueyi, ca' qohinapega quiyim i'xat so npatenaxala' so Jesús.

₂₂Ca' qaỹauega so Jesús yi 'laua, leenaxat Gólgota. Ca' dajo 'naac: napal lqahic lpi'nec loma'. ₂₃Ca' qaỹahotaque qane'taxañigui so lataxa 'ue na lalegue' na qo'paq nate leenaxat mirra. Qam so Jesús se ni'chigui. ₂₄Ca co'na'le, ca' qaipateno. Ca' saua nouaataxanaq lase' nallichiguilo saua loho so Jesús, qaiyi ỹaataq cá'maq i'xat quiñi 'óna quesaua'maxare.

₂₅Ca mashic noỹoqshi'imgueuc aso ra'aasa co'na' qaipateno so'maxare. ₂₆Ca 'uo' so qoỹirelec quiyim hueetalec da lasauaxaset, 'neetasa': “Lashi na judioipi.” ₂₇So'maxare chaqai saua dos cuataxaqa na' qaipatendo, 'óna so qaipa'xana'gue da loic chaqai so liỹa queda nemaq. ₂₈Ca' quiyi, ca' ipaquichigui da naneretañi la'qaatec ñi qota'a, 'neetasa': “Ca'maxare qaỹalecqajnougui ma'le na hualoxonyipi.”

₂₉Ca ná'maq queeta'pegue so nayic i'neetac, ỹaxaỹaxantac na lqahic. Ca 'naac:

—¡'Aaa! Chaqaqami' ná'maq 'ñiraiquen quiyim poxoỹaxachirigui ñi no'ueenaxanaxaqui, qam quecaua tres na'xata', ca' machi' liỹa no'xoñirishiguim. ₃₀Ca' nagui, ca nca'laxachiralta', ca renochirec quena npatenaxalachi'.

₃₁Chaqai qai'neete' saua na'gaxalate' quena netaxaỹaxanqajanqaipi chaqai na rapaxaguinataxanta'pegue na naqataxaquipi qai'neeta i'neetac so'maxare. Ca 'neraco' quen:

—Ca liỹa nca'laxatec, qam ñi'maxare se ishit quiyim chi nca'laxatalta'. ₃₂Ca no'm seuanqachigui nagui quiyim renotec quiñi npatenaxala', ñí'maq lashi lca'laxaqui na Israel llaalqaipi, ca' qaigueme seuaqlec.

Chaqai vire'talo sauá'maq npatenaxaua' qai'neeta i'neesac so Jesús.

₃₃Ca co'na' mashic na'xa'a lavinñi, ca 'ue so napalaxa quená'ogue na 'laua chi ỹovireta'a rashiiñi aso ra'aasa. ₃₄Ca co'na' ỹovita yi laloqo', ca' so Jesús ỹaatqajam netenegue da laualaxac, 'naaco':

—Eloi, Eloi, ¿lama sabactani? —ca' da leloxoỹaxac dajo na'qaatec 'neetasa': Qami' qota'olec, qami' qota'olec, ¿chi'neco' ma' yalachi'?

₃₅Ca' 'vio' saua hueesa'anyi 'qaasapega, ca 'neraco':

—Ñaq na'xaỹaxañiỹa, ñi'maxare roỹaxantaque ca qota'a letaxaỹaxanqajnec leenaxat Elías.

₃₆Ca' quesaua'maxare 'uo' so ni'guinshiguim. Ca co'na' ime ilet aso 'ec nauol queso lataxa lochiviaxaic, ca' ỹanagui na lo'lo aso noqola late'e, ca' ỹaanshi'ma so'maxare, ma' ỹahotaque nqo'goq nqai'en. 'Naaco':

—'Xañiỹac, ñaq sa'ajnaq sha'apiguito' novi' ma'le ca Elías, ca' naqajñi.

₃₇Co'na'le, ca' so Jesús ỹaatqajam netenegue da laualaxac, ca' ileu. ₃₈Co'na'le, ca' so lapoxot aso no'ueenaxanaxaqui shicchichiguiñigui na lavinñi, chicqashi'mquera, ca ỹovirañi so lasectaxa. ₃₉Ca' so lashi na nouaataxanaq reloqoto'ot so Jesús iuanchigui na' ỹaualaq chaqai da 'neeto' na' ileu, ca 'naaco':

—Ỹaatqajam llic quiyim ñijo ỹale, ñi'maxare ỹaatqajam llaalec ñi qota'olec.

₄₀Qai'neeta 'vio' saua 'aalo qoỹorete'ogalo ra'iisau'a so'maxare. Quesaua'maxare ỹalequetauguilo' aso María Magdala lase, chaqai aso Salomé, chaqai aso liỹa María, late'e' so Jacobo só'maq paguec na'aasa chaqai so José. ₄₁Chaqaisauo' saua 'aalo sauá'maq queesa'pegue'o' na'le so Jesús chaqai ỹotauansaco' na'le na' hueete'e yi Galilea. Chaqai qai'neeta 'xoico' so liỹa 'aallipi taỹa'gue da Jerusalén co'na' liỹaasac so'maxare.

₄₂Ca co'na' mashic pe queso na'xa'a 'maqataxaqui, ma' quesó'maq liỹa na'xa'a, ca' co'mataxaqui. ₄₃Ca' nanaco' so José na'ñi yi na'a' leenaxat Arimatea. So'maxare ỹaatqajam choxoraic, chaqai ỹalequetaugui na nashillipi na ỹo'ueetegueñi na leloxoỹaxaquipi, chaqai so'maxare nauaantaque quiyim novi' ca lo'ueenataxanaxac ñi qota'olec ma' ỹoiquentac ná'ogue najo. Ca' ỹaatqajam ỹa'ñaxachigui na lauel, ca' quepegue' so Pilato, ca rashiilaxanegue so Jesús. ₄₄Ca' so Pilato ỹaatqajam 'uo' da le'laxa quiyim shi'co' ileu so Jesús. Ca roỹaxane'oga so nouaataxanaq lashi, ca' inat quiyim llic dajo. ₄₅Ca co'na' so nouaataxanaq lashi ỹa'xat quiyim llic dajo, ca' so Pilato ỹaanem so José so Jesús. ₄₆Ca co'na'le, ca' so José rishiujnaxana so hualoq lahi lalagaxaic nesateta, ca' naqajñi so Jesús, ca' lepategue. Ca co'na' ime, ca inaxañigui aca lahi' naugui so qa'. Co'na' ime, ca' ỹapogui aso lahi', rapoxona so qa' lodegaxat. ₄₇Ca' aso María Magdala lase, chaqai aso liỹa María late'e so José, saua'maxare ỹaatqajam iuanchirigui ca qailla'ñi so Jesús.