Marcos 14

₁Co'na' saqa'lecaua dos na'xata', ca ỹovire'oga so na'xa'a quena' qaỹo'leente na' qoyique'e yi Egipto. Queso na'xa'a, ca' qaỹa'ic quen na pan, qam le'en ana lpe'taqate. Ca sauá'maq la'gaxalate' ná'maq netaxaỹaxanqajanqaipi quena' qaretaxaỹa'pegue' ñi qota'a chaqai na rapaxaguinataxanta'pegue na naqataxaquipi idaantaque ca la'maqa' quiyim iconlec so Jesús, ca' ỹalauat. ₂Qam saua'maxare 'neraco' quen:

—Qam sqai hueetougui nqaishinaq na nemaqachic, qaiyi qaica ca le'laxa na qom.

₃So Jesús neeta'ñi yi Betania, quiyi la'a' so Simón só'maq qaỹamata'gue rishiita na loshicmaxa. Ca co'na' so Jesús ñaq nqa'xantañi reloqotalec so nqui'ỹaxala', ca noviro' aso 'aalo no'qoota'a aso coraxat lahi' leenaxat alabastro, no'qaachigui quena coraxat leenaxat nardo. Na'maxare ỹaatqajam 'xoic lesega'a. Ca aso'maxare ỹopoxoỹaxachigui aso coraxat lahi', ca ỹocorelec na lqahic so Jesús. ₄Ca 'vio' saua ỹalequesaho ro'ỹe', ca retaxaỹata', 'neraco':

—¿Chi'negue ma' chi qaiualaxain so coraxat? ₅Ma' so'maxare ishit qaimen trescientos denarios nqohin aca laseuete, ca qaỹotauan na 'xoraiquipi.

Ca ỹaatqajam qaro'ỹa aso 'aalo.

₆Qam so Jesús 'naaco':

—'Xañiỹac. ¿Chi'negue ma' sqai 'xañiỹac? Ma' dá'maq ỹo'uet ada'maxare caỹim ỹaatqajam ỹa'maqachiguiñi. ₇Na 'xoraiquipi chaqai 'neetari' ỹalequetauguilo qamiri, ca qamiri shichii rqouaguigue quecá'maq na'xa'a quiyim taachigui qavillii. Qam aỹim sqai shintari' quiyim salequetauguilo qamiri. ₈Dajo 'aalo ỹo'uet dá'maq ishit. Ada'maxare mashic ỹocorelec na ỹoshicmaxa queso coraxat ma' saqa' ỹovita quiyim qayishinñi. ₉Ỹaatqajam llic da shinac caqamiri, quiyim canchaqai hua'gue quiyim qaỹa'xat dajo na'qaatec chicqaugui da nca'laxa quená'ogue na 'laua, qai'neeta qaỹa'xatetac da ỹo'uet aso 'aalo, qaiyi se qaicoua'e aso'maxare.

₁₀So 'óna queso napaxaguinatqaipi, leenaxat Judas Iscariote, quepegue' quiyim retaxaỹa'pegue' so la'gaxalateripi na netaxaỹaxanqajanqaipi quiyim na'yiiñiguit ma' ỹahotaque quiyim ỹaano so Jesús. ₁₁Ca saua'maxare na' 'xaita dajo, ca' ỹa'maqachiguilo lavilli', ca' qohinapega quiyim qaỹo'uet aso nishiuete. Ca' quiyi, ca' so Judas idaanaque ca la'maqa' quiyim ỹaano so Jesús.

₁₂Ca quesó'maq 'auaxaic na'xa'a queso nemaqachic quena' qaỹa'ic na pan le'en lpe'taqate, chaqaiso so na'xa'a so nalauataxaqui ana qagreta quena' qaỹa'ic qaỹo'leente so na'xa'a na' qoyique'e yi Egipto. Ca' saua lapaxaguinatqa so Jesús renataxanta'po', 'neraco':

—¿Negue' hua'gue cá'maq vi'saque quiyim sa'maxataxañi ca rqui'ỹaaqachi' ma' qui'i' quecajo na'xa'a quena' qaỹo'leente na' qoyique'e yi Egipto?

₁₃Ca 'vio' saua dos ilate' quesaua lapaxaguinatqa, 'naaco':

—Quiipegue' yi na'a' lodegaxat Jerusalén. Ca' quiyi, ca huañi'tegue ma'le ca ỹale ri'llivitac. Ca' quiigue ma'le ca'maxare. ₁₄Ca quecá'maq inoxonou'e, ca 'ñiỹac ma'le quecá'maq lalamaxaret lauo' ca'maxare: “Ñi qara'gaxala' 'naac: ¿Negue' ca na'gue cá'maq 'imec qarqui'ỹaxaqui ma'le quenaua ỹapaxaguinatqa ma' sa'guinaq ca na'ic quena' qaỹo'leente na' qoyique'e yi Egipto?” ₁₅Ca ma'le, ca ichoxotema qamiri ñi 'imec lodegaxat, pa'aashiguim, shi'gue ỹa'maqatañi. Ca' quiyi, ca 'maxachiñi ca qarqui'ỹaaqa'.

₁₆Ca' saua lapaxaguinatqa que'. Ca co'na' ỹovirera'a yi na'a', ca ipaquichigui dá'ogue dá'maq 'naaco' so Jesús. Ca saua'maxare ỹaqatqajansari' so na'ic.

₁₇Ca co'na' mashic pe, ca noviro' so Jesús, liỹareta'pe saua doce lapaxaguinatqa. ₁₈Ca co'na' sá'ogue reloqotalec so nqui'ỹaxala' que'eetac, ca' so Jesús 'naaco':

—Ỹaatqajam llic da shinac caqamiri, quiyim ñi 'óna iqui'ỹaxaua caqamiri yayaano ma'le.

₁₉Ca co'na'le, ca saua'maxare ỹaatqajam rachicotem'. Co'na'le, ca ñi 'óna inat ñi liỹa, 'naaco':

—¿Ma'taq ỹim?

Chaqai so liỹa qai'neeta 'naaco':

—¿Ma'taq ỹim?

₂₀Ca' so Jesús 'naaco':

—Ñi'maxare 'óna caqamiri doce, ñi'maxare ñouanqate'e' quena qanapeguet. ₂₁Qam ma' chi leloxoỹaxac quiyim najo ỹale llaalec quiichi'ñiguilo naua naneresañi la'qaatqa ñi qota'olec. Qam ¡chalego le'xoric ñí'maq ỹale yayaano! ¡Paguec queto' la'maxa quiñijo ỹale quiyim se ne'qaañi queto' na'le!

₂₂Ca co'na' ñaq que'eeta'pe, ca' so Jesús icono' so pan, ca ỹaanshiguim da na'aachic quiñi qota'olec. Ca co'na' ime ỹasectaqchigui, ca' ỹaanouguilo saua'maxare, ca 'naaco':

—'A, a'guii najo, chaqaina najo ná'maq ỹoshicmaxa.

₂₃Co'na' ime, ca' icona aso 'taxaqui. Ca co'na' ime ỹaanshiguim da na'aachic quiñi qota'olec, ca ỹaanouguilo saua'maxare, ca sá'ogue ni'chigui aso 'taxaqui. ₂₄Ca 'naaco' quesaua'maxare:

—Nauajo chaqainaua nauá'maq iuo', naua'maxare i'taxachiñi dá'maq dalaxaic 'maqataxac, chaqai qaỹocoraqta'pe ma'le, qaiyi 'xoic ma'le ca nca'leuec. ₂₅Ỹaatqajam llic da shinac caqamiri, quiyim tot liỹa ñi'chigui najo li'i ana uva, toco' ma' ỹovita ca na'xa'a quiyim ñi'chigui ca dalaxaic lataxa, ma' ỹovita ca lo'ueenataxanaxac ñi qota'olec ma' ỹoiquentac ná'ogue najo.

₂₆Ca co'na' mashic ime so lo'ueenaxanaxague', ca' que', querepegue' aso quemaralec ladocai, loma' ana qo'paq leenaxat Olivos. ₂₇Co'na'le, ca' so Jesús 'naaco' quesaua'maxare:

—Qamiá'ogue yo'ueenaqchitañi quena pe, ma' yi naneretañi na'qaatec 'neetasa': “Salauat ma'le so neloxoỹaq cana qagreta, ca' ana qagretaipi neuagaxatac ma'le.” ₂₈Qam noma' liỹa qanca'laxatec aỹim, ca' sa'aueta'a ma'le yi Galilea.

₂₉Co'na'le, ca' so Pedro 'naaco':

—'Eno'm ná'ogue no'ueenaqtetañi qami', qam ỹim 'e'.

₃₀Qam so Jesús 'naaco' queso'maxare:

—Ỹaatqajam llic da shinac caqami', quena pe ma' saqa' ỹovi' dos noỹen ca huaqa'e, qala' ỹovi' tres quiyim noqollicchisa'pegue aỹim quiyim 'ñirac sqai huañirapiguiỹa'.

₃₁Qam so Pedro pilalec quiyim liỹa 'naac:

—'Eno'm shiqueta'ñi' aqami' ma'le, qam se ñoqolliguitegue qami' quiyim seuañiraxaua'.

Ca' sá'ogue so liỹaripi dá'ogue da 'naac.

₃₂Ca co'na' ỹovijta yi leenaxat Getsemaní, ca' so Jesús 'naaco' quesaua lapaxaguinatqa:

—Nqa'xañiñi quenajo, ca' ỹim saiquerajo, ñqouagaxain.

₃₃Ca' ỹauec so Pedro, Jacobo chaqai so Juan, ca 'ec 'xoic na lqolonaxa chaqai rachitata. ₃₄Ca 'naapegalo':

—Añi i'taxanata ỹaatqajam rachicota, ma' ỹa'deenta'guit da lelauaxa. Ñaq qoviỹa'e najo, qam sqai laxaiỹo', ta'ta'a quiyim nelohitauec.

₃₅Ca' so Jesús liỹa eec lecocho'qui', ca nqa'paxanñi quena 'laua. Ca' ỹashiila ñi qota'olec quiyim se ỹovichiguit nqohin so naata le'xoric ma' ỹovita ca laloqo'. ₃₆Ca co'na' nqouagaxain, 'naaco':

—Qami' ita'a, ma' qami' qaica ca qalañirac. Tegue' chaqai 'maxariñi' quiyim se sovichiguit dajo ñi'guenaxac dá'maq 'nejem aca naqana chim. Qam mesqaida quiyim chaqaida dá'maq sahotaque, ta'ta'a cá'maq vi'saque, ca' chaqaica.

₃₇Ca co'na' ime, ca' quepegueto saua lapaxaguinatqa, ca' iuanejlgoto laqatem'. Ca 'naaco' queso Pedro:

—Shimoñi', ¿mashic laqaite'? ¿Sqai shichi'o' quiyim shi'gouc nelo'isauec? ₃₈Ỹaatqajam nelohitauec chaqai nqouagaxaiñii, qaiyi sqo viriu'a ca ne'guenaxaguii. Ma' ca qom quiyí'maq hueetagui añi le'taxanata ỹaatqajam nasapteta, qam ná'maq loshicmaxa neual.

₃₉Ca so'maxare lotqai pila yi nqouagaxainqa', ca lotqai nqouagaxain, ipaquichiguilo nqai'ne' saua 'auaxaqa la'qaatqa. ₄₀Ime, ca' pil, ca lotqai liỹa iuanejlgoto laqate' saua lapaxaguinatqa, ma' naua nqote' la'qaatecta', paguec na lelaxac. Ca saua'maxare se ỹa'deene' cá'maq 'nerac. ₄₁Ca co'na' mashic ỹovi' tres, ca 'naapegalo':

—Nagui maqsa' laxahi chaqai nco'machiuec. Mashic nalootañi, ma' mashic ỹovita yi laloqo' quiyim najo ỹale llaalec qoỹaanougui na qomyipi sauaqhuaiquipi. ₄₂Ne'laxachishiguim, qolaq, ma' mashic novi' ná'maq yayaano.

₄₃Ca co'na' ñaq retaqatac so Jesús co'na' noviro so Judas. So'maxare chaqaiso' só'maq liỹa ỹalequetauguilo saua doce napaxaguinatqa, ca 'xoic so liỹaatac qomyipi ỹahote'e na lecat chaqai na nepon qo'paq. So'maxare nelaatqaipi queso lashillipi na netaxaỹaxanqajanqaipi quena' qaretaxaỹa'pegue' ñi qota'a, chaqai ná'maq rapaxaguinataxanta'pegue na naqataxaquipi, chaqai na qo'xoiquipi. ₄₄Ca' so Judas só'maq remeenaxan, so'maxare ỹo'ueeto' so letanec, 'naaco':

—Cá'maq ñqo'goq, ca' chaqaica ca'maxare. Coñilec, ca ỹaatqajam coñirita, ca' 'xachii.

₄₅Chi noviro, ca' chaqa'ma' nqo'neu'a so Jesús, ca 'naaco':

—Qami' ỹa'gaxala'.

Ca' nqo'goq. ₄₆Co'na'le, ca' qaiconlec so Jesús, ca qai'xat, qaicoñi'.

₄₇Qam 'uo' so 'óna quesauá'maq hueese'eyi no'vicshiguimo' so lecat, ca nouaxaneco' aso lque'la so lelaatec na lashi na netaxaỹaxanqajanqaipi. ₄₈Co'na'le, ca' so Jesús 'naaco' queso qomyipi:

—¿Ma' qamiri nanaguii, ca ne'xachii' naua lecachi chaqai naua nepoñiri qo'pa' quiyim ycoñiri, mashic 'eco' aỹim cuataxai? ₄₉Saua'que saua na'xata' quiyim salequetauguilo qamiri, sapaxaguinataxantac cañi no'ueenaxanaxaqui, qam se ycoñiri. Qam dajo 'viichii, qaiyi ipaquichiguilo naua naneresañi la'qaatqa ñi qota'olec.

₅₀Co'na'le, ca sá'ogue so lapaxaguinatqaipi so Jesús 'eet, no'ueenaqchichiguiñi so'maxare.

₅₁Ca' 'uo' so ne'nec coỹaretaho queso Jesús, napoota'ña so necanec hualoq lahi. Ca' qaiconlec. ₅₂Qam so'maxare no'ueenaqtetañi so napoota'ña, ca' 'eet, neetauec.

₅₃Co'na'le, ca' qaỹauega'a so Jesús só'maq ỹaatqajam lashi na netaxaỹaxanqajanqaipi. Co'na'le, ca lapoỹata' sá'ogue so lashillipi na netaxaỹaxanqajanqaipi, chaqai so qo'xoiquipi, chaqai so rapaxaguinataxanta'pegue na naqataxaquipi. ₅₄Ca' so Pedro co'uajalco' na'le so Jesús, qam qoỹoqo'chiguit. Ca chi ỹoviretau'o' so nasoxoc só'maq ỹaatqajam lashi na la'gaxalateripi na netaxaỹaxanqajanqaipi. Ca' quiyi, ca nqa'xantañi, ỹalequetauguilo saua nouaataxanaq lase', netonsapigui so norec.

₅₅Ca' so lashillipi so netaxaỹaxanqajanqaipi chaqai sá'ogue so nashillipi ỹo'ueetegueñi na leloxoỹaxaquipi idaantaque ca la'maqa' quiyim 'ue ca ỹachigoxochichigui quiyim qaỹalauat so Jesús, qam se ỹanata. ₅₆Ma' 'xoico' ná'maq 'ue na ỹa'xatetac, qam chi na'majanteguelec so'maxare, qam se natenta' ná'maq la'qaataxanaxaquipi so'maxare. ₅₇Ca 'vio' saua nachaachiñi imaqaseguelec ná'maq sqai llic quiyim lasauaxaset so'maxare, 'neraco' quen:

₅₈—Qomi' sa'xaiqachigui na'le da'maxare na' 'naac: “Ỹim sopoxoỹaxachigui ma'le najo no'ueenaxanaxaqui lo'ueenatco' na'le na qomyipi, qam quecaua tres na'xata', ca ño'xonshiguim ca liỹa se lo'ueenatec na chaqai qomyipi.”

₅₉Qam quedajo qaiyiita se natenta' ná'maq la'qaatqaipi.

₆₀Co'na'le, ca' só'maq ỹaatqajam lashi na la'gaxalateripi na netaxaỹaxanqajanqaipi ne'laxashiguim, chicqochiguiñigui so liỹaripi, ca' inato' so Jesús:

—¿Qaico' ca 'ñirac? ¿Negue' cá'maq 'neeta ná'maq qaỹa'xatetac, qaimaqateguelec aqami'?

₆₁Qam so'maxare qaica ca ỹa'xat, ca' chaqaida 'neetari' i'maqatam. Ca' so lashi so na'gaxalateripi lotqai liỹa inat so'maxare, 'naaco':

—¿Chaqaqami'o' ná'maq qami' nashi nca'laxaqui, llaalec ñi qota'olec ñí'maq qaremaqajnatec?

₆₂Ca' so Jesús 'naaco':

—Ajá'a, chaqaỹim. Ca' qamiri huañiỹa ma'le najo ỹale llaalec nqa'xantañi, pa'aata'gue da loic ñi qota'olec ñí'maq quesaxanaxaic, chaqai ma' rapil, ca naquetaugui na naueguelec hueeto'ot na piguim.

₆₃Co'na'le, ca só'maq lashi na la'gaxalateripi na netaxaỹaxanqajanqaipi, so'maxare nasectaqta'ahi saua loho. Ca' dajo netanec quiyim ro'ỹaari'. Ca 'naaco':

—¿Negue' quet cá'maq souenqataque quiyim 'ue quet ca liỹa 'ue ca ỹa'xat? ₆₄Ma' ỹaatqajam 'xaichigui da'maxare quiyim napaqueteguelec ñi qota'olec quenaua la'qaatqa. ¿Negue' cá'maq qohinta'gue da'maxare?

Ca sá'ogue nemaashiguim quiyim qaỹalauat so'maxare.

₆₅Ca chaqa'ma' 'vio' saua natoxora'a, chaqai qaỹapogui na lashic, chaqai qaỹouaxantac. Ca qohinaco' quen:

—¡'Xachi' nagui negue' cá'maq ỹouaxan qami'!

Chaqai saua nouaataxanaq lase' ỹouaxanyigui na lashic.

₆₆Ca' so Pedro hueetalec so nasoxoc, pa'aata'anquira. Ca' quiyi, ca ỹoviriri'o' aso lelaata so lashi na netaxaỹaxanqajanqaipi. ₆₇Ca aso'maxare co'na' iuane'ta so Pedro netontauaq queca norec, ca' ra'iito'oot, ca 'naaco':

—Qami' qai'neeta, qami' nauegaxaua da Jesús Nazaret le'ec.

₆₈Qam so Pedro noqolliguit, 'naaco':

—Se seuanapega, chaqai se sa'den dá'maq 'xachisac.

Ca ta'ogo'yi, co'na'le, ca' noỹen so huaqa'e. ₆₉Ca' aso nelaata lotqai ra'ỹo'ot so'maxare, ca 'naaco' queso qomyipi hueete'eyi:

—Dajo ỹale qai'neeta ỹalequetauguilo' quen naua'maxare.

₇₀Qam so'maxare liỹa noqollictegue. Ca co'na' ncopaata, ca' sauá'maq hueesa'anyi lotqai liỹa 'nerac queso Pedro:

—Ỹaatqajam llic quiyim lliquisauguilo' na'le saua'maxare, ma' qami' le'ec yi Galilea, chaqai nauá'maq ra'qaataxahi' 'nejme' naua la'qaatqa saua'maxare.

₇₁Ca' so Pedro pilalec ỹaatqajam paguec i'taxajñi da la'qaatec quiyim 'naac:

—Taque', ỹaatqajam se seuanapega da ỹale dá'maq 'ue da 'xachitac caỹim.

₇₂Queco' na'le, ca lotqai liỹa noỹen so huaqa'e. Ca so Pedro no'uene'teco' dá'maq 'naaco' na'le so Jesús: “Ma' saqa' ỹovi' dos noỹen ca huaqa'e, qala' ỹovi' tres noqollicchitegue aỹim.” Ca co'na' ỹa'deentapega dajo, ca' noỹen.