Mateo 3

₁Ca co'na' mashic 'vii caua ñaxari, ca' so nachilaxanataxanaq leenaxat Juan nacpegue' yi 'laua qaica qom quiyi Judea, ỹa'xatetac da na'qaatec. ₂Ca' da la'qaatec 'neetasa':

—Netogochiguilo nqai'ñii' naua qavilyii, ma' mashic tot qoỹoqaque da lo'ueenataxanaxac ñi qota'a neeta'gue da piguim quiyim ỹoiquentac ná'ogue najo.

₃Ca' sojo Juan chaqaiso' so 'neetapego' na'le so letaxaỹaxanqajnec ñi qota'a leenaxat Isaías co'na' deraxan, 'ne'teguesa':

₄Saua loho so Juan no'ueenataxat na nauaanaxanaxa late'e laue, chaqai loshicmaxa so nosaataxaqui, chaqai loqo ana piñai chaqai na rapic li'i quena 'oochi. ₅Chicqotapegueu'a yi na'a' lodegaxat Jerusalén ná'maq nacpegue' so'maxare quiyim na'xaỹaxana, chaqai ná'ogue ná'maq neetalec yi 'laua Judea, chaqai ná'maq sqoỹoqaque caso lachiugue Jordán. ₆Ca co'quena' 'naac quiyim ỹaxañiñi naua lasauaxasete', ca' so Juan nachilaxan caso lachiugue Jordán.

₇Qam co'na' so Juan iuane'ta so 'xoic qomyipi chicqaugui na fariseoipi chaqai ná'maq chicqaugui na saduceoipi nanac ỹahotaque quiyim qanachilaxan, ca' so'maxare 'naaco':

—¡Qamiri nanaic llaalqaipi! ¿Nega'ỹo' cá'maq ỹa'ue ra'xaỹaxaguii quiyim 'iichiỹa'piguit cá'maq chalego lecaic nouaxanaxaset na qom nepalata? ₈Na'maxachita, re'qoota nqai'ñii da no'ueenataxaguii quiyim mashic 'xañiñi naua ranataxahi se no'viiñi. ₉Qam 'neeto' lotqai hueetapigui qavillii quiyim 'ñiỹac: “Qomi' llaalqaipi so Abraham.” Ma' ỹim shinac ñi qota'a ishit ỹo'uet ca llaalqaipi so Abraham, ỹachigoxochichiguilo nauajo qari. ₁₀Ca qai'pe mashic ỹa'maqatañi quiyim qaỹouaxanchi'ñoto naua lpa'yii ana qo'paq. Chaqai aná'ogue ana qo'paq quiyim se no'uen ca la, ca' qaỹouaxanlec, ime, ca' qainaxañigui ca norec. ₁₁Ca' ỹim ỹaatqajam lliqueta ñachilaxañiguilo qamiri na huaxaỹaq, ca' chi netanec quiyim lachii' naua ranataxahi se no'viiñi. Qam cá'maq coỹaretalec aỹim, ca'maxare nachilaxanalo qamiri ma'le ca Espíritu Santo chaqai ca norec. Ca'maxare paguec lquesaxanaxa caỹim, vire'ta quiyim se seshit quiyim chi se'xate' caua lapelate'. ₁₂Shi'gue lo'qoota'a so lochigoxosoxonaxat, ca' co'taxat na trigo, naqat na lovi. Ime, ca' ỹa'maxat ná'maq co'teeta trigo la quiñi lahi'. Qam na lovi, ca' copata'a inaxañigui ca norec sqai 'om.

₁₃Co'na'le, ca' nanac so Jesús, chicqochi'ñi yi Galilea, nacpegue' so lachiugue Jordán yí'maq hueeta'ño' so Juan, qaiyi qanachilaxan queso Juan. ₁₄Qam na' ñaqai 'aueta, se ỹa'maxaren quiyim nachilaxan. Ca 'naaco' queso Jesús:

—Aỹim souen quiyim qami' yachilaxañi', qam ¿qami' naquirepegue' aỹim?

₁₅Qam so Jesús 'naaco' queso'maxare:

—Qam nagui le'en nqai'ñi' dajo. Ma' paguec la'maxa quiyim sepacqajanqachigui ná'ogue ná'maq ỹahotaque ñi qota'a.

Co'na'le, ca' so Juan nachilaxan. ₁₆Ca co'na' qanachilaxan so Jesús, ca na' nenoxonshiguim quiyi huaxaỹaq, ca 'eco' huachigui na piguim. Ca' so Jesús iuañi'chiguit so ne'Espíritu ñi qota'a naỹa'ña so'maxare 'ec na coviguiñic. ₁₇Co'na'le, ca' qara'xaỹaco' so na'qaatec, 'maqot na piguim, 'naac:

—Najo ná'maq ỹoqo'itaxat ỹaalec, na'maxare ỹaatqajam ñitoonta'pegue.