Da loviraxague' saua 'deenaxanqachaqaqa
1Ca' so Jesús ne'xaỹoqsoqo' yi na'a' leenaxat Belén, huaugui yi 'laua Judea, co'na' so Herodes nashi quiyi'maxare. Ca ỹovirera'o' yi na'a' lodegaxat Jerusalén saua ỹale' chicqora'gue da lqodoigue. Saua'maxare ỹaatqajam ỹa'deene' retane' ana huaqajñi. 2Ca renataxane':
—¿Negue' cá'maq hueeta'gue ca lashi na judioipi cá'maq chita'gue ne'qaañi? Ma' queda lqodoigue dá'maq sachigoxosqa'gue, seuanaxa aso netanqate huaqajñi. Ca' vichiguiño' ñanaguinaq quiyim semaqachinaq ca'maxare.
3Ca co'na' ỹa'den dajo so nashi Herodes, ca' tot ỹa'den ca 'neeta, chaqai qai'neeta ná'ogue na qomyipi na'ñi yi Jerusalén. 4Ca co'na'le, ca só'maq nashi roỹaxanougui ná'ogue na la'gaxalateripi na letaxaỹaxanqajanqaipi na qomyipi quiyim qaretaxaỹa'pegue' ñi qota'a, chaqai ná'maq napaxaguinataxanaripi quena qomyipi quiyim ỹapaxaguinegue na naqataxaquipi. Ca renataxanegue cá'maq hua'gue ca ne'xaỹoqsoqo' ma'le cá'maq nashi nca'laxaqui. 5Ca saua'maxare 'nerac:
—Yi Belén hua'ñi ma' ne'qaañi, huaugui yi 'laua Judea, ma' so letaxaỹaxanqajnec ñi qota'a chaqaida 'ne'tegue na' ỹiriñi:
6Ca' qami' Belén, ma' qami' viisaugui yi 'laua Judá,
ỹaatqajam chalego lecaic ma'le da nemaqajnataxanaxa ma'le caqami',
ma' qami' chicqochi'ñi ma'le ca na'gaxala',
cá'maq reloxoỹa'a ma'le ná'maq ỹalamaxareteripi llaalqaipi so Israel.
7Co'na'le, ca' so Herodes ỹaatqajam nañoxochichiguiñi roỹaxanalo saua 'deenaxanqachaqaqa. Ca inatete' quecá'maq viquio' na' re'oq aca huaqajñi. 8Ca co'na' ime, ca' ilate' queda Belén, ca 'naapegalo':
—Mohi, 'iigue da'maxare, qam ỹaatqajam nataxañiỹaque cajo noctoqui'. Ca ma' nachiỹa, ca' vii ca ỹa'xaỹaxac, qaiyi ỹim qai'neeta shicpegue' semaqachin.
9Ca co'na' ime da la'qaatec so nashi, ca' saua 'deenaxanqachaqaqa que'. Ca co'na'le, ca só'maq huaqajñi iuanto' na'le queda lqodoigue, lotqai 'aueta quesaua'maxare, vire'to' na' ỹovita cá'maq hueeta'ñi ca noctoqui', ca hua'e. 10Ca co'na' saua 'deenaxanqachaqaqa liỹa iuanteta aso huaqajñi, ca' ỹaatqajam 'xoic da netoonaxague'. 11Ca co'na' inoxondo queca 'imec, ca iuanteta so noctoqui' chaqai aso María só'maq late'e. Ca' ỹa'chi'iñi naua le'cootal, ca' imaqachine' so noctoqui'. Na' ime, ca ỹauajñiguilo saua lloxoqui', ca ỹachite' quena 'oro, chaqai nichiinaxanaxat, chaqai na louaq ana qo'paq lo'daxaraic lahita, leenaxat mirra. 12Ca co'na' ime, ca 'uo' so le'guemataxac, ca' qaraqata quiyim sqai pilegue dá'maq na'gue so Herodes. Ca piltegue da la'aate', qam queetetegue ca liỹa nayic.
So noctoqui' qoỹalochaxanegue da Egipto
13Ca co'na' mashic ỹoteguelo saua 'deenaxanqachaqaqa, ca' so 'óna lelaatec ñi qara'gaxala' piguim le'ec nachaxana so José co'na' laqata. Ca 'naapego':
—Ne'laxachirishiguim, coñitot na noctoqui' chaqai añi late'e. Ca' 'iichi', 'itegue da Egipto. Ca ñiisa'ño'yi, toco' ma' 'ue ca liỹa shinac. Ma' ñi Herodes idaanaque ma'le ñi noctoqui' quiyim ỹalauat.
14Ca' so José, chaqaiso só'maq pe, ca' ne'laxashiguim. Ca' iconsop so noctoqui' chaqai aso late'e, ca liỹareterec, taategue da Egipto. 15Ca' neesa'gue da'maxare, chi ỹovireto'o' na' ileu so Herodes. Ca' dajo 'neeto' na'le, qaiyi ipaquichigui da la'qaatco' na'le ñi qara'gaxala' queso la'qaataxanqajnec co'na' 'naac: “Soỹaxana ñi ỹaalec quiyi Egipto.”
So Herodes relaataxanlec so ñaaqaipioqui' quiyim qaỹalauat
16Co'na' so Herodes retan quiyim saua 'deenaxanqachaqaqa ỹayine' so'maxare, ca' ỹaatqajam ro'o. Ca relaataxanlec quiyim qaỹalauat ná'ogue na ñaaqaipioqui' na'ñi yi Belén chaqai quenaua'que naua lahil, chicqochi'ñi quiyaua dos ñaxari. Ca taỹa'nquira ipaquichigui nqai'en dá'maq la'qaataxanaxague' saua 'deenaxanqachaqaqa. 17Ca' queda, ca' ipaquichigui dá'maq ỹiriño' na'le so qota'a letaxaỹaxanqajnec leenaxat Jeremías, 'neetasa':
18Qara'qaataque da nivillaxac 'maxa'ñi yi Ramá,
oỹenaxac chaqai da naualaxac.
Chaqaño' añi Raquel noỹenteguelec na llaalqaipi,
chaqai se ỹa'maxaren qaicochaq,
ma' mashic shi'gue ileue'.
19Qam co'na' mashic ime ileu so Herodes, ca' so nelaatec quiñi qara'gaxala' piguim le'ec, ca lotqai liỹa nachaxana so José quiyi Egipto queso lelaxac. Ca 'naapego':
20—Ne'laxachirishiguim, ca' coñitot yi noctoqui' chaqai añi late'e. Ca pillita yi na'laua so llaalqaipi so Israel, ma' mashic ileue' yauá'maq ỹahosaque quen quiyim ỹalauate' na noctoqui'.
21Co'na'le, ca' ne'laxashiguim so José, ca' iconot so noctoqui' chaqai aso late'e, ca ỹauegue' quiyim querepegue' yi na'laua so Israel llaalqaipi. 22Qam co'na' so José ỹa'den quiyim so Arquelao nashi quiyi Judea, hueeta'ñi yi loma' so leta'a Herodes, ca 'ue da lqolonaxa quiyim quepegue' yi'maxare. Ime, ca' 'ue so qaỹachaxana queso le'guemataxac, ca' so'maxare quepegue' yi 'laua Galilea. 23Ca co'na' ỹovita yi'maxare, ca' quepegue' yi na'a' leenaxat Nazaret. Ca' dajo 'neeto' na'le, qaiyi ipaquichigui da ỹa'xate' saua letaxaỹaxaqui' ñi qota'a quiyim so Jesús qaỹamata'gue le'ec yi Nazaret.
