So Jesús inoxona'a yi Jerusalén
1Ca co'na' ipalasaho quiyi Jerusalén, ca ỹovirera'a yi na'a' Betfagé seeque'ta yi quemaralec late'ogue' leenaxat nananqa' ana qo'paq olivos. Ca' so Jesús 'vio' saua dos ilate' quesaua lapaxaguinatqa. 2Ca 'naapegalo':
—Quiipegue' yi na'aaterolqai' naloote'ogalo qomi'. Ca huañijlec ma'le aca 'ashina ncoñiitecse, 'ue llaalcoqui'. Ca' nohiuec, ca naviguiiri' quenajo. 3Ca no'm 'ue ca 'ue ca ỹa'xat caqamiri, ca 'ñiỹaco' ma'le: “Ñi qara'gaxala' ỹouene' naua'maxare, qam sqaỹaloq rapilaxate'.”
4Ca' dajo 'neeto' na'le queso'maxare, qaiyi ipaquichigui dá'maq la'qaatco' na'le so letaxaỹaxanqajnec ñi qota'a co'na' ỹiriñi:
5'Ñiỹapega ma'le yi na'a' lodegaxat leenaxat Sión:
“Ñaq ra'iiguit ná'maq rashii, naatau'a qamii,
ne'xoresentam, neetalec so 'ashinoqui',
llaalec ana 'ashina ni'ỹaac lomalate.”
6Co'na'le, ca' saua lapaxaguinatqa que', ca' ipacqajanchirigui dá'maq qohinaco' na'le queso Jesús. 7Ca qaỹaviguiri'o' na'le aso 'ashina chaqai so llaalcoqui', ca' qaipeguenlgoto saua loho saua'maxare, ca so Jesús renojlec. 8Ca' so qomyipi ma' ỹaatqajam 'xoic ipiguiñi'ñigui so nayic na looỹac. Na liỹa, ca ỹouaxanec ana chavic laue, ca illa'ñigui so nayic. 9Ca quesó'maq 'aueta qomyipi chaqai ná'maq co'uaataxanta qai'neeta ỹaualqatagui, 'naaco':
—¡Ỹaatqajam qaimaqachin na llaalec so qarashi David! ¡Ỹaatqajam chalego loyac da llicyaxac ná'maq naquetaugui da leenaxat ñi qara'gaxala'! ¡Qaimaqachin ñi qota'olec!
10Ca co'na' so Jesús inoxono quiyi Jerusalén, ca sá'ogue so qomyipi naugui yi na'a' lodegaxat ỹaatqajam 'ue da le'laxa. Ca 'xoico' quen na renataxan, 'naaco':
—¿Negue' só'maq sojo?
11Ca' so qomyipi 'naaco':
—Sojo só'maq Jesús só'maq letaxaỹaxanqajnec ñi qota'a, chicqa'gue da Nazaret huaugui yi 'laua Galilea.
So Jesús ro'ootaxanlec aso no'ueenaxanaxaqui late'ogue'
12Co'na' ime, ca' so Jesús inoxono quiñi no'ueenaxanaxaqui lodegaxat na'ñi yi Jerusalén. Ca' ỹo'daauec sá'ogue so nemeenaxanyipi chaqai so rishiujnaxantapega ná'maq qaimeentac. Chaqai ỹamaxañi na nemeenaxanaxalateripi ná'maq ỹosootapigui ana lam na qomyipi, chaqai ana nqa'xanaxaqui ná'maq imeentac na coviguiñic. 13Ca 'naaco':
—Naua naneresañi la'qaatqa ñi qota'olec 'neracsa': “Na ỹa'a' qaỹamata'gue na'a' qouagaxainqa'.” Qam qamiri ñigui nqai'ñii cuataxai nañoqotqa'.
14Ca' quiñi no'ueenaxanaxaqui, ca qanqo'neu'o' so Jesús quesaua qai'la' chaqai quesaua qaica ca 'óna lichi. Ca' so'maxare sá'ogue imeuec nqai'en. 15Qam co'na' saua la'gaxalate' na netaxaỹaxanqajanqaipi quena' qaretaxaỹa'pegue' ñi qota'a chaqai ná'maq rapaxaguinataxanta'pegue na naqataxaquipi ro'ỹe' co'na' iuanchigui quiyim qaỹo'uet ná'maq se qaiuanapega, chaqai co'na' 'xaỹa na ñaaqaipioqui' ỹaualqatalec quiñi no'ueenaxanaxaqui: “Ỹaatqajam 'ue da lquesaxanaxa da llaalec so qarashi David.” 16Ca 'neraco' queso Jesús:
—¿Ñaq na'xaỹaxañita dá'maq ỹa'xatetac ná'maq najo?
Ca' so Jesús 'naaco' quesaua'maxare:
—Ajá'a, sa'qaatapega. Qam ¿sqai taxailco' quen naua naneresañi la'qaatqa ñi qota'olec quiyim ỹa'xatesa'guit dajo? 'Neracsa':
Ma' 'viichi'o' quiyim na ñaaqaipioqui' chaqai na ñaqai llipetac
ỹaatqajam 'maxaraic da lemaqajnataxanaxac.
17Co'na'le, ca' ca'ahi saua'maxare, chaqai ca'e yi Jerusalén, ca quepegue' yi na'a' Betania, ca lelaqsoqo' queso pe.
So Jesús retaxaỹa'a aso higo lashi qaca aca la
18Ca co'na' nete'etam queso liỹa na'xa'a, co'na' liỹa pila'a yi na'a' lodegaxat, ca so Jesús nauata'guito' so lqopaaxa. 19Ca iuane'ejta'a aso higo lashi queso nayic lahi. Ca' quepegue', qam aso qo'paq qaca aca la, ta'ta'a ana laue. Ca' so Jesús 'naaco' caso higo lashi:
—¡Nagui taachi'ñi quiyim tot qaica ma' 'ue quet aca la aqami'!
Ca aso higo lashi chaqa'ma' ỹaso. 20Ca' saua lapaxaguinatqa co'na' iuanchirigui dajo, ca 'uo' da le'laqa'. Ca inate' so Jesús:
—¿Chi'neco' adá'maq higo lashi ma' chaqa'ma' ỹaso?
21Ca' so Jesús 'naaco' quesaua'maxare:
—Ỹaatqajam llic da shinac caqamiri, quiyim llic 'ue ca rpi'ỹaxaguii chaqai ỹaatqajam 'chichiguiñi nqai'ñii, mesqaidaata dajo shichii 'viichii. Ma' quiyim 'ñiỹapega anajo quemaralec late'ogue': “Qo'ñi' quenajo, 'iriñigui aso huaaxai”, ca' chaqaida 'neeta ipaquichigui dá'maq 'ñiỹac. 22Chaqai cá'ogue cá'maq shiilaxañiỹaque quiyim nqouagaxaiñii, no'm viilec, ca' coñiguit.
'Ue da 'negue so Jesús
23Co'na'le, ca' so Jesús inoxonougui ñi no'ueenaxanaxaqui lodegaxat. Ca co'na' ñaqai hueete'eyi, ca qanqo'neu'a quesaua la'gaxalate' na qomyipi quena' qaretaxaỹa'pegue' ñi qota'a chaqai saua lqo'xonqaipi na judioipi. Ca' qainatetac, qohinaco':
—¿Negue' cá'maq chigoxochira'gue quiyim 'viichi' dajo? ¿Negue' cá'maq ỹamaqairaxalec quiyim 'viichi' dajo?
24Ca' so Jesús 'naaco' quesaua'maxare:
—Ỹim qai'neeta sa'ue da inataxanaxac caqamiri. Ca no'm choxochii, ca' sa'xat cá'maq sachigoxota'gue quiyim so'uet dajo. 25¿Nega'ỹo' ca nela' so Juan quiyim rachilaxanataxan? ¿Ñi qota'olec, loqo'm na qomyipi?
Ca so'maxare chi noqolliguitetecta', 'neraco':
—No'm shinqac qanela' quiñi qota'olec, ca da'maxare 'naac ma'le coqomi': “Qam ¿chi'neco' ma' sqai viilec?” 26Chaqai no'm shinqac na qomyipi nela', qam qaro'cha'a na qomyipi. Ma' ná'ogue ỹa'deenta quiyim so Juan qanela' quiñi qota'olec quiyim retaqaugui na qomyipi.
27Ca 'neraco' na'le queso Jesús:
—'Taque', se sa'deenaq.
Co'na'le, ca' so Jesús 'naaco':
—Ca' ỹim qai'neeta se sa'xatema qamiri cá'maq yila' quiyim so'uet dajo.
Qaraloqojnaxañiguilo saua dos ñaalqa
28Ca' so Jesús 'naaco':
—¿Negue' cá'maq 'neeta ca ra'deenataxanaxaguii quedajo sa'xat? 'Neetasa': 'Óno' so ỹale dooso' saua llaalqa. Ca 'óno' so 'naapega quesaua'maxare: “Qami' ỹaalec, qui' nagui qataxañi' cayi ỹanecse 'úva.” 29Qam so llaalec 'naaco': “¡'E', sqa shic!” Qam na' ncopa, ca ỹadalaxat da la'deenataxanaxac. Ca' eec, ro'ueenataxan. 30Na' ime, ca' so neta'a lotqai quepegue' so liỹa llaalec, ca qaidaata dá'maq 'naapega. Ca so'maxare 'naaco': “Ajá'a, itaa'i', ỹim shic.” Qam sqai eec. 31Ca' quesaua dos ¿nega'ỹo' cá'maq ỹo'ueeto' cá'maq ỹahotaque so leta'a'?
Ca saua'maxare 'neraco':
—Só'maq 'auaxaic.
Co'na'le, ca' so Jesús 'naaco':
—Ỹaatqajam llic da shinac caqamiri, quiyim ná'maq icona'piguit ana nishiuete so nashi chaqai ana nedequenaxai 'au inoxona'a ma'le da lo'ueenataxanaxac ñi qota'olec caqamiri ma' ỹoiquentac ná'ogue najo. 32Ma' só'maq nachilaxanataxanaq leenaxat Juan novi' quiyim ỹapaxaguine' qamiri quedá'maq no'uen ñicyaxac, qam sqai viilec. Qam ná'maq icona'piguit ana nishiuete so nashi chaqai ana nedequenaxai huelec so'maxare. Qam qamiri ỹaatqajam huañichigui dajo, qam se retacochahi quiyim viilec.
Qaraloqojnaxañigui so no'ueenataxanyipi hualoxonyipi
33Ñaq na'xaỹaxañiỹa dajo liỹa ỹaloqojnaxanaxaqui 'neetasa': So ỹale 'uo' so na'laua, ca' ỹanlec cana 'úva. Ca ỹapou'a chaqai ỹo'uet aso lahi' na li'i quiyim qanelam aso'maxare, chaqai aso na'ajnaxanaxalate ladocai, qaiyi yá'ogue re'qojlec.
Ime, ca so ỹale 'vio' saua ỹa'ualaxanaxan so 'ueenataxanaxairipi queso na'laua. Ca' eec. 34Ca co'na' ỹovita ca laloqo' quiyim qanaqat ana la so lanecse 'úva, ca' 'vii saua nelate' lelaatqa quiyim rashiilaxantegue cá'maq taalec quet cá'maq ỹaatqajam lanecse. 35Qam so 'ueenataxanaxairipi iconlgoto saua nelaatqa. Ca 'vio' saua ỹouaxanta'pe, chaqai saua liỹa', ca qaỹalauate', chaqai saua liỹa', ca' inaxai', ỹodoota'a na qa'. 36Ca só'maq looỹac so 'laua lotqai liỹa paguec so nela' lelaatqaipi quesó'maq 'au nela'. Qam só'maq 'ueenataxanaxairipi chaqaidaata 'ne'tegue.
37Ca chi ỹovireto'o' nela' só'maq lalamaxaret llaalec, ma' 'ñiichiquio' lauel: “Ỹaatqajam qana'xaỹaxane'ta ma'le ñi ỹaalec.” 38Qam co'na' qaiuañi'chiguit só'maq llaalec, ca na'deento'o' so 'ueenataxanaxairipi, 'naaco': “Najo ná'maq taalec ma'le dá'maq lesallaxa so qana'co'. Salauataq, qaiyi taalgoto qomi' ma'le najo na'a'.” 39Ca' qaiconlec so'maxare, ca qaỹauegue'oguiyi queso 'laua, ca' qaỹalauat.
40Co'na'le, ca' renataxan so Jesús:
—Ma' novi' só'maq lalamaxaret so 'laua, ¿negue' cá'maq 'neeta'co' ma'le so 'ueenataxanaxairipi?
41Ca' qohinaco':
—Ỹaatqajam se i'xoren quiyim nalauajñi so hualoxonyipi. Ca ỹa'ualaxanaxan so liỹa 'ueenataxanaxairipi queso na'laua só'maq ỹaanem ma'le só'maq taalec so'maxare ma' ỹovita ca laloqo' qanaqat ana la so nanec.
42Ca' so Jesús 'naaco':
—¿Se ỹauanapego' quen quiyim taxailgoto naua naneresañi la'qaatqa ñi qota'olec? 'Neracsa':
So qa' qaỹañijin queso 'imec lo'ollipi,
chaqaiso' só'maq nollaañi ca 'imec.
Dajo ỹo'ueeto' na'le ñi qara'gaxala'.
Ca' dajo 'ec chalego nqaishinaq na lemaqachic.
43Ca vichiguiño' shinac caqamiri quiyim qarouootaxana'gue ma'le da lo'ueenataxanaxac ñi qota'olec caqamiri, ca qoỹaanem ma'le na qomyipi quená'maq ỹaanem ma'le ipacqajanchigui nqai'en dá'maq laỹaxac dajo no'ueenataxanaxac. 44Chaqai quecá'maq qa' quecanchaqaica huaañi quiyim tajlec ca'maxare, ca lahiletajlec nqohin. Chaqai no'm so qa' 'ue ca tajlec, ca ramoxoỹañi nqai'en.
45Ca co'na' so la'gaxalateripi na netaxaỹaxanqajanqaipi quiyim qaretaxaỹa'pegue' ñi qota'a chaqai na fariseoipi 'xaỹa dá'maq raloqojnaxantapigui so Jesús, ca' retan quiyim chaqaiso só'maq qohintapega. 46Co'na'le, ca ỹahotaco' coñi' so Jesús. Qam no'cha'o' so qomyipi, ma' so qomyipi ỹaatqajam letaxaỹaxanqajnec nqai'en ñi qota'a so Jesús.
