Mateo 20

₁Da lo'ueenataxanaxac ñi qota'a neeta'gue da piguim, da'maxare 'nejem cá'maq 'ue ca lanaxanqa' quiyim o'tetam idaanaque cá'maq naqat aca lanecse 'úva. ₂Ca so'maxare na'deena'pegue' so 'ueenataxanaxairipi quiyim ishiueten aso 'óna denario quiyi na'xa'a. Ime, ca' ilare'oga so lanaxanqa' quiyim ro'ueenataxan. ₃Ca' so a'co' na' noỹoxoguem aso ra'aasa lotqai iuane'talo saua liỹa' quiyi nouooqo' quiyi na'a', qaica ca lo'ueenategue'. ₄Ca 'naaco' quesaua'maxare: “Qamiri quiipegue' quet qai'neeta yi ỹanaxanqa', ca qataxañii. Ca' ỹim sepacqajanchigui ma'le aca laseuete da ro'ueenataxanaxaguii.” Ca' saua'maxare que'o'. ₅Ca co'na' mashic na'xa'a lavinñi, ca lotqai pilauec so a'co'. Chaqai co'na' mashic avitari' lotqai pilauec, chaqaidaata dá'maq 'neetari'. ₆Ca co'na' mashic inoxontegueñi aso ra'aasa lotqai pila'oga ca nouooqo' quiyi na'a'. Ca lotqai iuane'talo saua liỹa' no'ueenataxana' qaica ca lo'ueenategue'. Ca 'naapegalo': “¿Chi'neco' ma' viito'o' najo queso na'xa'alom sqai 'ueenataxañii?” ₇Ca' saua'maxare 'neraco': “Qaica cá'maq ỹa'ue ca qaro'ueenatec vichiguiño'.” Co'na'le, ca so a'co' 'naapegalo': “Quiipegue' quet qai'neeta yi ỹanaxanqa'. Ca' sepacqajanchigui ma'le acá'maq laseuete ca ro'ueenataxanaxaguii.” ₈Ca co'na' mashic pe, ca' so a'co' 'naapega só'maq reloqota'a dajo no'ueenataxanaxac, 'naaco': “Ỹaxañire'oga da no'ueenataxanaripi, ca' shivichiñi'. 'Auaxanchiriño' quiyim shivichiñi' dá'maq co'uaataxantam ro'ueenataxan, ca' ỹovireta'oga nqai'ñi' dá'maq 'avichiguiñi ro'ueenataxan.” ₉Co'na'le, ca ỹovirero' sauá'maq ro'ueenataxane'o' na' inoxontegueñi aso ra'aasa. Ca' ishiueten so na'xa'alom quiñi 'óna ỹaanem aso 'óna denario. ₁₀Ime, ca co'na' ỹovire'ogalo sauá'maq 'au ro'ueenataxane', 'neesapego' paguec aca iconchiguit. Qam qai'neete' qoỹaanema aso 'oono'lli' denario quiñi 'óna. ₁₁Ca co'na' iconchiguit aso nishiuete', ca' ro'ỹeta so na'coote'. ₁₂Ca 'neraco': “Só'maq co'uaataxantam chaqai cocho'qui' ro'ueenataxan, qam qami' 'nejem nqai'ñi' aná'maq qanishiuete, quiyim qomi' ñalauatqata'piguit so npa'ỹaaxa queso na'xa'alom so'ueenataxanqatac.” ₁₃Qam so a'co' 'naaco' queso 'óna quesaua'maxare: “Ỹim shinac caqami' ỹim se sachi'segueñi, ma' na' ña'deenqatecta', shinac seshiueten aca 'oono'lli' denario quiyi na'xa'a. ₁₄Ca' coñichiguit aná'maq nishivichi'i', ca' qui'. Ma' ỹim sahotaque saanem dá'maq co'uaataxanta ro'ueenataxan cá'maq 'nejem aca nishivichi'i'. ₁₅Ca' ¿se ỹa'maxaño' quiyim soiquentac canchaqai shinta'gue aná'maq ỹam? ¿Loqo'm pa'guiñisa'a quiyim aỹim 'naxanaxaraic?” ₁₆Ca' chaqaida 'neeta ma'le, quená'maq co'uaataxanta nagui, ca' 'aueta ma'le, chaqai ná'maq 'auaxaic nagui, ca' co'uaataxanta ma'le. Ma' 'xoic ná'maq noỹaxanaxat, qam sqo vito'olqai' cauá'maq nca'acse'.

₁₇Ca' so Jesús co'na' mashic taata'gue da Jerusalén, ca' ỹoỹoote'ogalo saua doce lapaxaguinatqa. Ca 'naaco' quesaua'maxare:

₁₈—Ca' qamiri 'yiiñita nagui qomi' saaqatashi'ma yi Jerusalén. Ca' yí, hua'ñi ma'le quiyim najo ỹale llaalec qoỹaaneu'a ma'le na la'gaxalateripi na letaxaỹaxanqajanqaipi na qomyipi quena' qaretaxaỹa'pegue' ñi qota'a chaqai ná'maq rapaxaguinataxanta'pegue na naqataxaquipi, quiyim ỹoiquenac cá'maq 'neeta'gue ca lelauaxa, ₁₉chaqai qoỹaanougui ma'le ná'maq ỹoqa'a ca chicqa'gue, ca' qai'neetac ma'le chaqai qaỹouaxantac, ime, ca' qaipateno. Qam ma' ỹovirerec caua tres na'xata', ca' lotqai liỹa nca'leuec.

₂₀Co'na'le, ca nqo'neho' queso Jesús aso late'e so Jacobo chaqai so Juan, llaalqa so Zebedeo. Aso'maxare liỹaresaho saua llaalqa, ca' ỹa'dooto naua le'cootal so Jesús, ma' ỹahotaque quiyim ne'xoresene'tot ỹashiila. ₂₁Ca' so Jesús inato' aso'maxare, 'naaco':

—¿Negue' cá'maq vi'saque?

Ca' aso'maxare 'naaco':

—Sahotaque 'ỹaañirec quet nagui ca ra'qaachiqui', quiyim ma' ỹovita ca laloqo' da ro'ueenataxanaxaqui' quiyim qami' nashi, ca' quenauajo ỹaalqa 'óna quet ca nqa'xanta'gue da qatoiqui' ma'le, chaqai ca liỹa queda nemaqai'.

₂₂Qam so Jesús 'naaco' caso'maxare:

—Qamiri sqa 'yiiñii cá'maq shiilaxañitaque. ¿Qamiri shichiho' quiyim viriỹau'a da ñi'guenaxac dá'maq 'ec aca naqana chim qayi'taxañigui chaqai coñiguit dá'maq chilaxac secoñiguit ma'le?

Ca saua'maxare 'neraco':

—Ajá'a, seshitaq.

₂₃Ca' so'maxare 'naaco':

—Ajá'a, llic qamiri viriỹau'a ma'le da ñi'guenaxac chaqai dá'maq chilaxac saataugui. Qam quedá'maq quiyim qanqa'xanegue da ỹoic chaqai da ñimaq, ca' ỹim sqai soiquentac quiyim saanec. Ta'ta'a quiyim qoỹaanema ma'le cauá'maq qaỹa'maxatesañi quiñi ita'a qota'olec.

₂₄Ca co'na' saua liỹa' diez lapaxaguinatqa 'xaita dajo, ca ro'ỹalo saua dos nqaỹa'. ₂₅Qam so Jesús roỹaxanouguilo, ca 'naaco' quesaua'maxare:

—Mashic qamiri 'yiiñii dá'maq 'neeta na nashillipi quená'maq ỹoreta'oguit qomyipi hueetalec ana 'laua, na'maxare ỹoiquentac 'neetari' ca a'co', chaqai ná'maq leta'allípi quena'maxare. Ca ỹo'uet quiyim qana'xaỹaxana dá'maq 'naac na liỹaripi. ₂₆Qam caqamiri, ca' sqai 'neeta dajo ma'le. Ta'ta'a quiyim cá'maq ỹahotaque paguec ỹapacauec caqamiri, ca' ca'maxare quelola ná'maq liỹaripi. ₂₇Chaqai canchaqaica caqamiri ỹahotaque quiyim 'auaxaic, ca ca'maxare, ca' na'ac quená'maq liỹaripi. ₂₈Ma' chaqaida dá'maq 'neeta najo ỹale llaalec se novi' quiyim ỹahotaque qaiquelola. Ta'ta'a quiyim ná'ogue quelola, chaqai quiyim da nachaalataxac ỹaanec, ca' 'ec lishiuetenaxanaxat, qaiyi 'xoic ca nca'leuec.

₂₉Ca co'na' saua'maxare sham inoxondec quiyi na'a' Jericó, ca 'xoico' so qomyipi quegue so Jesús. ₃₀Ca 'vio' saua dos qai'la' nqa'xansañi quena lahi so nayic. Ca co'na' 'xaira'pegue' quiyim que'tegue yi'maxare so Jesús, ca naualqaiñi, 'neraco':

—¡Qami' qara'gaxala', qami' llaalec so qarashi David, qare'xoriñi'!

₃₁Ca' so qomyipi 'naapegalo' quiyim i'marete'. Qam saua'maxare lama'xa paguec netenegue da laualaxague':

—¡Qami' qara'gaxala', qami' llaalec so qarashi David, qare'xoriñi'!

₃₂Co'na'le, ca' so Jesús hua'e, ca roỹaxanalo saua qai'la'. Ca inate'o', 'naaco':

—¿Negue' cá'maq viitaque quiyim so'uet caqamiri?

₃₃Ca' saua'maxare 'neraco':

—Qami' qara'gaxala', sahoqotaque ñiuanaxañi.

₃₄Ca' so Jesús ỹaatqajam 'uo' da le'xorenataxanaxa quesaua'maxare, ca ipootau'alo naua nqote'. Ca' saua qai'la' chaqa'ma' neuañiñi, ca' coỹaretero queso Jesús.