Mateo 13

₁Ca' sojo na'xa'a, ca' so Jesús ca'e yi na'a', ca quepegue' aso latogot late'ogue', ca nqa'xanñi quena lahi. ₂Ca na' ỹaatqajam 'xoic so qomyipi lapoỹau'a yí'maq hueete'e so Jesús. Ca so'maxare renojñigui aso qom lahi' huaxaỹaqse, ca sá'ogue so qomyipi no'ueeno'ot yi lqodoc so huaxaỹaq. ₃Ca' so Jesús ỹaatqajam 'xoic na lapaxaguinataxanaxac, qam ỹahote'e na laloqojnaxanaxaqui, 'naaco':

—'Uo' na'le so ỹale danaxan, ỹanñi aso lanecse ala. ₄Ca co'na' danaxantac, ca 'uo' ana lanecse tajlec ca nayic. Ime, ca' novi' ana qo'oole, ca' ỹa'ic. ₅Chaqai aso liỹa lanecse tajlec so 'laua ỹalliquichigui na qa'. Ca' aso nanecse chita'gue, ca' ñaxat, ma' sqoỹoxoñi na 'laua. ₆Qam co'na' nenoxonshiguim añi ra'aasa, ca co'na' pa'eelec, ca rashivi, ma' qaicaua caua lpa'yii. Ca ỹaso. ₇Ca' aso liỹa lanecse tajlec ca leesat. Ca na' nqo'in da llaqtaxac so leesat, ca ỹapolec, ca sqai ñaxat. ₈Qam aso liỹa lanecse tajlec yí'maq lo'yaxanec 'laua. Ca na' ñaxat, ca' lo'yaxanec da laỹaxac. 'Ue ana ỹovi' cien ana la cañi 'óna, chaqai 'ue ana ỹovi' sesenta, chaqai 'ue ana ỹovi' treinta ana la na' qanaqat. ₉Ca no'm qamiri 'yiiñii ca na'xaỹaxanaxaguii, ca ¡'maxaraic quiyim na'xaỹaxañii!

₁₀Co'na'le, ca' saua lapaxaguinatqa so Jesús nqo'nero, ca' renataxane', 'nerac:

—¿Chi'negue ma' vise'e na raloqojnaxanaxagui'i' quena' taqairougui na qomyipi?

₁₁Ca' so Jesús 'naaco' quesaua'maxare:

—Ñi qota'olec ỹa'deenaxanaxanque qamiri dá'maq se re'xogui leloxoỹaxac dá'maq lo'ueenataxanaxac hueeta'gue da piguim. Qam na'maxare ỹaatqajam se ishit ỹa'den. ₁₂Ma' cá'maq 'ue ca hueeto'ot, ca qanoquigaxatec ca qoỹaanem, qaiyi ỹaatqajam qaica ca ỹouentaque. Qam cá'maq qaica ca hueeto'ot, ca vire'ta cá'maq cocho'qui' hueeto'ot qarouootaxana'gue. ₁₃Vichiguiño' sahote'e na ỹaloqojnaxanaxaqui quena' setaqa. Ma' na'maxare 'ue ná'maq iuana, qam 'ec sqaica ca iuana. 'Qaatapega, qam se ỹa'den, ca 'ec sqa 'xaỹa. ₁₄Ca quedá'maq 'neetari' na'maxare, ca' ipaquichigui dá'maq ỹa'xato' na'le so qota'a letaxaỹaxanqajnec leenaxat Isaías, co'na' 'naac:

₁₆Qam chalego la'maxa caqamiri, ma' huanaxañiỹalo naua nqochiri, chaqai 'xahi' naua rque'lahi lauaco. ₁₇Ỹaatqajam llic da shinac caqamiri, quiyim 'xoic na qota'a letaxaỹaxanqajnec chaqai na huagaxaraic qomyipi ỹahotaco' quen iuana dá'maq huañiỹa qamiri, qam se iuana. Chaqai ỹahotaque 'xaỹa dá'maq 'xaiỹa qamiri, qam sqa 'xaỹa.

₁₈Ñaq na'xaỹaxañiỹa dá'maq leloxoỹaxac só'maq danaxantac. ₁₉Ná'maq na'xaỹaxana dá'maq na'qaataxac da lo'ueenataxanaxac ñi qota'a neeta'gue da piguim, qam se ỹa'den, ca 'nejem acá'maq la taachi'ñigui ca nayic. Ca' anac so na'ỹaapec, ca rouootaxana'gue só'maq hueetagui añi le'taxanata. ₂₀Ca só'maq la tajlec ca 'laua 'xoic na lalegue' qa', ca 'nejem ca qom netoone'tegue quiyim icoñiguit da na'qaatec. ₂₁Qam ma' sqoỹoxo'ñiguilo naua lpa'yii, ca' se ra'ñi. Ma' quena' 'ue da le'xoric quena nocanaxaquipi souetapigui da na'qaatec, ca' qoshiiuec. ₂₂Chaqai asó'maq nanecse tajlec ca hua'ñi ca leesat, ca 'nejem ca qom quiyim 'xaỹa da na'qaatec. Qam imelec ná'ogue nanchaqaina hueetalec na 'laua, ca' da nesallaxa ỹayin, ca dá'ogue dajo ỹapolec da na'qaatec, ca' se ỹa'ue ca laỹaxac cajo qom. ₂₃Qam aso nanecse ala tajlec yi lo'yaxanec 'laua, ca chaqaina ná'maq ỹa'maxate'tegue da na'xaỹaxanaxac chaqai ỹa'den da leloxoỹaxac, ca' lo'yaxanec da laỹaxac quiyim qanaqat. Chaqai 'ue ná'maq 'nejem aso nanecse ỹovi' cien ana la cañi 'oono'lli', chaqai 'ue na liỹa 'nejem aso ỹovi' sesenta ana la, loqo'm 'nejem asó'maq ỹovi' treinta ana la.

₂₄Ca' so Jesús ỹo'uet so liỹa raloqojnaxañigui, 'naaco':

—Da lo'ueenataxanaxac ñi qota'a neeta'gue da piguim, 'nejem ca qom ỹanlec ca na'laua aca no'uen lanecse. ₂₅Qam na' ñaqai ná'ogue laqata, ca' inoxono só'maq npa'guenaxaua só'maq lalamaxaret sojo nanaxanqa'. Ca' ỹanñi aso se no'uen peue, ỹalecqajnougui so trigo. Ca' eec. ₂₆Ca co'na' ñaxat so trigo co'na' mashic 'ue ana la, ca' re'oq qai'neeta aso peue. ₂₇Co'na'le, ca so nelaatqaipi eec, ca' 'naapega só'maq lalamaxaret sojo nanaxanqa': “Qami' qana'co', no'm no'uen asó'maq qadañicshi'i' ñiriñi na'le quena qadanaxanqachi', ca ¿negue' cá'maq chicqa'co' ana peue?” ₂₈Ca só'maq lanaxanqa', so'maxare 'naaco': “'Uo' ca ñpa'guenaxaua ỹo'ueeto' na'le dajo.” Ca só'maq nelaatqaipi renataxano', 'naaco': “¿'Maxariñite' quiyim ño'tegaq ana peue?” ₂₉Qam so'maxare 'naaco': “'E', ma' no'm no'chiguii ana peue, ca sqoue aca liỹaashi'me' caná'maq trigo lashi. ₃₀Ca 'maxaraic quiyim 'xañiỹac naquetashi'mta', toco' ma' ỹovita qanaqat na trigo. Ca' selarelec ma'le na ilaatqaipi quiyim 'au no'tec aná'maq peue, ỹahota'ahi ncoñiita. Ca qaicopata'a ma'le, ca ma' ime, ca' ỹa'maxat ná'maq trigo quiñí'maq ỹo'xac.”

₃₁Ca' so Jesús lotqai ỹa'uo' so liỹa laloqojnaxanaxaqui, 'naaco':

—Da lo'ueenataxanaxac ñí'maq neeta'gue da piguim, da'maxare 'nejem ana la ana leenaxat mostaza quiyim ca ỹale ỹanlec cá'maq chi na'laua. ₃₂Ỹaatqajam llic quiyim ana'maxare paguec cocho'lli' caná'ogue aná'maq la. Qam quena' ñaxat, ca' eec da llaqtaxa, ca' paguec da lecaic, ca chi ỹovireta'a quiyim 'ec qo'paq chalego lecaic. Ca vire'ta ana ỹootegueri' qo'oole ỹo'uet na lpa'gue' quenaua lasote.

₃₃Qai'neeta ỹo'uet da liỹa laloqojnaxanaxaqui, 'naaco':

—Da lo'ueenataxanaxac ñí'maq neeta'gue da piguim 'nejem ana pe'taxachigui na pan, quiyim aca 'aalo ỹalecqajanta' quecaua tres laloqojnaxaqui ca 'aríña, quiyim ỹahotaque pe'taxachigui cá'ogue ca laqaulatec.

₃₄Ỹa'xat ná'ogue najo so Jesús, ỹahote'e na laloqojnaxanaxaqui. Ca' quiyim se ỹa'ue ca laloqojnaxanaxaqui, ca' sqaica ca ỹa'xat. ₃₅Dajo 'ue, qaiyi ipaquichigui dá'maq la'qaatec só'maq letaxaỹaxanqajnec ñi qota'a, co'na' ỹiriñi:

₃₆Co'na'le, ca' so Jesús pil nqai'en so qomyipi. Ca' inoxonougui ca 'imec. Ca' so lapaxaguinatqaipi nqo'neu'a so'maxare, ca qohinaco':

—Choxochitema qomi' ca leloxoỹaxac aso peue se no'uen queso nanaxanqa'.

₃₇Co'na'le, ca' so Jesús 'naaco':

—Cá'maq ỹanñi asó'maq no'uen nanecse la, chaqaina ná'maq najo ỹale llaalec. ₃₈Ca só'maq nanaxanqa', ca chaqaina ná'maq seuqatalec 'laua. Ca só'maq no'uen nanecse la, ca' chaqaina ná'maq qomyipi mashic hueetaugui da lo'ueenataxanaxac ñi qota'a. Chaqai asó'maq peue se no'uen taỹaugui só'maq lalamaxareteripi so na'ỹaapec. ₃₉Ca só'maq pa'guenaxaua só'maq ỹanñi aca peue se no'uen, chaqaiso só'maq na'ỹaapec. Chaqai so naqataxanaxac taỹaugui ma' ime na 'laua. Ca só'maq naqataxanaripi chaqaiso so nelaatqaipi piguim laseripi. ₄₀Ca' dá'maq 'neeta quiyim qalapoon aso peue se no'uen, ca' qainaxañigui ca norec, ca qaỹavigaxat, ca' chaqaida 'neeta ma' ime na 'laua. ₄₁Ca' najo ỹale llaalec ila' ma'le na lelaatqaipi piguim laseripi quiyim lapoon quedá'maq lo'ueenataxanaxac ná'ogue ná'maq ỹo'uet ca lasauaxaset ca liỹa, chaqai ná'maq ỹo'ueetetac na se no'uen. ₄₂Ca' qainaxaugui ca nqatelaxanaxaqui norec. Ca' quiyi hua'ñi, ca' noỹen chaqai iquishquinta' naua louee quena nqui'ic. ₄₃Ca ná'maq ỹo'ueetetac dá'maq ỹahotaque ñi qota'olec, ca' 'ue ma'le na lauaq 'ec añi ra'aasa quiyim hueetaugui ma'le ca lo'ueenataxanaxac ñi leta'a. Ca' qamiri no'm 'yiiñii da na'xaỹaxanaxaguii, ca ¡'maxaraic quiyim na'xaỹaxañita!

₄₄Da lo'ueenataxanaxac ñi qota'a neeta'gue da piguim, da'maxare 'nejem aca lahi' ana plata qaishinñi quena 'laua. Quiyim ca qom iuanejlec aso lahi' ana plata, ca lotqai liỹa ỹoxojñi, ipacqajanchi'ñi ca loma'. Ca' ỹaatqajam 'xoic da netoonaxac. Ca pil, imen ná'ogue na louenec, ca' rishiujnaxana sojo 'laua.

₄₅Da lo'ueenataxanaxac ñí'maq neeta'gue da piguim, da'maxare qai'neeta 'nejem ca nemeentac, imitetaque acá'maq ỹaatqajam no'uen 'ueetqate, leenaxat perla. ₄₆Ca no'm 'ue aca iuanejlec 'xoic lesega'a, ca' pil. Ca imen cá'ogue ca louenqaipi, ca' rishiujnaxana cajo perla.

₄₇Qai'neeta dá'maq lo'ueenataxanaxac ñí'maq neeta'gue da piguim, da'maxare 'nejem ca naleguec qaỹalliguingui aca huaaxai. Ca' ỹaleque'ejta' ná'maq naleguecsec nallinyipi. ₄₈Ca' quiyim no'xagui cajo naleguec, ca cá'maq noqoinaxanyipi ỹauecta'a ca lqodoc ca huaxaỹaq. Ca' nqa'xanñi, nca'agui na nallin. Ca ná'maq no'uen, ca' ỹa'maxat caca lahi', ca' inaxauec ná'maq se no'uen. ₄₉Ca' chaqaida 'neeta ma' ime na 'laua. Nanac ma'le na nelaatqaipi piguim laseripi, quiyim naqata'a ná'maq se no'uen quená'maq lo'yaxanec. ₅₀Ca' qainaxañigui ná'maq hualoxonyipi cá'maq nqatelaxanqa' norec. Ca' yi hua'ñi, ca noỹen chaqai iquishquinta' naua louee quena nqui'ic.

₅₁Ca co'na'le, ca renataxano' so Jesús:

—¿Ỹaatqajam 'yiiñichigui dá'ogue dajo?

Ca saua'maxare 'neraco':

—Ajá'a, qami' qara'gaxala'.

₅₂Co'na'le, ca 'naaco' quesaua'maxare:

—Quiyim ca rapaxaguinataxanta'pegue na naqataxaquipi chicqo'ot so Moisés quena' napaxaguintapega dá'maq lo'ueenataxanaxac ñí'maq neeta'gue da piguim, ca ca'maxare chi ỹovireta'a quiyim 'ec lalamaxaret ca 'imec, ca ỹa'den naqatec cá'maq dalaxaic chaqai cá'maq ñauapec quená'maq la'maqatec.

₅₃Ca co'na' ime 'ue na raloqojnaxantapigui so Jesús, ca' ca'e yi'maxare. ₅₄Ca chi ỹovireta'a yí'maq lalamaxaret la'a'. Ca' quiyi, ca taañi rapaxaguinataxan cana lapoxoqui na judioipi na'ñi yi'maxare. Ca' na qomyipi 'xoic da le'laxa, ca 'naaco' quen:

—¿Nega'ỹo' cá'maq ỹachigoxota'gue ná'maq la'deenec dajo ỹale? ¿Negue' cá'maq 'neeto' quiyim ishit ỹo'uet na netanqaipi se qaiuanapega? ₅₅Ma' dajo llaalec so qo'paq lo'o José, chaqai late'e añi María, lqaỹa' ñi Jacobo, José, Simón, chaqai ñi Judas. ₅₆Chaqai naua lqaỹa' 'aalo nera'ñi najo, ỹalequesauguilo qomi'. Ca ¿negue' cá'maq chicqa'co' ná'ogue ná'maq ỹa'den?

₅₇Ca' vichiguiño' se qana'xaỹaxano' quen. Qam so Jesús 'naaco':

—Ná'ogue na qomyipi ỹaatqajam nqo'ta ca letaxaỹaxanqajnec ñi qota'a. Qam ná'maq chi la'aayaxauaripi chaqai ná'maq lalamaxaret lqaỹaripi, ca' se nqo'ta.

₅₈Ca' mesqai 'xoic ca ỹo'uet quená'maq se qaiuanapega huaugui nqai'en yi'maxare, ma' so'maxare se qoyiuelec quiyi'maxare.