Saua lapaxaguinatqa so Jesús napogue' ana la na nanecsec queso na'xa'a co'mataxaqui
1Ca 'uo' so na'xa'a co'mataxaqui quiyim so Jesús queetalgoto naua nanaxanqate'. Ca' saua lapaxaguinatqa nauatera'guit na lqopaaqa', ca rapogoxone' quena trigo, ca ỹa'gue' ana la. 2Ca ná'maq ỹalequetaugui na fariseoipi co'na' iuane'ta dajo, ca' qohinapega so Jesús:
—Ñaqai 'ajñi', nauá'maq rapaxaguinataxahi' ỹo'ueetesac dá'maq se qaỹa'maxaren qaỹo'uet quiyi na'xa'a co'mataxaqui.
3Qam so Jesús 'naaco' quesaua'maxare:
—¿Saqa' taxahilco' quen dá'maq 'neeto' na'le so nashi David co'na' 'ue so na'xa'a so'maxare chaqai saua nauegaxaua' qopate'? 4Na' so'maxare inoxonougui ñi lauo' ñi qota'olec, ca' ỹa'ic so paanyipi mashic shi'gue qoỹaanot ñi'maxare, só'maq se ishit 'ue ca qoỹaanem quiyim ỹa'ic, 'nejem so'maxare chaqai saua nauegaxaua', qainaata ná'maq letaxaỹaxanqajnec na qomyipi quena' qaretaxaỹa'pegue' ñi qota'a. 5Loqo'm ¿sqai taxahilco' quen na naqataxaquipi chicqo'ot so Moisés quiyim na netaxaỹaxanqajanqaipi ná'maq ro'ueenataxantac caso no'ueenaxanaxaqui, ca na'maxare se nco'matec queso na'xa'a co'mataxaqui? Qam dajo se nasauaxaset. 6Ca' ỹim shinac caqamiri quiyim quenajo 'ue dá'maq paguec lecaic queca chi no'ueenaxanaxaqui. 7Qamiri sqa 'yiiñiỹo' dá'maq reloqo'tegue yi naneretañi la'qaatec ñi qota'olec, 'naac: “Ỹim sahotaque quiyim 'xorenataxañii, ca' mesqaida 'ỹaañiuo qaỹavigaxat ca isecỹac rachitaxanataxanaxachii.” Ca' quetaxan 'yiiñiỹo' dajo, ca' se ishit quiyim viitaque quet ca lasauaxaset cá'maq qaica ca ỹasauaxat. 8Ma' najo ỹale llaalec 'ue nqai 'negue quiyim 'ue ca relaataxanlec quiyim qaỹo'uet queca na'xa'a co'mataxaqui.
Só'maq ỹale rashivita na lqai'laxat
9Ca co'na' so Jesús ca'e yi'maxare, ca' inoxonougui añi lapoxoqui na judioipi. 10Ca' hueete'eyi so ỹale rashivita da lqai'laxat. Ca ma' qaỹahotaque ca la'maqa' quiyim qaỹa'ue ca lasauaxaset so Jesús, ca qainato':
—¿Ỹa'maqachiguiño' qaỹomatec ca ralolaxaic queca na'xa'a co'mataxaqui?
11Ca' so Jesús 'naaco' quesaua'maxare:
—¿Nega'ỹo'ca caqamiri, no'm 'ue aca lalo qagreta ilamqa'ñigui aca ni'ỹa queca na'xa'a co'mataxaqui, mesqai quepegue', ca' naqajshiguim? 12Ca' ¿mese ỹapacauco' ca qom caca qagreta? Ca' vichiguiño' qaishit qaỹo'uet cá'maq ỹa'maqachiguiñi queca na'xa'a co'mataxaqui.
13Ca' so Jesús 'naaco' queso ỹale:
—Lamaxachirec na rqai'laxachi'.
Ca co'na' ỹalamaxatec, ca chaqa'ma' no'uenta 'nejem aso liỹa. 14Ca co'na'le, ca ta'oguiyi so fariseoipi, ca' retaxaỹapigui cá'maq la'maqa' quiyim ỹalauat so Jesús.
Dá'maq 'au na'qaataxaco' na'le so Jesús
15Ca co'na' ỹa'den dajo so Jesús, ca' ca'e yí'maq hueete'e. Ca 'xoic so qomyipi coỹare'tegue, ca so Jesús ỹomatec ná'ogue na ralolaxaiquipi. 16Chaqai 'naapega quiyim se ỹa'xat negue' so'maxare. 17Dajo 'neeto' na'le, qaiyi ipaquichigui dá'maq ỹa'xato' na'le so letaxaỹaxanqajnec ñi qota'a leenaxat Isaías, co'na' 'naac:
18Cajo cá'maq ilaatec, chaqaica cá'maq ica'acsec,
cá'maq ỹim yqo'ta, chaqaica cá'maq ñitoonta'pegue.
Ca'maxare sanagui ma'le ñi ñi'Espíritu,
qaiyi ỹa'xatem na ỹoreta'oguit qomyipi da sahotaque so'uet.
19Ca'maxare se nco'uaatac, chaqai se ỹaualqatari',
chaqai sqai qara'qaatape'ogalo caua la'qaatqa quena nayiquipi.
20Chaqai vire'ta se ỹaqaguit aca noqola late'e quiyim namaxagui,
chaqai se ỹo'mat ca ncoỹeraxanaxat quiyim chi nichitashiguim,
chi ỹovireta'a quiyim ỹa'yiñi dá'maq ỹa'maqachiguiñi lo'ueenataxanaxac.
21Chaqai ná'ogue na ỹoreta'oguit qomyipi 'ue da naquitaxac ma'le queca'maxare.
So Jesús qohintapega 'ue ca le'ec lecmaxaic
22Co'na'le, ca' qaỹauega'a so Jesús so ỹale 'ue so le'ec lecmaxaic, se neuanñi chaqai se retaqa. Qam so Jesús ỹomatec. Ca' so ỹale lotqai neuanñi chaqai 'vii naua la'qaatqa nqai'en. 23Ca' ỹaatqajam 'ue da le'laxa so qomyipi, ca 'naac:
—¿Peeta'a chaqaido' dajo da llaalec so nashi David?
24Qam co'na' 'xaỹa dajo so fariseoipi, ca 'naaco':
—Dajo ỹale ỹo'daauec na ne'ec lecmaxaiquipi, qam ỹahote'e da lquesaxanaxa so Beelzebú só'maq chi lashi na'maxare.
25Qam so Jesús ỹa'den dá'maq la'deenataxanaxague' saua'maxare, ca 'naaco':
—Canchaqaica nashillipi, no'm noỹoota'chi, ca' chi nco'ỹata', ca ca'maxare tai'a quiyim na'laañi. Chaqai ca na'a', loqo'm ca chi neuo' laseripi quiyim noỹoota'chi, ca' se ishit quiyim chaqaidaata 'neetari'. 26Ca' chaqaida qai'neeta 'neeta so na'ỹaapec quiyim 'ec chi no'deeteguelta', ca chi noỹoota'chi, ca ¿negue' cá'maq 'neeta quiyim chaqai 'neetari' se neme quet da lquesaxanaxa? 27Qamiri 'ñiỹac quiyim aỹim so'daauec na ne'ec lecmaxaic, sahote'e da lquesaxanaxa so Beelzebú. Ca no'm chaqaida 'neeta, ca ¿nega'ỹo' cá'maq ỹaanem da lquesaxanaxa ná'maq queeta'pegueto qamiri quiyim ỹo'daauec na'maxare? Ca' vichiguiño' chaqaina ná'maq ichoxote' qamiri quiyim o'miỹac. 28Qam ỹim so'daauec na ne'ec lecmaxaic, sahote'e da lquesaxanaxa ñi ne'Espíritu ñi qota'olec. Ca dá'maq 'neeta dajo quiyim mashic novitalo qamiri da lo'ueenataxanaxac ñi qota'a ma' ỹoiquentac ná'ogue najo.
29Ma' ¿negue' quet cá'maq 'neeta quiyim 'ue quet ca inoxonaugui ca lauo' ca ỹale quesaxanaxaic ca rouootaxana'gue na louenqaipi, no'm sqai 'au coñirañi? Ca no'm chaqaida 'ne'tegue, ca qaigueme ishit rouootaxana'gue ca louenqaipi.
30Cá'maq noỹootec caỹim, ca' ñpa'guenaxaua. Chaqai cá'maq se ỹapoonaxanaxaua, ca' chaqaica cá'maq iuagaxatac cá'maq so'ueetetac.
31Ca vichiguiño' shinac caqamiri, na qomyipi ishit qaỹapalaxat ná'ogue na lasauaxaseteripi chaqai ná'ogue ná'maq ỹa'xat se no'uen, qam cá'maq retaxaỹa'guit so Espíritu Santo, ca' se ishit qaỹapalaxat ca lasauaxaset. 32Chaqai canchaqaica quiyim 'ue ca ỹa'xat se no'uen quenajo ỹale llaalec, qaishiteta qaỹapalaxat ca lasauaxaset. Qam cá'maq retaxaỹa'guit so Espíritu Santo, se qaỹapalaxat quenajo 'laua loqo'm queca liỹa 'laua ñaqa naata.
Aca qo'paq qaỹa'den queda laỹaxac
33No'm no'uen aca qo'paq, ca' lo'daxarai ana la. Chaqai no'm se no'uen aca qo'paq, ca' se lo'i' ana la. Ma' aca qo'paq qaỹa'den cana la. 34¡Qamiri nanaic llaalqaipi! ¿Negue' quet ca 'neeta quiyim lo'yaxanqa quet caua ra'qaataxahi quiyim qamiri hualoxona'? Ma' ñi qodap ñí'maq naatougui cá'maq hueetagui añi qare'taxanata. 35Cá'maq no'uen ỹale, ca lo'yaxanqa naua la'qaatqa, ma' cá'maq no'uen hueetagui añi le'taxanata. Chaqai ca se no'uen ỹale, ca' se no'viiñi naua la'qaatqa, ma' cá'maq se no'uen hueetagui añi le'taxanata. 36Ca' ỹim shinac caqamiri queca na'xa'a ma' qaimit ná'ogue najo, ma'le, ca' ná'ogue na qomyipi chi ỹa'xat ná'maq chi la'qaatqaipi se retane'uegue quiyim ỹa'xat. 37Ma' quecá'maq 'neeta ca ra'qaachiqui' ma' qaimit qami', ca' re'oq quiyim qaỹa'ue ca rasauaxashichi', loqo'm se qaỹa'ue.
Na hualoxonaq qomyipi ỹahotaque quiyim qaỹo'uet ca netanec se qaiuanapega
38Ca 'uo' so fariseoipi chaqai quená'maq rapaxaguinataxanta'pegue na naqataxaquipi 'neraco' na'le queso Jesús:
—Qami' napaxaguinataxanaq, sahoqotaque quiyim seuanqachigui aqami' quiyim 'viichi' ca netanec se qaiuanapega.
39Ca' so Jesús 'naaco' quesaua'maxare:
—Na qomyipi hualoxonyipi chaqai sqai huelec ñi qota'olec, na'maxare ỹahotaque quiyim qaỹo'uet ca netanec se qaiuanapega. Qam tot qoỹaanem ca netanec, ta'ta'a so netanec na'le viichigui so qota'a letaxaỹaxanqajnec leenaxat Jonás. 40Ma' dá'maq 'neeto' na'le so Jonás co'na' hueetagui na lauel so nallin lodegaxat tres na'xata' chaqai tres piri, ca' chaqaida 'neeta ma'le najo ỹale llaalec hueetaugui ma'le na lauel na 'laua tres na'xata' chaqai tres piri. 41Ca' so qomyipi na'ño' na'le yi na'a' lodegaxat Nínive, so'maxare nachajñi ma'le quecajo na'xa'a ma' qaimit ná'ogue na qomyipi, ca ỹa'ue ma'le ca nouaxanaxaset na'maxare. Ma' só'maq na'ñi yi Nínive ỹaxañiñi naua lanatqa na' qaỹa'xatem da la'qaatec ñi qota'a quesó'maq la'qaataxanqajnec leenaxat Jonás. Ca' nagui hueetauguilo qamiri dá'maq paguec lecaic queso Jonás. 42Qai'neeta aso nashi na'gue da 'guiñi, aso'maxare ne'laxashiguim quecajo na'xa'a ma' qaimit ná'ogue na qomyipi. Ca aso'maxare ỹa'ue ma'le ca nouaxanaxaset najo qomyipi. Ma' aso'maxare chicqa'a na'le yí'maq paguec qoỹoqo'ta 'laua quiyim na'xaỹaxana ná'maq la'deenec so Salomón. Qam nagui hueetañiguilo qamiri dá'maq paguec lecaic queso Salomón.
Cá'maq ne'ec lecmaxaic rapila ca la'a'
43Na ne'ec lecmaxaic quena' eec, ca'e ca qom, ca' hueetalec na 'laua qaica qom imitetaque ca nco'matqa'. Ca' quena' sqaica ca ỹanata, ca' ra'deenataxantac: 44“'Maxaraic quiyim ỹim sopila cá'maq sachicqaugui.” Ca quena' ỹovira'a, ca iuanejlec sojo ỹale 'nejem ca 'imec co'chiichigui, qai'lequeta, chaqai qaỹa'maxachichiguiñi. 45Ime, ca' pile'tegue que'ogalo saua siete liỹa' paguec qa'uaiqa queso'maxare. Ca saua'que tarougui so ỹale. Ca na'le, ca' so ỹale paguec la'aaxa dá'maq 'neetari' quecá'maq 'auaxaic no'ueenataxac. Ca' chaqaida 'neeta ma'le najo hualoxonaq qomyipi.
Aso late'e chaqai saua lqaỹa' so Jesús
46Co'na' so Jesús ñaq retaqatapougui so qomyipi co'na' novirero aso late'e chaqai saua lqaỹa'. Pa'aasauec, ỹahosaque retaxaira'pegue' so'maxare. 47Ca 'uo' so ỹa'ue la'xaỹaxac so Jesús, 'naaco':
—Ada qachii'i' chaqai daua rqaỹachi' pa'aasauec, ỹahosaque retaxaira'pegue' aqami'.
48Qam so'maxare 'naaco' quesó'maq nodouo da la'xaỹaxac:
—¿Negue' acá'maq ỹate'e? chaqai ¿negue' cauá'maq ỹaqaỹa'?
49Ca' ỹegouguilo saua lapaxaguinatqa, ca 'naaco':
—Nauajo ná'maq 'ec ỹate'e chaqai ỹaqaỹa'. 50Ma' canchaqaica quiyim ỹo'uet dá'maq ỹahotaque ñi ita'a qota'olec neeta'gue da piguim, ca chaqaica cá'maq ỹaqaỹa ỹale, ỹaqaỹa 'aalo, chaqai ỹate'e.
