Lucas 3

₁Ca co'na' ỹovite' quince ñaxari da lo'ueenataxanaxac só'maq ỹaatqajam lashi na nashillipi leenaxat Tiberio, qam so Poncio Pilato reloqota'a yi Judea, ca' so Herodes reloqota'a yi Galilea, chaqai so lqaỹa Felipe lotqai reloqota'a yi Iturea chaqai Traconite, chaqai so Lisanias lotqai reloqota'a yi Abilinia. ₂Qam hueetouguilo sauajo na'xata' co'na' so Anás chaqai so Caifás ñaq la'gaxalate' na letaxaỹaxanqajanqaipi na qomyipi quena' qaretaxaỹa'pegue' ñi qota'a co'na' ñi'maxare 'naapega so Juan, só'maq llaalec so Zacarías, huaalec yi 'laua sqaica qom. ₃Ime, ca' eec, queeta'gue ná'ogue ná'maq sqoỹoqaque caso lachiugue Jordán quiyim ra'qaataxantapeguem na qomyipi quiyim ỹalate' naua no'ueenataxaco, chaqai qanachilaxan, qaiyi qaỹapalaxate' naua lasauaxasete'. ₄Ca' dajo ipaquichigui da la'qaatec so la'qaataxanqajnec ñi qota'a, leenaxat Isaías, co'na' ỹiriñi da la'qaatec:

₇Ca' na qomyipi co'na' ỹovire'oga so Juan quiyim ỹahotaque qanachilaxan, ca so'maxare 'naapego' quen:

—¡Qamiri nanaic llaalqaipi! ¿Nega'ỹo' ca ra'qaataxanema qamiri quiyim qaiyi qohite' qamiri queda lecaic da nouaxanaxaset najo nepalata? ₈Ỹaatqajam na'maxachito' ma'le, qaiyi re'oq quiyim ỹaatqajam lachii' naua no'ueenataxagohi, chaqai sqai hueetapiguilo qavilyi quiyim 'ñiỹac: “Qomi' chaqaiqomi' llaalqa so Abraham”. Vichiguiño' shinapegalo qamiri nagui quiyim ñi qota'olec ishit quiyim ỹachigoxotaugui najo qa' ca llaalqaipi so Abraham. ₉Aca qai'pe mashic shi'gue ỹa'maqatañi quiyim qaỹouaxañi'ñot na qo'paqsat, ca' ná'ogue ana qo'paq se no'uen ana la, ana'maxare qaỹouaxanlec. Ime, ca' qainaxañigui ca norec.

₁₀Ca' so qomyipi renataxan, 'naaco':

—Qam ¿nega'ỹo' ca shinqata qomi'?

₁₁Ca' so Juan 'naaco':

—No'm 'ue ca dos caua nelamaxaqui', ca ỹaanem ca 'oonoqui' cá'maq sqaica ca nelamaxaqui. Chaqai cá'maq 'ue ca loq, ca' ỹachit ca sqaica ca loq.

₁₂Ime, lotqai ná'maq ỹacona'piguit ana nishiuete so nashi na'ñi yi Roma, na'maxare anac quiyim qanachilaxan. Ca' qainatetac so Juan queca 'neeta:

—Qami' napaxaguinataxanaq, qam qomi', ¿negue' ca shinqa'tegue?

₁₃Ca' so Juan 'naaco':

—Ma' naqachii aca lishiuetenaxanqate na qomyipi, qam se napacalec nqai'ñii añi roỹaxanaque ca nashi.

₁₄Lotqai anac so nalliripi so nashi, ca qainatetac so'maxare, qohinac:

—Qam qomi', ¿negue' ca shinqata?

Ca' so Juan 'naaco':

—Se ỹa'maxañi quiyim 'ue ca nouorii, chaqai sqaica ca yiñitalec, chaqai taachiguiñi quiyim 'viichii ca lliiteguelec ca lasauaxaset. Añí'maq nishivichii, chaqañiita 'maxariñita.

₁₅Ca' na qomyipi ỹaatqajam pe'eeta'a so'maxare, 'neetapigui lauel quiyim so Juan chaqaiso' so qanela' nashi nca'laxaqui. ₁₆Qam so Juan 'naapega sá'ogue so qomyipi, 'naaco':

—Aỹim llic nagui ñachilaxañiguilo qamiri na huaxaỹaq, qam 'ue na coỹaretailec, na'maxare nachilaxanguilo qamiri ma'le ca Espíritu Santo chaqai ca norec. Chaqai na'maxare paguec da lquesaxanaxa, sqai 'nejem aỹim, chaqai aỹim sqa saiguit quiyim sosoorec naua lapelate' lequeete'. ₁₇Na'maxare lo'qoota'a na lochigoxosoxonaxat, qaiyi ỹochigoq na trigo quiyim ỹoỹoota'oga ana la chaqai na lovi. Ime, ca' ỹoỹoota'oga na la na trigo, illaañigui aca lahi'. Ca' na lovi ỹavigaxat, inaxañigui ca norec sqai 'om.

₁₈Ca' 'eda da 'neeta da letaxaỹaxac, chaqai 'xoic na liỹa nelaataxanaxaquipi mashic ỹaanec so Juan co'na' ỹa'xatetapeguem ná'ogue na qomyipi da na'qaatec chicqaugui da nca'laxa. ₁₉Ca' so Juan retaxaỹa so nashi Herodes sauaxat loua aso Herodías só'maq loua so lqaỹa Felipe, chaqai so liỹa loiquipi se no'uen so'maxare. ₂₀Qam so Herodes se na'xaỹaxan. Ta'ta'a noquigaxatec ỹo'uet da se ỹa'maxañi co'na' coñi' so Juan, ỹanaugui aso ncoñiitaxanaxaqui.

₂₁Ca co'na' saqa' qaicoñi' so Juan, ca so'maxare nachilaxantac ná'ogue na qomyipi, chaqai so Jesús qai'neeta qanachilaxan. Ca so'maxare co'na' ñaq nqouagaxaintac, ca na piguim huachigui. ₂₂Ca' so Espíritu Santo naỹa'ña so'maxare, 'nejem na co'toco' ỹaatqajam re'qoota. Ime, ca 'maqot na piguim so na'qaatec, 'ne'tegue:

—Qami' maq ỹaatqajam qami' ỹalamaxat ỹaalec, qami' ỹauochaxat, aỹim ỹaatqajam ñitoonta'pegue qami'.

₂₃So Jesús co'na' ỹovite' treinta ñaxari, ca taañi ro'ueenataxan. So'maxare qohintapega llaalec so José, ca' so José leta'a so Elí, ₂₄ca' so Elí leta'a so Matat, ca' so Matat leta'a so Leví, só'maq llaalec so Melqui, ca' so Melqui leta'a so Jana, só'maq llaalec so José, ₂₅ca' so José leta'a so Matatías, ca' so Matatías leta'a so Amós, ca' so Amós leta'a so Nahum, ca' so Nahum leta'a so Esli só'maq llaalec so Nagai, ₂₆ca' so Nagai leta'a so Maat, ca' so Maat leta'a so Matatías, ca' so Matatías leta'a so Semei, ca' so Semei leta'a so José só'maq llaalec so Judá, ₂₇ca' so Judá leta'a so Joana, ca' so Joana leta'a so Resa, ca' so Resa leta'a so Zorobabel, ca' so Zorobabel leta'a so Salatiel, só'maq llaalec so Neri, ₂₈ca' so Neri leta'a so Melqui, ca' so Melqui leta'a so Adi, ca' so Adi leta'a so Cosam, ca' so Cosam leta'a so Elmodam, só'maq llaalec so Er, ₂₉ca' so Er leta'a so Josué, ca' so Josué leta'a so Eliezer, ca' so Eliezer leta'a so Jorim, só'maq llaalec so Matat, ₃₀ca' so Matat leta'a so Leví, ca' so Leví leta'a so Simeón, ca' so Simeón leta'a so Judá, ca' so Judá leta'a so José, ca' so José leta'a so Jonán, só'maq llaalec so Eliaquim, ₃₁ca' so Eliaquim leta'a so Melea, ca' so Melea leta'a so Mainán, ca' so Mainán leta'a so Matata, só'maq llaalec so Natán, ₃₂ca' so Natán leta'a so David, ca' so David leta'a so Isaí, ca' so Isaí leta'a so Obed, ca' so Obed leta'a so Booz, ca' so Booz leta'a so Salmón, só'maq llaalec so Naasón, ₃₃ca' so Naasón leta'a so Aminadab, ca' so Aminadab leta'a so Aram, ca' so Aram leta'a so Esrom, ca' so Esrom leta'a so Fares, ca' so Fares leta'a so Judá, ₃₄ca' so Judá leta'a so Jacob, ca' so Jacob leta'a so Isaac, ca' so Isaac leta'a so Abraham, ca' so Abraham leta'a so Taré, ca' so Taré leta'a so Nacor, ₃₅ca' so Nacor leta'a so Serug, ca' so Serug leta'a so Ragau, ca' so Ragau leta'a so Peleg, ca' so Peleg leta'a so Heber, só'maq llaalec so Sala, ₃₆ca' so Sala leta'a so Cainán, ca' so Cainán leta'a so Arfacsad, ca' so Arfacsad leta'a so Sem, ca' so Sem leta'a so Noé, só'maq llaalec so Lamec, ₃₇ca' so Lamec leta'a so Matusalén, ca' so Matusalén leta'a so Enoc, ca' so Enoc leta'a so Jared, ca' so Jared leta'a so Mahalaleel, ca' so Mahalaleel leta'a so Cainán, ₃₈ca' so Cainán leta'a so Enós, ca' so Enós leta'a so Set, ca' so Set leta'a so Adán, só'maq llaalec ñi qota'olec.