Lucas 2

₁Qam quesaua na'xata', ca so ỹaatqajam lashi na nashillipi, leenaxat Augusto, so'maxare ỹaanec so la'qaatec quiyim ná'ogue na qomyipi qoỹiro na leenqateripi. ₂Qam sojo 'avichiguiñi neraxanaxac viichigui so na'xa'a co'na' ñaq reloqota'a yi 'laua Siria so nashi Cirenio. ₃Ca ná'ogue na qomyipi quepegue' na chicqochi'ñi, qaiyi qoỹiro. ₄Ca' vichiguiño' so José chicqochi'ño' yi na'a' Nazaret huaugui yi 'laua Galilea. Ca nqo'na yi na'a' leenaxat Belén huaugui yi 'laua Judea yí'maq ne'xaỹoqsoqo'o' so nashi David, ma' so José chaqa chigoxougui na lauo' so David. ₅Ca quepegue' yi Belén quiyim qoỹiro, liỹaatac aso María asó'maq ỹahotaque quiyim loua, qam aso'maxare 'manaxai. ₆Ca co'na' mashic neesa'ñi yi Belén, ca ỹovito' so laloqo' quiyim co'o aso María. ₇Ca hua'ño'yi co'na' ne'qaañi so 'auaxaic llaalec. Ca lepataxañigui so lepataxaqui, ime, ca' illaañigui aso lqui'ỹaxaqui na iseripi neloipi, ma' sqaica ca lomate' saua'maxare quecá'maq ỹaatqajam 'imec nelaqsoqo'.

₈Ca' quiyi sqoỹoqaque quiyi Belén 'uo' so qomyipi reloqota'a ana lalo qagreta, hueetauec quiyi no'ueenaxa queso pe. ₉Ca' chi re'laqataxanta quiyim nachaxan so lelaatec piguim le'ec ñi qara'gaxala'. Ca dá'maq lauaq ñi'maxare ỹaatqajam coỹarelgoto saua'maxare, ca ỹaatqajam 'xoic da lqolonqa'. ₁₀Qam so nelaatec 'naaco':

—Se ro'chii, ma' ỹim ñoda'alo qamiri da no'uen ra'xaỹaxaguii. Ma' da'maxare ỹo'uet ma'le ca netoonaxac ná'ogue na qomyipi. ₁₁Da'maxare 'neetayi: nagui ne'qaañi quiyi na'a' ne'xaỹoqsoqo' so David cá'maq qaỹahotaque quiyim rca'laxaguii, leenaxat Cristo, ca' cá cá'maq qara'gaxala'. ₁₂Ca' 'eda ma'le da retañiguii 'neetayi: huañijlec ma'le ca noctoqui' qalepateta'gue queca lepataxaqui', hueetañigui nqohin aca lqui'ỹaxaqui na iseripi neloipi.

₁₃Ca quiyi lotqai nachaxan so liỹaripi nelaatqaipi piguim laseripi, ỹaatqajam 'xoic so'maxare ro'ueenaxantalec ñi qota'olec, 'naaco' quen:

₁₅Ca so nelaatqaipi co'na' pilshiguim queda piguim, ca só'maq qagreta lo'ollipi retaqatecta', 'nerecta':

—'Maxaraic qolaqpegue' yi Belén, sa'ajanaxanaxa chi negue' ca 'neeta dá'maq qaỹa'xatetac, dá'maq ỹa'xatema qomi' ñi qara'gaxala'.

₁₆Ca' ỹaatqajam iỹala' quiyim taatquera saua qomi'. Ime, ca co'na' ỹovite', ca iuanteta aso María, chaqai so José, chaqai'neeta so noctoqui' hueetañigui aso lqui'ỹaxaqui na iseripi. ₁₇Ca co'na' mashic qaiuana, ca qaỹa'xatetac da la'qaatec so nelaatec co'na' ỹa'xatetac so noctoqui'. ₁₈Ca ná'ogue ná'maq 'qaachigui dajo na' qaỹa'xatetac, ỹaatqajam 'ue da le'laxa. ₁₉Qam aso María ỹa'maxat cañi le'taxanata dá'ogue dajo, chaqai ỹaatqajam naloqochintac da'maxare. ₂₀Ca' so qagreta lo'ollipi co'na' ime, ca pil ỹaatqajam netoontagui, chaqai ỹo'ueentac ñi qota'a, ma' ná'maq 'qaachigui chaqai ná'maq ỹauanchirigui ỹaatqajam ipaquichigui sá'ogue só'maq qaỹa'xat.

₂₁Ca co'na' ỹovite' saua ocho na'xata', ca qaỹa'uo' so netanaxaset na loshicmaxa so noctoqui'. Ime, ca qoỹanegue leenaxat Jesús, ma' dajo neenaxat dá'maq shi'gue qaỹa'xatem aso María queso lelaatec ñi qota'olec co'na' saqa' 'man aso'maxare. ₂₂Ca co'na' mashic ỹovita so na'xa'a quiyim saua María chaqai so José quiyim ỹo'ueete' da nelaataxanaxac dá'maq chicqo'tot so Moisés quiyim nco'taxate', ca' qaỹodou'a yi na'a' lodegaxat Jerusalén so noctoqui' quiyim qoỹaanot ñi qara'gaxala'. ₂₃Ca' saua'maxare ỹo'ueete' dajo, ma' chi lelaataxanaxac ñi qara'gaxala' naneretañi, 'neetasa': “Ná'ogue ma'le na 'auaxaic ñaalec qoỹaanot ñi qara'gaxala'.” ₂₄Ime, ca' que' saua'maxare, ca qaỹa'uo' aso nachitaxanataxanqate qaỹavigaxat. Ca' qaipacqajanchigui da lelaataxanaxac ñi qara'gaxala' 'neetasa': qoỹaando' ma'le caua dos coviguiñigo', loqo'm caua dos llaalqa na coviguiñicoqui'.

₂₅Ca' quesojo ñaaxa neeta'ñi yi Jerusalén so ỹale, leenaxat Simeón. So'maxare ỹaatqajam huagaxaraic, chaqai ỹa'maxate'tegue ñi qota'a, chaqai nauaantaque ca na'xa'a quiyim ime nqohin da le'xoric na Israel llaalqaipi. Qam so'maxare hueeto'ot so Espíritu Santo. ₂₆Ca chaqaiso so ỹa'deenaxanaxanegue quiyim se imeho da nachaalataxac quiyim saqa' iuana ca nashi nca'laxaqui cá'maq nela' ñi qara'gaxala'. ₂₇Ca' so Espíritu Santo ỹauec sojo ỹale quiyim tau'a nqai'en aso no'ueenaxanaxaqui late'ogue'. Ca' saua leta'al so noctoqui' Jesús co'na' qaỹodou'a añi no'ueenaxanaxaqui, qaiyi qaỹo'uet ná'maq qoỹeretañi nelaataxanaxaquipi, ₂₈ca so Simeón ỹacona so noctoqui', qa'aal'ot. Ime, ca' ỹo'ueentac ñi qota'a, 'naaco':

₃₃Ca' so José chaqai aso late'e so Jesús ỹaatqajam 'ue da le'laqa' quená'maq 'qaachirigui la'qaatqaipi so Simeón co'na' retaqateguelec so noctoqui'. ₃₄Ca so Simeón ỹaanem da no'uen la'qaatec so noctoqui'. Ime, ca 'naapega aso María só'maq late'e so Jesús, 'naaco':

—'Ajñi', ná'taq noctoqui' tai'a ma'le quiyim 'xoic ca huaañi nqai'en chaqai ca nachaalataxanñi quena Israel llaalqaipi. Na'maxare chaqaina na netanec quiyim ỹaatqajam 'xoic ma'le ca sqai huelec, ₃₅ca' qaiyi qaỹa'den ca hueetagui añi le'taxanata quiñi 'óna qom. Qam qami' ma'le quedá'ogue dajo 'nejem ca lecat quiyim qaỹa'yigui añi re'taxanata'e'.

₃₆Chaqai hueeta'ño'yi aso 'aalo mashic la'qaataxanqajna ñi qota'a. Aso'maxare mashic ỹaatqajam qo'xoỹom, leenaxat Ana. Aso'maxare llaale so Fanuel, chicqaugui so llaalqaipi so Aser. Qam aso'maxare 'óno' na' llaq nequetegaxai, qam ỹovite' siete ñaxari quiyim reloqota'guit ca loua. ₃₇Qam nagui aso'maxare mashic ỹovite' ochenta y cuatro ñaxari quiyim pa'ỹe. Chaqai ỹaatqajam sqai ca'e aso no'ueenaxanaxaqui, ỹo'ueentac ñi qara'gaxala' quenaua na'xatari chaqai naua piri, ỹo'ueetetac da nqouagaxainaxac chaqai nqopaaqachitetac. ₃₈Ca aso Ana liỹa ỹalequetaho quesojo na'xa'a. Ca' co'na' ime dá, ca ỹaantacot da na'aachicyaxac ñi qota'a, ca ỹa'xatetac so noctoqui' Jesús, ra'qaataxantapeguem ná'ogue na qomyipi ná'maq ỹahotaque quiyim ca na'xa'a quiyim ỹaatqajam qaỹosouec yi Jerusalén.

₃₉Ca co'na' mashic ime qaỹo'uet ná'ogue na naneretañi lelaataxanaxaquipi ñi qara'gaxala', ca saua'maxare, ca piltegue da Galilea, querepegue' yi ỹaatqajam la'aate' quiyi na'a' Nazaret. ₄₀Hua'ñi, ca so noctoqui' noquiiquetashiguim da llaaxa, chaqai da lquesaxanaxa, chaqai da la'deenataxanaxac. Ca' ñi qota'a ỹaatqajam ỹaanem so'maxare da lqouagaxa.

₄₁Ca' saua leta'al so Jesús naua'que naua ñaxari taasa'pegue da Jerusalén quena' ỹovire'oga so laloqo' quena' qaỹo'leenta'a so na'xa'a co'na' qoyique'e yi Egipto. ₄₂Ca so Jesús co'na' mashic ỹovite' doce ñaxari. Ca saua'que saua'maxare taategue da Jerusalén, ma' chi no'ueenataxac quena' ỹovire'oga sojo na'xa'a lapoxoqui na qom. ₄₃Qam co'na' pilac so qomyipi co'na' ime so lapoxoc, ca' so noctoqui' Jesús no'ueena'ñi yi Jerusalén. Qam aso late'e chaqai so José se qaỹo'leente so'maxare. ₄₄Ma' qaipetetapega so Jesús quiyim 'ue ca liỹaatac queso qomyipi. Qam mashic ỹovi' 'óna na'xa'a quiyim queete' saua'maxare, co'na' qaimitetapigui sá'ogue so neuo' laseripi chaqai so nauanatqaipi, ₄₅qam se qaỹanata so'maxare. Hua'ñi, ca saua'maxare piltegue da Jerusalén quiyim imijtegue.

₄₆Ca co'na' mashic ỹovirerec saua tres na'xata', ca' qaỹanata so'maxare, hueetaugui aso no'ueenaxanaxaqui late'ogue', nqa'xantañi, reloqotaugui só'maq rapaxaguinataxanta'pegue na nelaataxanaxaquipi, na'xaỹaxantapega chaqai 'uo' na nenataxanaxaquipi. ₄₇Ca ná'ogue ná'maq na'xaỹaxantapega so'maxare ỹaatqajam 'uo' da le'laxa queda la'deenataxanaxac, chaqai quiyim ỹaatqajam ỹa'den quiyim ichoxot ná'maq qarenataxanta'pegue. ₄₈Ca' saua leta'al co'na' idaanda'a so'maxare, ca ỹaatqajam i'laxai'. Ca aso late'e 'naapego' so'maxare, 'naaco':

—Qami' ỹaalcolec, ¿chi'neco' 'ñitetegue coqomi' dajo? 'Ajñi' da qataa'i' chaqai aỹim ỹaatqajam 'ue da qareuogoxo quiyim semitqataque qami'.

₄₉Ca' so Jesús 'naaco':

—¿Chi'neco' ma' michitaque aỹim? ¿Sqa 'yiiñiỹo' quiyim aỹim squelolta'pegue' na lo'ueenataxanaxaquipi ñi ita'a?

₅₀Qam saua'maxare se ỹa'yiinchiguit da la'qaatec so'maxare.

₅₁Hua'ñiyi, ca pil so'maxare, queuguilo saua leta'al, taategue da Nazaret. Ca' so'maxare queetalec quiyim na'xaỹaxane'talo saua leta'al. Qam aso late'e ỹaatqajam ỹa'maxat cañi le'taxanata dá'ogue dajo. ₅₂Ca' so Jesús noquiiquetashiguim da llaaxa chaqai da la'deenataxanaxac. Ca' ñi qota'a ỹaatqajam ỹa'maxarenta so'maxare, chaqai ná'ogue na qomyipi.