Lucas 15

₁Ná'ogo' na sauaqhuaiquipi chaqai na ỹacona'piguit ana nishiuete so nashi quiyi Roma, nqo'neetau'a so Jesús, ỹahotaque na'xaỹaxana. ₂Ca' quedajo, so fariseoipi chaqai ná'maq rapaxaguinataxanta'pegue na naqataxaquipi, queeteguelec se no'uen na ỹa'xatetac queso'maxare, 'naaco':

—Dajo ỹale ỹacoñi'chiguit na sauaqhuaiquipi, chaqai lqui'ỹaxauaripi na'maxare.

₃Ca' so Jesús ỹa'uo' so raloqojnaxana, 'naaco':

₄—¿Negue' cá caqamiri, no'm cien aca lalo qagreta, ca 'ue aca 'oono'lli' na'laañi, mesqai po'an aca noventa y nueve quena no'ueenaxa, ca' idaanaque acá'maq na'laañi, vire'to' ma' ỹanata? ₅Ca noma' ỹanata, ca illaalec na lallaac, ca ỹaatqajam ỹa'maqachiguiñi. ₆Ca' ma' ỹoviro queca la'a', ca lapoonta' ca namigollipi chaqai ca la'aayaxauaripi. Ca' 'naapega: “'Maxaraic qamiri ñitoonaxaua', ma' mashic sanata añi ilo qagreta na'laañi.” ₇Ca' ỹim shinac chaqai 'nejem queda piguim ỹaatqajam 'xoic ca toonaxac quiyim 'ue ca qom sauaqhuaic netacocha queca noventa y nueve qomyipi 'maxaraic se ỹouen quiyim netacocha.

₈Loqo'm ¿negue' aca 'aalo quiyim hueeto'oto caua diez chiróla, ca 'ue aca na'laañi, mese copata'a aca lcoỹeraxanaxaqui, ca' i'lec ca la'a', qam ỹaatqajam 'xoic da letelaxa ra'iite'e vire'to' ma' ỹanata? ₉Ca' ma' ỹanata, ca lapoonta' na namigallipi chaqai na la'aayaxaua 'aallipi, ca 'naapega: “Netoonaxauahi aỹim, nagui mashic sanata ayí'maq ỹam chiróla na'laañi.” ₁₀Ca' ỹim shinapegalo qamiri ỹaatqajam 'ue qai'neeta da netoonaxac ná'maq qota'a lelaatqaipi piguim laseripi, quena' 'ue ñi netacocha quena sauaqhuaiquipi.

₁₁So Jesús qai'neeta 'naac:

—'Uo' so ỹale 'vio' saua dos llaalqa. ₁₂Ca' so na'aasa quesaua'maxare 'naapego' so leta'a: “Qami' ita'a, nañaañirim dá'maq qatqajañisari' quiyim taalec aỹim isallaxa.” Ca' so leta'a ỹasectaqchigui da lesallaxa quesaua'maxare. ₁₃Ca co'na' saqa' vite' saua na'xata', ca so ñaalec na'aasa imen sá'ogue só'maq chi louenec. Ca' aso laseuete i'xat, quepegue' so liỹa 'laua. Ca' quiyi, ca chi iualaxain aso lam, chaqai nalecqajantaugui na se no'uen da llicyaxac. ₁₄Ca co'na' imeho sá'ogue aso lam, ca novi' so nqopaaxa lodegaxat queso neetalec 'laua. Ca' quiyi, so'maxare ỹaatqajam ỹoviro'ot da lqopaaxa. ₁₅Ca' eec imitaque ca lo'ueenatec, ca quepegue' so ỹale chi la'a' sojo 'laua. Ca' sojo ỹale ilata só'maq na'laua quiyim reloxaỹa'a nqai'en aso lalo cooshipi. ₁₆Ca' so'maxare ỹaatqajam 'ue da lishoxo quiyim ỹa'ic, ca' quema' quená'maq map ỹa'queetac so cooshipi, qam qaica ca ỹaanem. ₁₇Ca' quiyi, ca ra'deenataxantac, 'naaco': “¡Ỹaatqajam cá'ogue ca ro'ueenataxantac queca la'a' ca ita'a ỹaatqajam se ỹouen na loq, qam ỹim quena seueta'ñi yalauat na ỹoqopaaxa! ₁₈Aỹim sopila ma'le yi la'a' ca ita'a. Ime, ca' shinapega ma'le, shinaco': Qami' ita'a, ỹim 'uo' da ỹasauaxaset hueeto'ot ñi qota'olec chaqai caqami'. ₁₉Ca' vichiguiño' nagui sqa taiguit quiyim 'ñirapiguiỹa' ỹim qachaalqui'. Ta'ta'a quiyim 'ñi'sahic relaachiqui'.” ₂₀Ca' quiyi, ca' eec, pila yi la'a' so leta'a.

Ca co'na' ñaq qoỹoqo'chiguit, ca so leta'a ỹauañi'chiguit so'maxare. Ca' ỹaatqajam 'uo' da le'xorenataxanaxa. Ca' ne'guenta ca'guit. Ca co'na' ỹovichiguit, ca' qa'aalegue chaqai nqo'goq. ₂₁Ca' só'maq llaalec 'naaco': “Qami' ita'a, aỹim 'uo' da ỹasauaxaset hueeto'ot ñi qota'olec chaqai qami'. Ca' vichiguiño' sqa taiguit nagui quiyim 'ñirapiguiỹa' ỹim qachaalqui'.” ₂₂Qam so leta'a 'naapego' so lelaatqaipi, 'naaco': “Chaqa'ma' coñiỹalo caua no'viiñi noho, ca' ỹañiñi nqai'ñii, chaqai ỹanñi nqai'ñii aca lichicshaqate chaqai caua lapelate'. ₂₃Ime, ca' naviguiuo cá'maq ỹaatqajam 'uegaxasaq huaqui llaalec, ca' lauachii. Ime, ca ¡squi'ỹaq, so'ueetaq ca qaremaqachic! ₂₄Ma' dajo ỹaalcolec mashic tot qaica, qam liỹa nca'leuec. Da'maxare mashic na'laañi, qam mashic sanataxa.” Ca' qaỹo'uet sojo nemaqachic.

₂₅Qam ñaqai hueeta'oga na no'ueenaxa só'maq ỹi llaalec. Qam co'na' rapilo, ca mashic ipalatau'a yi la'a', ca 'qaatapegueu'a so neviiguellipi chaqai so rasotaxaripi. ₂₆Ca' roỹaxana so 'óna queso ne'naqaipi, ca inatetac chi negue' ca 'em qaỹo'uet dajo. ₂₇Ca só'maq ne'nec 'naaco': “Ñi rqaỹa'e' novi', vichiguiño' ñi qata'ahi relaataxanlec quiyim qaỹalauat so ỹaatqajam 'uegaxasaq huaqui llaalec, ma' ñi'maxare novi' 'maxaraic chaqai no'ueenta.” ₂₈Qam só'maq lqaỹa ỹi ro'o, ca' se inoxono. Ca' vichiguiño' so leta'a que'oga, ne'xoresene'tot quiyim inoxono. ₂₉Qam so'maxare 'naaco' queso leta'a: “Qami' 'yiiñite' ỹoto'o' naua ñaxari quiyim so'ueenataxantacot qami', chaqai se ỹauana quiyim se ña'xaỹaxana qami'. Qam se ỹauanapega quiyim 'ue ca 'oonoqui' 'ỹaañitem aỹim quetaq llaalec, qaiyi so'uet ca iqui'ỹaxac, ca ñouanta'ai' na ñamigollipi. ₃₀Qam nagui novi' ñi qachaalqui' ma' chi iualaxain aso qadami' cana nanatqa lo'o', ca' lauataxañirelec, lauachi' so huaqui llaalec 'uegaxasaq.” ₃₁Ca' so leta'a 'naaco': “Qami' ỹaalcolec, qami' sqoỹoqape'oga caỹim. Ca vichiguiño' ná'ogue ná'maq hueetaỹot ná'ogue qatooỹaqui'. ₃₂Qalaxam nagui 'maxaraic quiyim so'ueetaq ca qarqui'ỹaxac quiyim ñitoonqatac. Ma' ñi rqaỹa'e', ñi'maxare mashic tot qaica, qam lot liỹa nca'leuec; ñi'maxare mashic na'laañi, qam mashic sanataxa.”