Lucas 14

₁Ca 'uo' so na'xa'a co'mataxaqui, ca' so Jesús quepegue' quiyim lqui'ỹaaqa' yi la'a' so lashi na fariseoipi. Ca' so liỹaripi fariseoipi chi rauaanaxantac, ra'iitapegueu'a so'maxare. ₂Ca' hueeta'anyi qai'neeta so ỹale na'uat na loshicmaxa reloqoto'ot so'maxare. ₃Ca' so Jesús inat ná'maq rapaxaguinataxanta'pegue na naqataxaquipi chaqai so fariseoipi, 'naaco':

—¿Peeta'a qaỹasenta quiyim qaỹomatec ca ralolaxaic quiyi na'xa'a co'mataxaqui, loqo'm 'e'?

₄Qam só'maq qomyipi ỹaatqajam i'maqajlem. Ca' so Jesús ipootau'a so ralolaxaic, ca chaqa'ma' imeuec nqai'en, ca' 'naapega quiyim eec. ₅Ca' 'naapega so fariseoipi, 'naaco':

—'Uo' cá caqamiri, no'm 'ue ca qalohi 'ashin, loqo'm ca ñii'lola, quiyim ta'ñigui aca ni'ỹa, ¿mesqai chaqa'ma' navicshiguim, 'eno'm nachinchigui ca na'xa'a co'mataxaqui?

₆Qam sqaica ca ishit 'ue ca ỹa'xat quesaua'maxare.

₇Ca co'na' so Jesús iuanchigui da 'neetari' so nalecseripi quiyim nca'atapegueu'a ná'maq paguec loyac qa'xanaxaquiripi quesó'maq nqui'ỹaxala', ca' ỹa'ue da laqataxac, 'naaco':

₈—Ca no'm 'ue ca qami' lalecsec queca nashilaxac, se nqa'xañiri'ñi ca qa'xanqa' paguec loyac, ma' sqoue noviro ca liỹa nalecsec qaỹapacqajnauec caqami'. ₉Ca cá'maq qamiri lalecse' ishit quepegue' qami', ime, ca' 'naac: “'Ỹaañitem na nqa'xanaxaqui'i' najo liỹa.” Ca' ne'laxachirishiguim, qam 'ue na rayiloxo'e', ca' nqa'xañirelec ca pa'aatec qa'xanaxala'. ₁₀Vichiguiño' no'm qami' nalecsec, ca' nqa'xañiringui ca pa'aatec qa'xanaxala', qaiyi ma' novi' cá'maq qami' lalecsec, ca 'naapega qami': “Qami' ñamígo, na'itquena nqa'xañiriñi quena paguec loyac qa'xanqa'.” Ca qaimaqachin qami' quecauá'maq nqa'xañisa'anto. ₁₁Ma' cá'maq chi ỹauaaque ca lecaic, ca' se qaimaqachin, chaqai cá'maq neneequesenta, ca qaimaqachin.

₁₂'Naapega qai'neeta só'maq ỹale talaxantaco':

—Noma' 'ỹaañirec ca na'ic, loqo'm 'viichi' ca nqui'ỹaxac, sqai ỹalli' na namigoi'ipi, chaqai na rqaỹachi'ipi, chaqai na qauochi' laseripi, chaqai na sqoỹoqaque quena ra'aachi' nesallaxanqaipi, ma' caua'maxare ma'le lotqai ỹale' aqami', ca' 'ue ca coñichiguit lopilaxaset. ₁₃Qam no'm 'viichi' ca nqui'ỹaxac, talaxañi' quena 'xoraic, chaqai na tot qaica ca 'negue, chaqai na ni'iraho naua lichil, chaqai na qai'laqaipi, ₁₄qaiyi ỹaatqajam chalego ca ra'maxa'e'. Ma' na'maxare se ishit quiyim rishivichiñi'. Qam qami' ma'le 'ue ca nishiuetenaxaqui', ma' ỹovita quiyim liỹa qanca'laxatec ná'maq ỹaatqajam 'maxaraic da no'ueenataxac qomyipi.

₁₅Ca co'na' 'qaachigui dajo so 'óna quesauá'maq nqa'xansañi, reloqotalec ca nqui'ỹaxala', ca 'naapego' so Jesús:

—Ỹaatqajam chalego loyac ma'le quecá'maq nouanau'a ca na'ic ma' qoyinta'ñi ca lo'ueenataxanqa' ñi qota'a.

₁₆Ca' so Jesús 'naaco':

—'Uo' so ỹale ỹo'ueeto' so ỹaatqajam lodegaxat nqui'ỹaxac, ca' relaataxan quiyim qoỹal ca 'xoic qom. ₁₇Ca co'na' ỹovita ca laloqo' quiyim que'e, ca ila' so lelaatec quiyim 'naapegalo caua lalecse': “Naguii, ma' mashic yá'ogue ỹa'maqatañi.” ₁₈Qam sá'ogue daachiguiñi na 'ue na ỹeguelec. Ca só'maq 'auaxaic 'naaco': “Ỹim chita'gue quiyim seshiujnaxana yi ña'laua, ca' ỹim shic quiyim sa'ajnaxane'oga. Ca' nagui ñi'xoresene'tot qami' quiyim chi yi'xoriñi'sac.” ₁₉Ca' so liỹa 'naaco': “Ỹim, qam chita'gue seshiujnaxanalo yaua cinco notauaripi toorollipi, ca' nagui sahotaque quiyim se'guen. Ca' ỹim chi qouaquiric chaqai yi'xoriñi'.” ₂₀Ca' so liỹa 'naaco': “Aỹim, qam chita'gue so'on, ca' vichiguiño' ỹim se seshit quiyim shic.” ₂₁Qam co'na' rapil so nelaatec, ca' ra'qaataxanem dá'ogue dajo só'maq na'co'. Ca só'maq na'co' ro'o. Ca 'naapego' so lelaatec: “Mo'e', quiteguelo naua nayico chaqai naua nayicolqai' quenajo na'a'. Ime, ca naviquiro ma'le na 'xoraiquipi chaqai na tot qaica ca 'negue chaqai na ni'iraho naua lichil, chaqai na qai'laqaipi.” ₂₂Ca co'na' mashic shi'gom, ca lotqai novi' so nelaatec, ca' ra'qaataxan, 'naaco': “Qami' ña'co', mashic shi'gue so'uet da relaataxanaxaqui', qam qaiyiita 'ue nedaaqa'.” ₂₃Ca' so 'co' 'naapego' so lelaatec: “Mo'e', quiteguelo ma'le naua nayico leta'al chaqai naua nayicolqai' chaqai repaquira'a na liỹa quiyim nenoxono, qaiyi no'xagui na iuo'. ₂₄Ma' ỹim shinac quiyim sqaica ca quenataq 'auaxaic ỹalecseripi tot ishit quiyim ñouanaxaua quena noq.”

₂₅Ca ỹaatqajam 'xoic na qom coỹareta'pegue' so Jesús, ca' so'maxare nqovilque'e, ca 'naaco':

₂₆—No'm 'ue ca nacpegue' aỹim, qam no'm se ỹamaqa'gue ca leta'a, aca late'e, aca loua, llaalqa, caua lqaỹa' ỹale' chaqai caua lqaỹa' 'aalo, chaqai vire'ta dá'maq chi nachaalataxac, se ishit quiyim ỹapaxaguinatec. ₂₇Chaqai ca sqai quegue aỹim, quiyim se ileualec aỹim, se ishit quiyim ỹapaxaguinatec. ₂₈No'm 'ue ca 'óna caqamiri ỹahotaque quiyim no'xonshiguim aca naue, ca' ¿mesqai 'au nqa'xanñi quiyim retan, ime, ca' naloqochin, tegue' chi nalootañi acá'maq laseuete aca sham ỹo'uet? ₂₉Chaqai no'm ỹo'uet cá'maq pa'aañi quiyim ỹahotaque no'xonshiguim, qam se ỹomat, ca ná'ogue ná'maq iuana chaqa'ma' i'neetac ca'maxare. ₃₀Ca' qohinac: “Dajo ỹale mashic no'xonshiguim ada naue, qam se ỹomat.” ₃₁Loqo'm ca nashi sham nalauate'e' ca liỹa nashi, ¿peeta'a sqai 'au nqa'xanñi, retan quiyim tegue' chi ishit nalo'guit ca diez mil nalliripi quiyim nalauate'e' ca naqueto'ot ca veinte mil qomyipi? ₃₂Chaqai no'm retan quiyim se nalo'guit, ca' ma' ñaq qoỹoqo'chiguit cá'maq liỹa nashi, ca ỹa'ue ca lelaatec quiyim rashiilaxanaque quiyim liyi se ipacta', ca' sqaicanqaida. ₃₃'Eda da 'neeta quiyim 'ue cá caqamiri quiyim se ỹalat ná'ogue na louenqaipi, se ishit quiyim ỹapaxaguinatec.

₃₄Na 'ue ỹaatqajam lo'yaxanec, qam no'm tot nochaua, ca' ¿negue' quet ca 'neeta quiyim liỹa qaỹouen? ₃₅Ca' tot qaica ca taiguit, vire'ta sqa taiguit quiyim qainaxaguit na 'laua, loqo'm quiyim qaỹalecqajñiguit cá'maq qainaxalec ca nanaxanqa'. Qaidaata quiyim qaỹalat. Cá'maq 'vii caua lque'laa lauaco, ca' na'xaỹaxan.