Job 7

₁₁Vichiguiño' qami' qota'olec, se seshit quiyim yi'maqata.

Queda nqui'ic chaqai queda ñi'guenaxac,

ca' ỹim ỹaatqajam somatauec dá'ogue da ỹa'qaatqaipi.

₁₂Ca ¿'eco' aỹim ca isecỹac lodegaxat le'ec ana huaaxai,

quiyim 'ñiisari' loqoisaỹa'?

₁₃Quena' shintapega quiyim ñinanñi seuetalec yi ỹomala',

ca' ỹaatqajam ñco'matec,

loqo'm quiyim selaq, ca' taauec da nqui'ic,

₁₄qam quena' se'guemata, ca' chalego da iqolonaxa;

¡ca' ỹaatqajam sqai 'tegue nqai'ñi' ca ilaxac!

₁₅Paguec la'maxa queta' vicqoitot na ỹoqosot;

paguec la'maxa queta' yileu, ca' se yca'leetauec.

₁₆Ma' mashic tot yalo'guit. Ca se sa'maxaren quiyim queeta yca'leetauec.

Yayaxañisac, ma' da ñachaalataxac 'ec quiyim qanauec ca nacat.

₁₇¿Negue' quet cá'maq 'neeta quiyim pacqajñirauec ca chaqai qom?

¿Chi'negue ma' 'xoic ca 'ñiite' queca'maxare?

₁₈¿Chi'negue ma' ra'i'seguelec quenaua'que naua na'xata',

chaqai quiyim chita'gue lotqai 'guiñi'?

₁₉¿Chi'negue ma' se yayaxañiriñi ya'ajñisac,

quiyim yayaxañirac 'enquetqai chi saqane' naua ỹa'lee?

₂₀No'm 'ue ca ỹasauaxaset, ¿nega'ỹo' ca ña'axat caqami', qami' neloxoỹaq quena qomyipi?

¿Chi'negue ma' ỹim rahinqui' quena roviqui'ipi?

¿Loqo'm 'ec so'taxachi'sac qami'?

₂₁¿Sqai shichi'o' quiyim palaxachi' ca ỹasauaxaset?

¿Sqai shichi'o' quiyim sqai quirapeguem dá'maq se no'uen so'ueetetac?

Ca sqaỹaloq ñichilneta seueta'guit na namoxoỹaxa,

yidaañisaque, qa' tot qaica aỹim ma'le.