Job 6

Quetqai ná'ogue na nqui'ic chaqai da i'xoric

ishit qaillaañigui aca nesallaqataxanaxaqui, ca' qaisallaxat,

₃ca' ỹapacauec queta'le ca lesallaxa quena lo'uaxanaxa quena lahi aso huaaxai.

Ca vichiguiño' setaqa, qam yitanta'uegue da ỹa'qaatec.

₄Ma' ñí'maq sqaica ca lqalanec ỹa'deuo caỹim na lovioqoipi,

ca' da ledoonaxa na'maxare ỹaatqajam quigui na ỹoshicmaxa.

Ñi qota'olec ỹaatqajam 'xoic da iqolonaxa nqai'en quena' yiloquintac.

₅¿Peeta'a noỹen ca 'ashin quiyim 'ue ca loq 'uaqapi?

¿Loqo'm noỹen ca tooro quiyim 'ue ca loq 'uaqapi?

₆¿Negue' cá'maq ỹa'ic ca na'ic yilqota quiyim qaica ca 'ue?

¿Negue' cá'maq naman ca qaica ca lo'daxa?

₇Ma' ná'maq se ỹauanapega sahotaque sa'ic,

ca' chaqaina ná'maq sa'queetac nagui.

₈¡Saxanchi' nañaañim ñi qota'olec cá'maq sashiilaxanaque;

saxanchi' ỹa'ue cá'maq yishiitaque!

₉¡Saxanchi' ñi qota'olec chaqa'ma' liyi ypataxañi,

ca' lqodoc nqai'en da ñachaalataxac!

₁₀Ca 'eno'm se ỹa'maxatahic da nqui'ic,

da'maxare ỹo'uet quet quiyim ỹa'maqachigui iuel,

ma' se ñapacalgoto naua laqataxaco ñi qota'olec ñí'maq co'teeta.

₁₁Mashic qaica ca ỹa'ñaxac quiyim ña'ñaxatetac,

chaqai mashic qaica quet cá'maq 'neeta quiyim yca'leetauec.

₁₂Sqai shinta ca la'ñaxac ca qa',

chaqai sqai shinta ca la'ñaxac ca lecat bronce.

₁₃Mesqai secona ca chi ña'ñaaqataxac,

chaqai qaica quet cá'maq chicqa'gue ca ñotaanaxac.

₂₄Ñaq yapaxaguiñii, ca' ỹim yi'maqatam ma'le;

ñaqai chaxañim cá'maq so'maqajantac.

₂₅Qaica quet cá'maq liỹoqa'piguit cá'maq qohinac quiyim ỹa'maqachiguiñi,

qam qamiri maxaitapiguilec cá'maq sqaica.

₂₆Qamiri 'quiiteguelgoto naua ỹa'qaatqa,

ca naua hualoxona' na'qaatqa chi i'xate' na nonot.

₂₇¡Qamiri shichii quiyim hualaxaiñii da nachaalataxac ca na'peloq,

chaqai quiyim 'ỹaañiuec miiñii ca nauochaxauahi!

₂₈Nagui, ca' ỹaatqajam ña'ỹoqo'ojta',

ca 'ñiỹapiguiỹa' no'm ña'majantac.

₂₉Nauá'maq sqai llico ra'qaataxahi, ca ỹoochihe'ogalo,

ca' retañii quiyim ỹaatqajam llic da sa'xatetac.

₃₀¿Loqo'm 'ñiitapega quiyim ỹim 'maatqaic,

quiyim se yitan cá'maq sa'xat?