'Ue da taỹaugui ma'le da leenaxat so llaalec so Isaías
1Ca' ñi qota'olec 'naac caỹim:
—Coñita ca qo'paq lahi lodegaxat nichaxasec, ca 'chirelec ca'maxare, re'qoote' nqai'ñi' caua qaderaxahi', 'chiriñi: Qaỹaloq nouootaxanaxac chaqai nalauataxanaxac. 2Ca viqui' ma'le ñaua dos ỹale' qamaxaraqa quiyim i'taxachiñi dajo, ñi netaxaỹaxanqajnec Urías chaqai ñi Zacarías ñí'maq llaalec so Jeberequías.
3Ca na' ime, ca ỹapa'ñi' añi ỹoua ñí'maq qota'olec letaxaỹaxaqui, ca ñi'maxare 'man, ca 'ue so llaalcoqui'. Ca na'le, ca ñi qara'gaxala' 'naac caỹim:
—Leenaxat nqai'ñi' Qaỹaloq nouootaxanaxac chaqai nalauataxanaxac. 4Ma' cajo noctoqui' ma' saqa' ỹa'den quiyim 'naac taat chaqai maam, ca' qanouote' yaua na'aate' Damasco chaqai yi Samaria queda lesallaqa', ca' qaỹodou'a ñi nashi quiyi Asiria.
5Ca' ñi qara'gaxala' liỹa 'naac caỹim:
6Ma' ỹaatqajam no'cha'a najo qomyipi ñi nashi Rezín chaqai ñi liỹa nashi, llaalec so Remalías,
vichiguiño' ỹañijin na huaxaỹaq caso ñaachi Siloé,
quiyim queeta nichireta,
7ca ñi qara'gaxala' i'paxanlec nqai'en quena lo'paxa
chicqa'oga aso lachiugue Eufrates
(qam da leloxoỹaxac 'neetasa': quiyim ñi nashi quiyi Asiria ỹomatalec najo ma'le da lquesaxanaxa).
Ca que'ueguelo ma'le naua lasote,
ca ỹovirete'ueguelo naua'que naua lahil,
8ca quejlec ma'le najo 'laua Judá, ca i'paxanlec nqai'en,
ỹoviro'ot nqai'en na lqosot.
Ca 'ec aca qo'o ipeguendec naua laua',
ca napoxonaxanchiguiñi ná'ogue na senqatalec na'laua ñi qota'olec Emanuel.
(8.9-22 Ñi qara'gaxala' qata so letaxaỹaxaqui, qaraqata quiyim 'naac se qaretaxaỹa'pegue' na lqui'i na leuaxaiquipi. 'Xoic lqalaigue' saua na'xata'.)
