Da 'auaxaic la'qaatec so Isaías taỹo'ot so nashi Acaz
1Ñi nashi quiyi Siria, leenaxat Rezín, chaqai ñi nashi quiyi Israel, leenaxat Peka, llaalec so Remalías, iloquine' na'le yi Jerusalén, ỹahosaque naqachiñi, qam se ishite'. Dajo viichigui na' so llaalec so Jotam chaqai laual so Uzías, leenaxat nashi Acaz, na'le quiyi Judá. 2Ca queco'na'le, ca' qaỹodo da la'xaỹaxac so nashi Acaz chaqai so llaalqaipi, qohinaco':
—So sirioipi na'deene'e' so na'ñi yi Efraín.
Ca' so nashi chaqai so qomyipi i'loxol, 'ec na 'oochi i'loxol quena' 'ue na nonot. 3Co'na'le, ca' ñi qara'gaxala' qota'olec 'naaco' queso Isaías:
—Coñitot ñi qachaalqui' leenaxat 'vio' caua sqo vito'olqai' rapile' ma'le, ca' qui', naxachira'guit so nashi Acaz quiyi lqodoc so ni'ỹac taỹau'a añi huaxaỹaq lahi' qoỹoqoshi'ma, queso nayic taỹa'oga yi no'ueenaxa nquiỹoxonqa' quena nooỹac. 4Ca 'ñiraco' ma'le:
Rovichisari'o', qam totaxan ro'daxachirec;
se ro'chi'i' chaqai sqai 'miaxachira'alo
saua 'ec dos norec lasoqo nichiisashiguim,
Rezín chaqai so lauo' sirioipi, chaqai ñi llaalec so Remalías,
'ec ỹaviquetauguilo queda lauele'.
5Yi sirioipi na'deene'e' yi qomyipi quiyi Efraín chaqai ñí'maq lashi, llaalec so Remalías,
quiyim ỹo'ueete' ca se no'uen caqami'.
'Neracsa':
6Qolaxau'a yi Judá, ca no'chi nqaishinaq;
souootaxanqa'gue yi na'laua,
ca sanaxauo quiyim nashi ma'le ñi llaalec ñi Tabeel.
7Qam ñi qara'gaxala' 'naac:
¡'E', dajo qaico' dá!
8-9Ma' yi na'a' Damasco yí'maq na'ñi ñi nashi ỹoiquentac yi 'laua Siria,
ca' ñi Rezín chaqaiñi ñi nashi quiyi Damasco;
chaqai yi na'a' Samaria yí'maq na'ñi ñi nashi ỹoiquentac yi 'laua Efraín,
ca' ñi llaalec so Remalías chaqaiñi ñí'maq nashi quiyi Samaria;
qam quenauajo sesenta y cinco ñaxari,
ca' quena llaalqaipi so Efraín nimiichiguiñi ma'le, qaica ca no'ueenashiguim;
chaqai qamiri no'm se ra'ñiiñi ca rpi'ỹaxaguii,
ca' qamiri qai'neeta se rca'lliitauec.
Da liỹa la'qaataxanaxac so Isaías na' ỹa'xat da ne'xaỹoxosoxoc so Emanuel
10Ñi qara'gaxala' qai'neeta 'naac queso Acaz:
11—Shiila'e' ñi qara'gaxala' qota'olec quiyim ỹo'uet ca se qaiuanapega, qaiyi ca' chi retanqui', no'm pa'aañi quena lauajñi na 'laua, loqo'm pa'aashiguim quena piguim.
12Ca' so Acaz 'naaco':
—'E', ỹim se sahotaque quiyim se'guen ñi qara'gaxala', sashiilaxantaque quiyim ỹa'ue ca itanec.
13Co'na'le, ca' so Isaías 'naaco':
Na'xaỹaxañiñi qamiri, ná'maq lalamaxaret llaalqaipi so nashi David.
¿'Eco' sqaica ca 'negue nqai'ñii quiyim sqai 'xañiỹac na qomyipi,
ca' viitaque quiyim sqai 'xañiỹac qai'neeta ñi qota'olec?
14Hua', cha'regue chaqaiñi ñí'maq qara'gaxala' ỹo'uet ma'le ca retanqui':
Añi nequetegaxai mashic 'man,
chaqai 'ue ma'le ca llaalec,
ca ỹanegue ma'le quiyim leenaxat Emanuel.
(Ca' dajo 'naac: Ñi qota'olec ỹalequetauguilo qomi'.)
15Quesaua 'auaxaqa niñaxari so noctoqui',
ca na qomyipi ỹa'queetac ma'le na ra'ñaata' lo'i' chaqai na rapic li'i.
16Qam ma' saqa' ra'deenataxan so noctoqui',
ca' yi 'laua neesalec yaua dos nashil yauá'maq ỹo'ueetesac da rqolonaxa'e'
qoyique'e ma'le.
17Ñi qara'gaxala' taalec nqai'en qami',
chaqai na qauochi' chaqai na qachaalaxai'ipi,
cauajo na'xata' 'xoic la'aaqa' se ỹauanapega 'neeta,
shi'gue na' so llaalqaipi so Efraín noỹootec queso llaalqaipi so Judá.
(Ca' quedajo 'neetapega so nashi quiyi Asiria.)
(7.18-25 Da netanec so Emanuel.)
