Isaías 56

₁Ñi qara'gaxala' 'naac queso lalamaxareteripi:

Napaxaguiñiỹa quiyim na'maxachita,

'viichii cá'maq ỹa'maqachiguiñi,

ma' sqaỹaloq so'uet quiyim ra'maxaiñi;

sachaxan ma'le da iquesaxanaxa ca'laqataxanaxai.

₂Chalego loyac queca ỹale quiyim quiichi'ñiguilo naua ilaataxanaxaco,

na'maxateta chaqai ipacqajanchiguilo,

chaqai quiyim se ro'ueenataxañigui ca na'xa'a co'mataxaqui,

chaqai cá'maq se nqo'ta quiyim ỹo'uet ca se no'uen.

₃Chaqai ca sqai judío le'ec no'm nañaanot ñi qota'olec,

mesqai 'neetapigui lauel:

Ñi qara'gaxala' ỹoỹooteta'oga ỹim quena lalamaxareteripi.

Chaqai ca naqateguese lolaa sqai 'neetapigui lauel:

'Ec aỹim aca qo'paq laso.

₄Ma' ñi qara'gaxala' 'naac:

Ca naqateguese lolaa no'm se ro'ueenataxañigui yi na'xa'a co'mataxaqui,

chaqai no'm ipacqajanchigui dá'maq sahotaque

chaqai se ỹa'laxate dá'maq ña'deenaxac,

₅ca' ỹim saanem ca paguec loyac queca llaalec chaqai caca llaale;

ỹim saanem quiyim ca leenaxat ỹaatqajam 'chiichiguiñi nqaishin, qaican ỹapalaxat,

spa'xanaho quiñi iuo',

saanem quiyim da leenaxat sqaica lqodoc,

chaqai sqai pal.

₆Chaqai ná'maq sqai judioipi no'm nañaanot aỹim,

ro'ueenataxañiỹot chaqai yi'xoren,

ỹa'maxarenta quiyim ilaatqaipi,

no'm se ro'ueenataxañigui yi na'xa'a co'mataxaqui, se iualaxain,

chaqai quiyim se ỹa'laxate da ña'deenaxac,

₇ca' ñauega ana ñaqa' qaica iualaxain,

ca' netoon ma'le quiñi iuo' qouagaxainaxaqui.

Ca secoñi'chiguit ma'le ca ỹavigaxat lachitaxanataxanaxat quiyi ỹanatqa',

ma' na iuo' qaỹamata'gue

'imec nqouagaxainqa' ná'ogue na ỹoreta'oguit qomyipi.

₈Ỹim yapilaxat, ca' lapoỹata'

quená'maq na'aquipi hueeta'oga yi ỹoqa'a 'laua.

Dajo i'taxajñi ỹa'xat ñi qara'gaxala',

ñí'maq ỹo'uet quiyim liỹa lapoỹata'

na llaalqaipi so Israel neuagaxatetajlec.