Isaías 49

₁Ñaq na'xaỹaxañiỹa aỹim, qamiri qomyipi ñiitalec ana delequipi,

ỹaatqajam na'xaỹaxañiichiguiñi, qamiri qomyipi qoỹoqo'ta ca ñiỹa'ñi:

Ñi qara'gaxala' roỹaxañiua' na' saqa' ñi'qaañi,

'naac da ỹeenaxat

na' ñaqai seuetaugui na lauel añi ỹate'e.

₂Naua ỹa'qaatqa 'ec nqai'ne' lecat ỹaxaraic,

chaqai quepaqataxanlec aỹim queda lqai'laxat,

ñigui nqai'en aỹim ca 'ec novic shitaxaraic,

ca' ỹa'maxat aỹim caso lovic lahi'.

₃Ca 'naac caỹim: “Qami' Israel, qami' ilaatec,

qami' chicqochigui ma'le quiyim sachaxan da iquesaxanaxa.”

₄Ca' ỹim shinaiquen:

“Ỹaatqajam 'ue da ỹo'ueenataxanaxac, qam qaica ca 'negue,

'xoic da ña'ñaaqataxac, qam qaica quet cá'maq ñigui.”

Qam llic ma' dá'maq so'ueetetac hueeto'ot ñi qara'gaxala' qota'olec,

chaqai ca ñishiuetenaxac chicqo'ot ñi'maxare.

₅Secoñiguit da ñimaqajnataxac quiyi reloqota'ñi ñi qara'gaxala' qota'olec,

ma' ñi'maxare chicqotapigui da iquesaxanaxa.

Ñi qara'gaxala' ñí'maq ya'maxajñi na' ñaqai seuetaugui aso ỹate'e,

qaiyi ỹim lelaatec,

qaiyi rapil so lalamaxareteripi so Jacob só'maq na'aamatec da Israel,

rapil, ca' lapoi'ot ñi'maxare,

₆'neetasa' da la'qaatec:

Mesqai nodaachiguiñi quiyim qami' ilaatec

quiyim qaidaata rapilaxachi' na llaalqaipi so llaalqaipi so Jacob

chaqai quiyim rapilaxachi' na ca'laaxaiquipi quena'maxare;

qai'neeta ỹim so'uet quiyim qami' lcoỹeraxanaxat ná'ogue na ỹoreta'oguit qomyipi,

qaiyi 'xachisac da ica'laqataxanaxac

quenaua paguec qoỹoqo'teguelo lahil na 'laua.

₇Ñi qara'gaxala' ñí'maq nca'laqataxanaq

ñí'maq co'teeta qota'olec quiyi Israel,

'naapega na qomyipi quená'maq ỹaatqajam se qanqo'ta,

ná'maq quena liỹa qomyipi ỹaatqajam laqaigaxat,

ná'maq la'ac na nashillipi qa'uaiquipi, ñi'maxare 'naac:

Ma' na nashillipi chaqai na llaalqaipi iuana qami',

ne'laxashiguim, ca' ỹa'dooto qami' naua le'cootal,

ma' ỹim ná'maq ỹim na'gaxala', ỹim co'teeta qota'olec quiyi Israel,

qami' ica'acsec chaqai ipaquichigui nqaishin da ỹa'qaatec.

₈Ñi qara'gaxala' 'naac:

Novi'o' na na'xa'a quiyim sachaxan da iqouagaxa, ca' sasaachiguit qami';

novi' na na'xa'a nca'laxaqui, ca' sotauañi'.

Ỹim so'ootaxanlec qami' na'le,

qaiyi chicqochigui nqaishin qami' quiyim se'taxajñi da ña'deenaxac quena ỹalamaxareteripi,

qaiyi liỹa qano'xonshiguim na na'aateripi,

qaiyi liỹa qoyinalec yí'maq 'laua shi'gue qanopoxoỹaxajñi,

₉ca' qohinac quena ncoñiitecseripi: Shi'gue qarosoiuec,

chaqai qohinapega ná'maq hueetaugui na napalaxa: Nenoxoñiu'ga na re'qojlec.

Quenaua'que naua lahil naua nayico 'ue na 'uaqapi,

chaqai quecanchaqaica 'laua qaica qom 'ue na loq na qalohipi.

₁₀Ca' se rqopachii chaqai se ralauachii raquipii,

chaqai sqai taalec qamiri ca ra'aasa lauaq,

ma' ỹim se'xoriñii chaqai sashaxanta'pe qamiri,

chaqai sauequeta'alo qamiri ca hua'ñi ca ne'paxantashiguim huaxaỹaq.

₁₁Sauategue ma'le ca nayic quiichigui nqaishin aca qa' ladocai,

chaqai so'uet quiyim nalo'ojta' cá'maq qayiguii.

₁₂¡'Ajñii! Chalego leseguegue ná'maq chicqa'gue:

'ue na chicqa'gue da rapiguim, chaqai na liỹa queda lauashiguim,

chaqai na liỹa chicqa'a yi 'laua Asuán pa'a'gue da 'guiñi.

₁₃¡Qami' piguim, raualqe' quena raỹaaqui'!

¡Qami' 'laua, no'xalec qami' queda netoonaxaqui'!

¡Qami' qa' ladocai, raualaxahi queda ra'maxahi!

Ma' ñi qara'gaxala' lo'daxachigui lauel na lalamaxareteripi

chaqai ỹovita quiyim nqouaguegue queda le'xoric.

₁₄Ca' yi na'a' Sión 'naac:

Ñi qara'gaxala' qota'olec yalat,

chaqai coua'e aỹim.

₁₅Qam ñi'maxare 'naac:

¿Peeta'a aca nate'e ishito' coua'e

loqo'm tot ishit nqo'ta cá'maq lalamaxaret llaalec?

Ca 'eno'm aca'maxare coua'e,

ỹim qaica ma' scoua'e quet aqami'.

₁₆Ỹim hueetagui nqaishin qami' na ñapoquena lauel,

'ec sa'ajanta'pe quen naua rquepaqataxanqachichi'.

₁₇Chalego liyigue' dauá'maq no'xonsecshiguim,

sqai 'nejem cá'maq nopoxoỹaxajñi qami' na'le;

shi'gue ỹoxogue cá'maq nopoxoỹaxajñi qami' na'le.

₁₈Ñaq namachirashiguim, ca 'ajñi' ná'maq sqo ỹoxe'oga caqami',

'ajñi' quiyim ná'ogue lapootaho,

chaqai rapila qami'.

Ỹim, ỹim na'gaxala', saanec da ỹa'qaatec, nallitalta',

quiyim ná'ogue ma' rapil 'ec aca 'ueetqate quiyim ñi'riñi ma'le

'ec na no'ueetaxat acá'maq shiltapego.

₁₉Na na'laua'e' qanopoxoỹaxajñi,

qai'guenaxajñi, sogui nqohin na'le;

qam nagui na na'laua'e' cocho'qui',

se nalolec ma'le ná'ogue na qomyipi.

Cá'maq nopoxoỹaxajñi na'le qoỹoqo'talo nagui.

₂₀Ca cauá'maq qachaalaxahi' cauá'maq 'ñiisapegalo na'lerañi

'qa'italo ma' retaxahi', 'nerac:

Najo 'laua sqa logoñoqui' coqomi';

vite quet ca liỹa qara'a', qaiyi senqa'ñi.

₂₁Ca qami' chi retaqatapigui ma'le na qavilli', ca 'ñirac:

¿Nega'ỹo' cá'maq ỹa'vii nauajo ỹaalqa?

Ỹim qaicaua caua ỹaalqa na'le, chaqai tot qaica ca ỹaalec;

ỹoqa'a da 'laua senta'gue chaqai qoỹoqo'ta aỹim,

¿nega'ỹo' cá'maq iỹaxate' naua'maxare?

Ma' ỹim qayodaqajanchiguiñi na'le,

¿negue' cá'maq chicqora'co' naua'maxare?

₂₂Ñi qara'gaxala' 'naac:

Sela' ma'le ná'ogue na ỹoreta'oguit qomyipi;

chaqai sategaxaneu'ga,

qaiyi nodo qa'aalto'ot na qachaalaxai'ipi

chaqai naua qachaallii' nodo ỹantalgoto naua lallaaco.

₂₃Naua nashillipi ra'ualaxahi' qata'alli' ma'le,

chaqai nauá'maq llaallipi neloxoỹaxallipi caqami' ma'le.

Chaqai nqa'paxanñi, ỹoviraxata'guit nqai'en na latap na 'laua,

ca' neneequesenta, ỹachaxan dá'maq quiyim se napacalec aqami'.

Ca 'yiiñira'a ma'le quiyim ỹim ná'maq ỹim na'gaxala',

ca ná'maq pi'ỹa'a ỹim mese pe'taxantegueri'.

₂₄Ca ỹale 'ñaaxaic ¿peeta'a ishit qanouora'gue cá'maq louootaxanaxat queca lauataq?

¿Loqo'm ca ncoñiiteguesec qohit queca nashi qa'uaic?

₂₅Ñi qara'gaxala' 'naac: Ajá'a, ishit.

Cá'maq ỹale 'ñaaxaic ishit qarouootaxana'gue cá'maq louootaxanaxat

chaqai quecá'maq qa'uaic ca laueguec.

Ỹim seloqoguit ma'le cá'maq ỹahotaque nco'uaxac caqami';

ca' ỹim ná'maq ñca'laxatec ma'le na qachaalaxai'ipi.

₂₆Ỹim yipaca'a ma'le ná'maq qa'uaiquipi

quiyim squi'ỹaxanegue ná'maq chi la'at

chaqai quiyim quiñiuguetegue ná'maq chi leuoripi, 'ec nqai'en na lataxa.

Qaiyi ná'ogue na qomyipi quena 'laua ỹa'den

quiyim ỹim ná'maq ỹim na'gaxala', ỹim ná'maq ñca'laxatec aqami',

quiyim ỹim ná'maq quesaxanaxaic queso Jacob, ỹim ná'maq sosouec aqami'.