Ñi qara'gaxala' qota'olec qaiñiita ca'laqataxan
1Qam nagui, qami' lalamaxaret so Jacob só'maq na'aamatec da Israel,
ñi qara'gaxala' ñí'maq qami' lo'ueenatec 'naac:
Totaxan ro'chi'i', ma' mashic shi'gue sosouec qami';
soỹaxana qami' queda qadeenaxachi', qami' ỹalamaxaret.
2No'm quiriñigui ca huaxaỹaq, ỹim iỹaatac qami',
loqo'm quiyim paquira'ta aca lachiugue, sqai homirac;
loqo'm quiyim quiichiriñigui ca norec, qam se raviqui',
qaica ca 'negue na lauaq caqami'.
3Ma' ỹim ná'maq ỹim ra'gaxalachi', ỹim rca'laxagui'i',
ỹim co'teeta qota'olec quena llaalqaipi so Israel.
Ỹim shi'gue somachigui qami',
na' saanec yi Egipto, yi Etiopía chaqai yi Sabá,
4ma' ỹim yqo'chiraxaua',
chalego lesega'a qami' chaqai ỹim se'xoriñi'.
Sahotaque ñi'so'ot aỹim chaqai quiyim ñca'laxatec da nachaalataxaqui',
ca' saanec na ỹalliripi chaqai na ỹoreta'oguit qomyipi.
5Totaxan ro'chi'i', ma' ỹim iỹaatac qami'.
Chicqo'tegue da lqodoigue chaqai da lauashiguim
yapilaxat ma'le na qauochi', ma' sahotaque llapoonta'.
6Shinapega ma'le da rapiguim: Rapilaxachi',
chaqai shinapega da 'guiñi: Mese nolli'rañi naua'maxare.
Nodo'e' na ỹaalqaipi chaqai na ỹaallipi quenauá'maq qoỹoqo'teguelo lahil na 'laua.
7Nodo'e' ná'ogue ná'maq ỹalamaxareteripi,
ná'maq ỹim so'uet chaqai sa'maxajñi,
ná'maq ỹo'ueenatec quiyim yimaqachin.
8Rapilaxachii na ỹalamaxareteripi.
Na'maxare 'vii naua nqote', qam se neuanñi,
'vii naua lque'laa lauaco, qam sqa 'qaa.
9Lapohiỹata' qamiri ná'ogue ná'maq ỹalamaxareteripi,
lapohiỹata' ná'ogue na ỹoreta'oguit qomyipi.
¿Negue' cá'maq shi'co' ỹa'xat na'le dajo quena'maxare,
loqo'm quiyim ỹa'xat só'maq shi'gue ỹoxe'uegue?
Naueguero caua lqoshaxaua' quiyim i'taxachiñi dajo,
qaiyi qara'xaỹa, ca' qai'taxajñi quiyim lliqueta.
10Ñi qara'gaxala' i'taxajñi dajo, 'naac:
Qamiri nauá'maq iqoshaxaua' quedajo,
qamiri ilaatqa, qamiri ica'acse',
qaiyi ya'yiiñii chaqai pi'iỹa'a aỹim
chaqai quiyim ya'yiiñii negue' aỹim.
Qaica ca 'auaxaic qota'olec caỹim
chaqai qaica ca liỹa ma'le.
11Qaỹimeta, ỹim na'gaxala';
qaica ca liỹa ỹoqa'oga caỹim ishit ca'laqataxan.
12Ñi qara'gaxala' 'naac dajo, i'taxajñi:
Ỹim shi'gue sa'xat chaqai shinac na'le: ỹim ná'maq nca'laxaterec qamiri na'le;
qaica ca liỹa qota'olec ỹo'uet dajo,
ca' qamiri nauá'maq qamiri huañichigui quiyim se'taxajñi dajo.
13Chaqai shintári' ỹim qota'olec.
Qaica cá'maq ishit imaqa'guit da iquesaxanaxa.
Qaica ca ishit quiyim ỹosogui cá'maq so'uet.
14Ñi na'gaxala', ñí'maq qota'olec co'teeta quiyi Israel,
ñí'maq ỹosoorec qamiri, 'naac:
Ma' sahotaque ñaqata'alo qamiri, sa'ue ma'le ca qomyipi, selategue da Babilonia,
ỹim so'uet quiyim qaỹauachigui ná'ogue na lasomyipi,
ca' da netoonaxac na caldeoipi Babilonia laseripi ñigui ma'le ca nqui'ic.
15Ỹim ná'maq ỹim na'gaxala', ná'maq ỹo'viijñi na Israel,
ná'maq co'teeta qota'olec chaqai nashi caqamiri.
16Ñi qara'gaxala' ỹauachi'ña so nayic pa'aañi caso huaaxai,
ỹa'ue so ñicta queso huaxaỹaq quesaxan na lo'paxa;
17ỹo'uet quiyim inoxonec so quesaxanaxaic nouaataxanaq,
liỹaatac ana lahoglena chaqai na lalo shipgaq, ma' ỹahotaque nomachichiguiñi.
So'maxare sá'ogue qanenaxañi, ca' qaica ishit ne'laxashiguim;
chi imetauo 'ec aca ncoỹeraxanaxaqui quiyim nanoiquentac 'om.
18Nagui, ca 'naac ñi qara'gaxala' quena lalamaxareteripi:
Sqo 'lliinchira'oga cá'maq 'neeta queso scavit,
totaxan o'lliinchite cá'maq shi'gue ỹoxe'uegue.
19Ỹim ma'le sa'ue ca so'uet dalaxaic,
ca huañita ma'le quiyim chaqaida re'oq ipaquichigui.
Huategue nqaishin ca nayic quiyi 'laua qaica qom,
chaqai so'uet aca lachiugue quiyi 'laua rashivijlec.
20Yimaqachin ma'le na iseripi hueuec,
na nouaxaỹaxallipi chaqai na mañiguiripi,
ma' ne'paxanshiguim nqaishin ca huaxaỹaq quiyi 'laua qaica qom,
so'uet aca lachiugue hua'ñi yi 'laua rashivijlec,
sahotaque ni'chigui na ỹalamaxaret ica'acseripi,
21ná'maq ỹo'ueenatec ỹalamaxareteripi,
qaiyi yimaqachin.
22Qam qami' lalamaxaret so Jacob só'maq na'aamatec da Israel,
mese yimaqachiñi', ta'ta'a quiyim rco'chi'reguesop aỹim.
23Sqaca aca nañaañiro quiyim vigaxachi' qagreta,
mese yimaqachiñi' yiñiiquishiñi'sac.
Se ñco'taxatec qami' sashiila'isac queca rami'i',
chaqai qaica shinac caqami' queca nichiinaxanaxat.
24Sqai shiujnaxañita aca noqola late'e lo'daxaraic lahita
quiyim nodo'isaho' 'ec aca rami'i',
chaqai sqa vite ca lo'daxaset iuel
quena le'uegaxa ca rachitaxanataxanaxachi' isecỹac.
Ta'ta'a quiyim yco'taxachirec quena rasauaxashichi';
yo'taqa'gue na se no'uen 'viichi'sac.
25Qam ỹim, ma' ỹim qota'olec caqami', ca' sapalaxat na se no'uen 'viichi'sac,
chaqai tot so'leente ná'ogue na rasauaxashichi'.
26No'm 'ue ca se no'uen 'ñiisapega so'uet, ca' setaxaỹaxagui.
Nodo'iro cá'maq hueetapigui qavilli', sha'apiguito' qaica ca 'maqajñirac.
27So 'auaxaic chicqoiraugui 'ue da lasauaxaset,
sauá'maq ỹapaxaguinsac aqami' npa'guende'e' aỹim,
28so nashillipi caqami' iualaxaintac ñi no'ueenaxanaxaqui quiyi Jerusalén;
vichiguiño' saxanegue quiyim qanopoxoỹaxajñi chaqai qai'neetac na lalamaxaret so Jacob só'maq na'aamatec da Israel.
