Isaías 2

₆Qami' qara'gaxala', mashic no'ueenaxachisañi na qauochi' na llaalqaipi so Jacob;

najo 'laua no'qaachigui quena idaanau'alo naua nanatqa chicqota'gue da lqodoigue,

'nejem na pi'xonyipi quená'maq 'ue quena filisteoipi,

chaqai na'yiiñiguit na qomyipi ỹoqa'a na chicqa'gue.

₇Najo 'laua no'qajlec quena 'oro chaqai quena plata

quená'maq nouenec chalego lecaic da nauochaxa;

quenajo 'laua ỹaatqajam 'xoic na shipgaq

chaqai ỹaatqajam 'xoic ana nahoglena.

₈¡Qam qai'neeta no'qajlec quena nashiilec nqolac!

So qomyipi nqouagaxaintacot ná'maq 'neetapega qota'olec,

qam lo'ueenatec quenaua chi lqai'laqate' chaqai quenaua chi napoquena.

₉Mashic neneequesen, mashic nemanachit.

¡Ca totaxan richillira'a quiyim vite ca nouaxanaxaset!

₁₀Na qomyipi i'guiñi'ñot ma'le na qa',

pa'aañi quena 'laua;

nañoxojñi ma'le queda chalego lichic loviraxac so qara'gaxala',

quedá'maq lecaic da lauaq quiyim nashi.

₁₁Na nemaqajnaxairipi se nedaanshiguim ma'le;

na napacqajnaxairipi nemanachit ma'le.

Qaisoota so qara'gaxala' qota'olec ỹachaxan ma'le da lecaic quecajo na'xa'a,

₁₂ma' 'ue ca ỹo'uet ñi qara'gaxala' sqaica lqalanec

quená'maq qomyipi nemaqajnaxairipi chaqai naleesenaxai,

ma' reloqoguit ná'ogue na qom napacqajnaxai,

ma' ỹahotaque nemanachit nqai'en.

₁₃So qara'gaxala' reloqoguit ma'le ná'ogue

ná'maq 'neetapigui lauel 'ec aca qo'paq cedro quiyi Líbano,

chalego da ladogaxa,

loqo'm 'ec aca qo'paq roble quiyi Basán;

₁₄ma' reloqoguit ná'ogue ná'maq 'neetapigui lauel 'ec aca qa' ladocai

loqo'm aca quemaralec qoỹoqoshi'megue,

₁₅ma' reloqoguit ná'ogue ná'maq 'neetapigui lauel 'ec aca na'ajnaxanaxalate ladocai

loqo'm ra'ñii 'ec ca nquepaqataxanaxat queca na'a' lodegaxat,

₁₆ma' reloqoguit ná'ogue ná'maq 'neetapigui lauel 'ec aca qom lahi' quiñigui na huaxaỹaq quiyi Tarsis

loqo'm aca qom lahi' huaxaỹaqse lo'yaxana.

₁₇Na nemaqajnaxairipi chaqai na napacqajnaxairipi

ỹaatqajam nemanachit nqohin ma'le.

Qaiñiita ñi qara'gaxala' ỹachaxan da lecaic quecajo na'xa'a

₁₈chaqai ỹomat ma'le ná'ogue na nashiilec nqolaquipi.

₁₉Ma' ne'laxashiguim ñi qara'gaxala', ca no'xalec na 'laua queda nqolonaxa,

na qomyipi i'guenou'guelo naua lauaco na qa',

chaqai na temaipi quena 'laua;

nañoxojñi ma'le queda chalego lichic loviraxac ñi qara'gaxala' qota'olec,

queda lauaq quiyim nashi.

₂₀Ca' quecajo na'xa'a ma'le, ca' na qomyipi ỹalat na lashiilec lqolac,

ca' ana nichigoxonaxa chaqai ana na'gaxanaxa ichic

sojo nqolaquipi nashiilqaipi chicqaugui na 'oro chaqai ana plata,

só'maq chi lo'ueenatec ỹahotaque quiyim nqouagaxainot,

₂₁chaqai i'guenou'guelo ma'le naua lauaco na qa',

chaqai quenaua laqacqate' na qa',

ỹahotaque nqañoxojñi queda lichic da loviraxac ñi qara'gaxala', dá'maq lauaq quiyim nashi,

ma' ñi'maxare ne'laxashiguim, ca no'xalec nqai'en na 'laua queda nqolonaxa.

₂₂Totaxan pi'iitapega na qom,

ma' sham qaica quet cá'maq 'negue.

Ma' da nachaalataxac na qom

'ec quiyim chi qanauec ca nacat.