Isaías 1

₂Piguim chaqai na 'laua,

na'xaỹaxañiỹa da la'qaatec ñi qota'olec, 'naac:

Siỹaxat na ỹaalqaipi ỹovireta'a quiyim leta'allipi,

qam na'maxare npa'guene'e' aỹim.

₃Ca ñii'lola no'uenegue ca na'co'

chaqai ca 'ashin ỹa'den ca nqui'ỹaxanatqo';

qam ná'maq ỹalamaxaret llaalqaipi so Israel

se ỹa'deenaỹa' chaqai qaica ca la'deenataxanaxac.

₄¡'Xoraiquipiolec na qom sauaqhuaic,

no'qaachigui quena se ỹa'maxañi,

chigoxougui só'maq ỹo'ueetetac da se no'uen,

ñaalqaipi hualoxonyipi!

Mashic noỹootec quiñi qara'gaxala',

mashic nasectec quiñi co'teeta qota'olec queso Israel,

ỹaatqajam ca'e.

₅Qamiri viitaque ypa'guiñitac,

qam quena roshicmaxahi tot qaica ca no'ueenta.

Ná'ogue na rqahiguii coñirqata,

chaqai na'laañi cá'ogue ca rquesaxanaxahi.

₆Chicqochi'ñi naua qapiaachiri lavilli' ỹoviragui na rqahiguii

qaica ca no'ueenta caqamiri;

ná'ogue coñirqata, nouaxanec, dalachigui ana ne'neete;

qaica ca natarene' qamiri chaqai ca ỹaxajlec, chaqai ca taañi nqai'en na nqui'ic, ỹahote'e na aceite.

₇Na na'lauahi ñigui ca 'laua qaica qom,

chaqai na na'aateripi ná'ogue ỹavigougui.

Chaqai ma' loxoitaho,

qam na npa'guenaxauahipi ỹa'ic na qadañicshiguii.

Ná'ogue ñigui ca 'ec 'laua qaica qom

'nejem na'le yi Sodoma na' qanopoxoỹaxajñi.

₈Qaiyiita yi na'a' Sión no'ueenañi,

'ec 'imcoqui' na'daañi neetañigui ca 'uva loma',

'ec ca 'imcoqui' neetañigui ca chiguiraxai loma',

'ec ca na'a' qanahiquinchiguiñi queca npa'guenaxauaripi.

₉Quetqai ñi qara'gaxala' qaica lqalanec

sqaico' caua no'ueenaxaterañi coqomi',

ca' nagui queta' shinqatari' yaua Sodoma chaqai yi Gomorra na' qanopoxoỹaxachiñi.

₁₀Qamiri nashillipi quena Sodoma, na'xaỹaxañiỹa da la'qaatec ñi qara'gaxala';

qamiri qomyipi quena Gomorra ỹaatqajam na'xaỹaxañiichiguiñi

quedá'maq lapaxaguinataxanaxac ñi qota'olec.

₁₁Ñi qara'gaxala' qota'olec 'naac:

¿Chi'negue ma' 'xoic na nodohitapego rachitaxanataxanaxachii?

Mashic yamaqa'gue ná'maq name qagreta loua'

chaqai ana lo'ỹo na huaqui llaalec 'uegaxasaq;

yamaqa'gue na leuoripi na tooro, qagreta loua' chaqai na quetaq llaalec.

₁₂Qamiri 'ue ná'maq nodohitaho caỹim,

qam ¿negue' cá'maq roỹaxane'ogalo qamiri quiyim co'viilec na ñasoxoc?

₁₃Totaxan nodohiuo ca rachitaxanataxanaxachii qaica ca 'negue;

yamaqa'gue na lesalaxaripi na'maxare.

Qamiri ỹaxañiu'oga quen na qomyipi

quiyim ỹa'ue ca lemaqachic quiyi dalaxaic shiraigo chaqai yi na'xa'a co'mataxaqui,

qam ỹim ỹaatqajam se yqo'ta na lemaqachic na qom ỹo'ueetetac na se no'uen.

₁₄Yamaqa'gue na nemaqachic quiyi dalaxaic shiraigo chaqai naua lapoxoco;

¡ca vire'ta quiyim se yo'daxat,

ca mashic tot yalo'guit!

₁₅Quena' nanochishiguim naua rqai'laqachiri, ca nqouagaxaiñii,

ca' ỹim se ya'ỹiỹalo qamiri;

'eno'm shi'gom nqouagaxaiñitac,

ỹim se ña'xaỹaxan.

Ma' naua rqai'laqachiri 'ue na ralauachiguii leuoripi.

₁₆¡Nquiỹohi, nco'taxachiỹalta'!

¡Loỹoochihe'oga na se no'uen caỹim!

¡Totaxan liỹa 'viichii na se ỹa'maxañi!

₁₇¡Napaxaguiñiỹa quiyim 'viichii cá'maq no'uen,

na'ñaxachii quiyim 'viichii ca ỹa'maqachiguiñi,

tauañii ná'maq se qaỹa'maxate'tegue,

'viichii quiyim qaỹa'maxate'tegue ca na'peloq,

'ootaxañiilec dá'maq no'ueenataxac aca pa'ỹe!

₁₈Ñi qara'gaxala' 'naac:

Nahiquena, ñaq setaxaỹaxagui dajo.

'Eno'm ca rasauaxashichii 'ec ca ỹaatqajam togaxaraic,

qam ỹim lalagaxaic nqaishin, 'ec nqaishin ana loñi nacañi;

chaqai 'eno'm 'ec aca lepate nqo'leguese quena naue' letogaxa,

qam ỹim lalagaxaic nqaishin, 'ec na qagreta laue.

₁₉No'm shichii quiyim na'xaỹaxañiua',

ca' 'guii ma'le ná'maq no'uen nanecsec quena na'lauahi;

₂₀Qam no'm qaiyiita se na'xaỹaxañii,

ca' qaica lata' quiyim qaralauachii ma'le queca lauataq.

Chaqaiñi ñi qara'gaxala' ñí'maq ỹa'xat dajo.

₂₁¡Qami' na'a' lodegaxat, quesom qami' qamaxaraic,

qam nagui vichirau'a quiyim 'ec qami' nedequenaxai!

Quesom ná'ogue na qauochi' ỹo'ueetetac da ỹa'maqachiguiñi

chaqai ỹaatqajam ne'maxateta,

qam nagui nodaachiguiñi na lauataxanaxai ná'maq 'ue.

₂₂Qami' plata quen, qam nagui, ca' qami' lete,

qami' no'uen lataxa quen, qam nagui, ca' qami' chaqai huaxaỹaq.

₂₃Na nashillipi caqami' napacqajnaxairipi

chaqai na nauochaxaua'e'ipi choxonataxanaxairipi.

Ná'ogue ỹo'uet quiyim qaishiuetenta,

idaante'e quiyim qaỹo'uet ca qoỹaanem.

Se iuejlec ca na'peloq,

qaica ca ỹauaaque se nqouaguegue aca pa'ỹe.

₂₄Vichiguiño' ñi qara'gaxala' qaica lqalanec,

ñí'maq qaica ca qalanac quena Israel 'naacsa':

¡Liyi nalootañi! Ỹim seloqoguit na ñpa'guenaxauaripi.

Sa'ue ỹovi' quena'maxare.

₂₅Nagui ñanorec da iqai'laxat quiyim ñco'ỹa'e' qami',

ca' scopata'a ná'ogue na lete caqami';

sco'taxat qami' quená'ogue na rishilli'i'.

₂₆Ỹim so'uet quiyim 'ue ca imit na nasauaxaset 'nejem quesom

chaqai na naqataxac lo'ollipi 'nejem na' ñaqai 'avichiguiñi.

Ma' ime quiyim so'uet na'maxare, ca lotqai liỹa qohinac caqami'

na'a' ỹo'ueetetac da ỹa'maqachiguiñi, na'a' Jerusalén qamaxarai.