So Jesús netaxaỹaxanqajnec quiyim qaretaxaỹa'pegue' ñi qota'a, 'nejem na'le so Melquisedec
1So Melquisedec nasho' na'le quiyi Salem chaqai letaxaỹaxanqajnec na qomyipi quena' qaretaxaỹa'pegue' ñi qota'a ñí'maq ỹapacauec. Co'na' so Abraham rapil queso lauataq só'maq huaugui na' ỹalauat so nashillipi, ca' so Melquisedec ỹanaxachi'chiguit so Abraham, ca' ỹaanem da nqouagaxa. 2Ca' so Abraham ỹaanem 'óna queca diez louootaxanaxat ỹachigoxotaugui so lauataq. Ca' dajo neenaxat Melquisedec, dajo 'auaxaic 'naac “nashi naloochiguiñi da no'ueenataxac”; chaqai, ma' so'maxare nasho' na'le quiyi Salem, ca' dajo Salem 'naac “neuagaxa”, ca' dajo neenaxat qai'neeta 'naac “nashi queda neuagaxa”. 3Ca so'maxare re'oq quiyim qaica ca leta'a, chaqai aca late'e, chaqai quecá'maq 'auaxaic leta'allipi. Chaqai se qaỹa'xat quiyim ne'qaañi, chaqai quiyim ileu. Ca chaqaida dá'maq 'neeta so'maxare, ca 'nejem da no'ueenataxac so llaalec ñi qota'a. Ca so'maxare se neme netaxaỹaxanqajnec quiyim retaxaỹa'pegue' ñi qota'a.
4Ca' nagui 'ajñii da lecaico' na'le so Melquisedec, ma' só'maq 'auaxaic qareta'a Abraham ỹaanem yi 'óna quecaua diez louootaxanqate' queso nashillipi queso lauataq. 5Qam quenaua laqataxaco so Moisés ilarelec na netaxaỹaxanqajanqaipi llaalqaipi so Leví quiyim naqata'a añi 'óna queca diez quena lalamaxaret na qomyipi, 'eno'm chi lqaỹarinquipi chaqai llaalqaipi so Abraham qai'neeta. 6Qam so Melquisedec, 'eno'm sqa chigoxougui so Leví ni'ic, qam no'lau'a añi 'óna quecá'maq diez lalamaxaret so Abraham só'maq icoñiguito' na'le so ỹachaxantac ñi qota'a. Ca' na'le, ca' so Melquisedec ỹaanem da nqouagaxa so Abraham. 7Ca' qaica quet cá'maq ỹoqolliguit dajo quiyim cá'maq ỹaan ca qouagaxa paguec lecaic quecá'maq nqouaguegue. 8Nagui quenauá'maq qomi' quená'maq naqata'a añi 'óna queca diez quena lalamaxaret na qomyipi, na'maxare chaqai qomyipi tai'a quiyim ileu. Qam quedá'maq 'neeta so Melquisedec, naua naneresañi na'qaatqa ỹa'xate' so'maxare quiyim 'ec ñaqaiso nca'leetauec. 9Chaqai nagui ishit qohinac quiyim so Leví, chaqai ná'ogue ná'maq netaxaỹaxanqajanqaipi llaalqaipi so'maxare, quená'maq nagui 'ue aca no'lau'a quena qomyipi, ishiueteno' na'le aso no'lau'a so Melquisedec, na' qaishiueten queso Abraham. 10'Nesa ma' llic quiyim na'maxare 'ec nachaatetauo qai'neeta queso Abraham, ma' hueetagui na loshicmaxa na llaalqaipi so'maxare na' saqa' ne'qaañi, na' qaỹanaqta'guit queso Melquisedec.
11Na llaalqaipi so Israel na' icoñiguit so naqataxaquipi, qam chicqotougui nqohin so netaxaỹaxanqajanqaipi llaalqaipi so Leví, só'maq qai'neeta llaalqaipi so Aarón. Ca vichiguiño' quiyim najo netaxaỹaxanqajanqaipi quetqai ishito' quiyim nalogoñi 'maxaraic nqai'en da no'ueenataxac ná'maq queeta'pegue' na naqataxaquipi, ca se qaipacaque quet ca liỹa netaxaỹaxanqajnec sqai 'nejem da no'ueenataxac so Aarón, ta'ta'a quiyim 'nejem da no'ueenataxac so Melquisedec. 12Ma' quiyim qaỹadalaxat ca netaxaỹaxanqajnec, ca' qai'neeta ỹouen quiyim qaỹadalaxat na naqataxaquipi. 13Ca' so qara'gaxala' só'maq ỹiquesapega naua naneresañi na'qaatqa na' 'naac dajo, so'maxare chicqaugui so liỹa ni'ic llaalqaipi so Israel, qam queso'maxare qaica quet ca chicqaugui quiyim netaxaỹaxanqajnec. 14Ma' ỹaatqajam qaỹa'deenta quiyim so qara'gaxala' chigoxougui so Judá ni'ic, qam so Moisés qaica ca 'naac na'le quesojo ni'ic na' ỹa'xat da 'neeta na netaxaỹaxanqajanqaipi.
15Ca' quedajo, ca' paguec ỹaatqajam ỹaatqata quiyim só'maq dalaxaic netaxaỹaxanqajnec re'oq, 'nejem da no'ueenataxac so Melquisedec. 16Qam se ỹovira'a quiyim netaxaỹaxanqajnec chicqochigui ca naqataxac quiyim ỹa'xat negue' ca ni'ic chicqaugui ma'le, ta'ta'a ca lquesaxanaxa ca chaalataxac qaica ishit ỹomat. 17Ma' dajo dá'maq 'naac na'le ñi qota'a queso'maxare:
Se neme quiyim qami' netaxaỹaxanqajnec,
'nejem ma'le da no'ueenataxac so Melquisedec.
18Ca só'maq 'auaxaic nelaataxanaxac qanosogoñi, ma' qaica quet cá'maq lquesaxanaxa chaqai qaica quet cá'maq 'negue. 19Ma' so naqataxaquipi chicqo'ot so Moisés qaica quet cá'maq ỹa'maxajñi. Qam nimiiñiguit nqohin da qanaquitaxac, ca' paguec loyac, ca chaqaida chicqochigui quiyim seshitaq ñqo'naxau'a ñi qota'a.
20Ca' ñi qota'a na' ỹo'uet dajo, ca nallitalta' quiyim ipacqajanchigui da la'qaatec. 21Na liỹa netaxaỹaxanqajanqaipi qaica ca qai'taxajñi quiyim qaipacqajanchigui ca na'qaatec. Qam quedá'maq dajo, ca 'uo' na'le so na'qaatec quiyim ỹaatqajam qai'taxajñi quiyim qaipacqajanchigui. Ma' quiyaua naneresañi na'qaatqa qohinaco' na'le:
Ñi qara'gaxala' nanecalta' quiyim i'taxajñi da la'qaatec, ca' sqaica ma' ỹadalaxat quet co'na' 'naac:
“Se neme quiyim qami' netaxaỹaxanqajnec,
'nejem ma'le da no'ueenataxac so Melquisedec.”
22Vichiguiño' so Jesús chaqaiso só'maq i'taxajñi dá'maq 'maqataxac paguec loyac queso 'auaxaic. 23Só'maq liỹa netaxaỹaxanqajanqaipi ỹoviretalco' quiyim 'xoic, ma' ileueta'oguit, ca' se ishit quiyim queeta. 24Qam ma' so Jesús tot ileu, ca' se ishit quiyim 'ue quet ca liỹa taalec quet yi lo'ueenatec quiyim retaxaỹa'pegue' ñi qota'a. 25Vichiguiño' ishit quiyim qaica lqodoc nqai'en da lca'laxa ná'maq ỹachigoxochichigui so'maxare quiyim nqo'neu'a ñi qota'a, ma' so'maxare tot ileu, ca rashiilaxanlec quiñi qota'a na'maxare.
26Ca' vichiguiño' chaqaiso so Jesús só'maq 'oonoqui' qaretaxaỹaxanqajnec souenqataque quiyim retaxaỹa'pegue' ñi qota'a. Ma' so'maxare co'teeta, qaica ca se no'uen chaqai ca lasauaxaset, qaỹoỹootec quena sauaqhuaiquipi, chaqai qaỹavicshiguim paguec lishicshi'ma nqohin quena piguim. 27Mesqai 'nejem ná'maq liỹa lashi na netaxaỹaxanqajanqaipi, ma' na'maxare ỹouen quiyim ỹalauat na iseripi, ca ỹaantapego naua'que naua na'xata' quiyim ỹavigaxat ana lachitaxanataxanqate, qaiyi qaỹapalaxate' naua chi lasauaxasete', ime, ca lot qalam na lasauaxaset na qomyipi. Qam so Jesús imaauec 'oonoqui' ỹaano so lachitaxanataxanaxat na' ỹaano dá'maq chi nachaalataxac. 28Da naqataxaquipi chicqo'ot so Moisés ishit ỹanashiguim ca qom saqa' nalogoñi co'it. Qam dá'maq ỹaanec la'qaatec na'le ñi qota'a, na' ime'uegue so naqataxaquipi, ca ỹanashiguim quiyim nashi quena netaxaỹaxanqajanqaipi so llaalec só'maq qaica ca lasauaxaset.
