1Ca vichiguiño' 'maxaraic quiyim qolqata, qaiyi sovirqata'a quiyim ỹiite' qomi'. Le'en dá'maq 'auaxaic qanapaxaguinataxac queso Cristo. Sqai pilac sa'xataxe' da 'neeta ca qom quiyim netogochigui na lauel queda 'auaxaic no'ueenataxac ma' tai'a da lelauaxa ca'maxare, chaqai queda npi'ỹaxac quiñi qota'a, 2chaqai da llicyaxac quiyim qanachilaxan ca qom, chaqai dá'maq quiyim qaỹashil-lec ná'maq mashic icoñiguit da na'qaatec, chaqai quiyim pilac qanca'laxatec na leuaxaiquipi, chaqai ma' qanimit ná'ogue najo. 3Ca' qolqatalec dajo, no'm chaqaiyi ỹa'maxarenta ñi qota'a.
4Ma' ná'maq mashic shi'gue icoñiguit quiyim qaicoỹarelec da la'deenataxanaxac, chaqai mashic shi'gue i'guentac cá'maq lame ñi qota'a, chaqai mashic ta'ñigui so Espíritu Santo, 5chaqai mashic ỹa'yiinchigui da no'uen la'qaatec ñi qota'a chaqai da lquesaxanaxa cá'maq 'laua ñaqa naata, 6ca najo qomyipi, no'm liỹa pilac inoxonec, ca' tot ishit liỹa netogochigui lauel nqohin, ma' chaqaina ná'maq liỹa patentapego so llaalec ñi qota'a chaqai nachaxanta quiyim i'neetac. 7Ca' na'maxare 'neetari' na 'laua quiyim ni'chigui na ỹaxat quena' taalec. Ca no'm cajo 'laua lo'yaxanec ca laỹaxac ana la ca nanecsec quecá'maq ro'ueenataxanteguelec, ca' cajo 'laua icoñiguit da lqouagaxa ñi qota'a. 8Qam no'm quecajo 'laua ñaxat ana le chaqai ana peue, ca' qaica ca 'negue. Ca tai'a quiyim qaỹa'ue ca nouaxanaxaset quiñi qota'a, chaqai ma' ime, ca' qaỹavigaxat.
Da qanaquitaxac dá'maq ra'ñichiriñi nqai'ne' qomi'
9Qamiri ỹaqaỹarolqa, 'eno'm shinqa'tegue dajo da qaretaxaỹaxac, qam quená'maq qamiri ỹaatqajam chalego lecaic da nqouagaxahi liỹaata'ñi' nqohin da nca'laxa. 10Ma' ñi qota'a ỹaatqajam ipaquichigui nqai'en da la'qaatec, chaqai se coua'e dá'maq 'ñiitari' ma' chaxañita da re'xorenataxanaxahi quiñi'maxare quena' tauañii na qarqaỹaripi qarpi'ỹaxauaripi, dá'maq ñaqaida quiitalec 'viichitac. 11Qam sahoqotaque quiyim quiñi 'óna caqamiri queetalec dajo, ỹovireta'a nqai'en ca lqodoc quiyim chaqaidaata 'neetari', qaiyi ipaquichigui nqohin ná'ogue ná'maq naquichitaque. 12Se sahoqotaque quiyim reualliñi. Ta'ta'a quiyim quiitalec denaxachii só'maq chicqochigui nqai'en da lpi'ỹaxac chaqai da leualaxavic, ca' ỹaconta'piguit dá'maq lalamaxaret ỹachaxantac ñi qota'a.
13Ma' ñi qota'a na' 'ue da ỹachaxan queso Abraham, quiyim i'taxajñi, ca' ñi'maxare chi nanecalta', ma' qaica quet cá'maq liỹa paguec lecaic quiyim ỹiga quet. 14Ca 'naaco': “Ỹaatqajam llic chalego lecaic ma'le da ỹoqouagaxa caqami', chaqai 'xoic ca qachaalaxai'pi sa'ue ma'le.” 15Ca' so Abraham ỹaatqajam shi'gom rauaanaxantac, ca vire'to' na' icoñiguit só'maq ỹachaxantac ñi qota'a. 16Na qomyipi quena' i'taxajñi da la'qaatec, ca' 'ue na ỹiguelec quená'maq paguec lecaic quena'maxare. Chaqai no'm ỹaanec ca la'qaatec, ca' qai'taxajñi ca qaipacqajanchigui. Ca' qaica quet cá'maq liỹa qaỹa'xat. 17Vichiguiño' ñi qota'a nanecalta' co'na' i'taxajñi da ỹachaxantac, ma' ỹahotaque re'qoota nqai'en quená'maq icoñiguit ma'le cá'maq lalamaxaret qaỹachaxantac, ca ñi'maxare ỹahotaque quiyim ipaquichigui nqai'en cá'maq ỹachaxantac, se ỹadalaxat ca la'qaatec. 18Ca' chaqaida dá'maq 'neeta quiyim 'vii naua dos quiyim se ishit quiyim 'ue ca qaỹadalaxat, ca quenaua'maxare, ca ñi qota'a se ishit na'majan. Ca' quedaua'maxare, ca' ñi qota'a ỹo'uet quiyim ỹa'maxaguilo qovilli', ca ña'ñaxatqachiguiñi, ma' mashic shi'gue sedaanqataque quiyim quepaqataxanlgoto qomi', ca' seuaqlec quedá'maq qanaquitaxac ỹaanema qomi'. 19Dajo qanaquitaxac chaqaida dá'maq ra'ñichiguiñi chaqai nolliichiguiñi da qanachaalataxac, 'nejem aca nollaañi aca qom lahi' huaxaỹaqse. Dajo qanaquitaxac que'eentau'a cá'maq pa'aauo queca lapoxot aca no'ueenaxanaxaqui neeta'gue da piguim, 20só'maq inoxonouguio' na'le so Jesús, ca' ỹauategue ca qoyic. Ca' chaqaida 'neeto' na'le so Jesús, ca' ỹovira'a quiyim qaisoota qaretaxaỹaxanqajnec quiyim retaxaỹa'pegue' ñi qota'a, 'nejem da no'ueenataxac na'le so Melquisedec.
