So Jacob ỹaanem da no'uen llicyaxague' saua Efraín chaqai so Manasés
1Ca' quesaua liỹa' na'xata', ca 'uo' so la'xaỹaxac so José quiyim so leta'a ralola. Co'na'le, ca' so José eec ra'ajnaxana, ỹauegue' saua dos llaalqa Manasés chaqai so Efraín. 2Ca co'na' qaỹa'ue da la'xaỹaxac so Jacob quiyim so José ỹoviro ra'ajnaxana'a, ca so'maxare chi na'ñaxateta nqa'aamñi queso lomala'. 3Ca 'naaco' queso José:
—Ñi qota'olec ñí'maq sqaica lqalanec nachaxana ỹim na'le quiyi na'a' Luz huaugui yi 'laua Canaán. Ca' nañaañim da no'uen la'qaatec. 4Ca da la'qaatec 'neetasa': “Aỹim saanem ma'le qami' ca 'xoic qachaalaxai'pi. Ca' cajo qachaalaxai'pi chicqaugui ca ỹoreta'oguit qomyipi. Chaqai cajo qachaalaxai'pi saanem quiyim lalamaxaret ma'le najo 'laua, qaica ca rouootaxana'gue.” 5Hua', ca nagui naua qachaalaxahi' Efraín chaqai Manasés nauá'maq ne'xaỹoqsoqote' najo Egipto na' saqa' ñovita qami' quenajo 'laua, taỹoto aỹim naua'maxare, quiyim ỹalamaxarete' 'neete'm saua Rubén chaqai so Simeón. 6Ca cauá'maq dalaxaqa qachaalaxahi' ma'le, ca' ralamaxarichichi', ca ma' lqaỹa' naua Efraín chaqai Manasés, ca nouandau'a ma'le ca qaỹaqatqajantari' nesallaxa. 7Ca na' sachicqota'gue da Padan-aram, ca sou ayi qachii'i' Raquel quiyi Canaán na' sepalqata'a yi Efrata. Ca seshinñi na'le queso nayic lahi taỹau'a yi Efrata yí'maq nagui leenaxat Belén.
8Ca na' so Israel ra'ỹauguilo saua llaalqa so José, ca renataxano', 'naaco':
—Qam dauajo, ¿negue' daua'maxare?
9—Nauajo nauá'maq ỹaalqa nañaane' na'le ñi qota'olec quena Egipto —'naaco' so José.
Co'na'le, ca 'naaco' so leta'a:
—Qouaquiric, liỹa nqo'naxachiro caỹim, qaiyi saanema da no'uen llicyaxague'.
10Ca' so Israel mashic qo'xoỹom, ca tot qailligueme' no'viiñi naua nqote', sqai ỹaatqajam nauanchiguiñi. Ca' so José nqo'naxatero saua ñaaqolqai' queso leta'a, ca so'maxare qa'aalguelo chaqai nqo'goxe'. 11Ime, ca 'naaco' queso José:
—Tot sahotaque quiyim liỹa quet sauañiraxaua'. Qam ñi qota'olec ỹa'uo' quiyim seuanalo qai'neeta naua qachaalaxahi'.
12Ca' so José naqata'alo saua ñaaqolqai' quenaua loteletari so leta'a. Ca' ỹa'dooto naua le'cootal, ỹoviraqta'guit na latap na 'laua. 13Ime, ca iconeu'alo saua llaalqa, so Efraín pa'xana'gue da loic, chaqai so Manasés queda nemaq, ca' nqo'naxatero queso leta'a. Ca' so Efraín pa'aata'gue da nemaq so Israel chaqai so Manasés queda loic. 14Qam co'na' ỹashilgoto saua'maxare so Israel, ca nemeenta' nqai'ne' saua lqai'laqate'. Ca' queda loic ỹashil-lec na lqahic so Efraín só'maq paguec na'aasa, ca da nemaq ỹashil-lec na lqahic so Manasés 'eno'm chaqaiso só'maq paguec ỹi. 15Ime, ca' ỹaanec da no'uen la'qaatec queso José, 'naaco':
Ñí'maq qota'olec ñí'maq huelec so ỹapi' Abraham chaqai so ita'a Isaac,
ñí'maq qota'olec ñí'maq quepaqataxanteguelec aỹim
shi'gue na' ñaq ñi'xaỹañi,
16ñí'maq qota'olec lelaatec piguim le'ec,
ñí'maq ro'ootaxanteguelec aỹim quená'ogue na se no'uen,
ñi'maxare no'ueenaxat ca llicyaxague' nauajo ñaaqolqa.
Chaqai quiyim chicqochiguilo naua'maxare quiyim se qaicoua'e da ỹeenaxat
chaqai da leenaxat so ỹapi' Abraham chaqai so ita'a Isaac.
Chaqai quiyim 'xoic ca llaalqaipi naua'maxare quena 'laua.
17Qam so José 'ec se ỹa'maxañi nqai'en dá'maq 'ne'tegue so leta'a quiyim ỹashil-lec na lqahic so Efraín queda loic. Ca' icono' da lqai'laxat so leta'a, ỹahotaque se qaỹashil-lec so Efraín, ca qaỹashil-lec so Manasés. 18Ca 'naac:
—'E', qami' ita'a. Najo 'e'. Najo ná'maq paguec ỹi. Shillirelec na lqahic queda rqai'laxachi' qatoiqui' na'maxare.
19Qam so leta'a se ỹa'maxaren. Ca 'naaco':
—¡Shi'gue sa'den, qami' ỹaalec! Qam na'maxare qai'neeta ỹovira'a ma'le quiyim 'xoic ca llaalqaipi. Qam najo lqaỹa paguec na'aasa paguec qaimaqachin ma'le, chaqai ỹovira'a quiyim 'xoic ma'le ca llaalqaipi chicqochigui ca ỹoreta'oguit qomyipi.
20Ca' quesojo na'xa'a, ca' so Jacob ỹaanema saua'maxare da nqouagaqa', 'naaco':
—Na llaalqaipi na Israel ỹouen ma'le da qadeenaxachii quiyim ỹaanec ca no'uen ñicyaxac, chaqai qohinac: Ñi qota'olec 'ne'tegue caqami' dá'maq 'ne'tegue na'le queso Efraín chaqai queso Manasés.
Ca' da 'ne'teco' na'le so Israel 'au nqai'en so Efraín queso Manasés. 21Ime, ca 'naaco' queso José:
—Ỹim mashic ỹovita quiyim yileu. Qam ñi qota'olec no'ueena'guita qamiri, chaqai ỹopilaxatalo qamiri ma'le yi na'laua so 'auaxaic qareta'allipi. 22Ca' qami' paguec ca saañiraxarom quena rqaỹachi'ipi: saanem qami' yi Siquem yí'maq souootaxana'gue na'le queso amorreo laseripi na' ñalauateta'pegue'.
