Qaiuana da nouaxanaxaset yi Jerusalén
1Ime, ca' sa'xaỹaque so nivillaxac 'xoic da lelamaxa, conaato'ogue ñi ique'la lauac, 'naac: ¡Mashic novite' nauá'maq ỹo'ueete' da nouaxanaxaset najo na'a', quiñi 'óna lo'qoota'a na lo'goxonaxat lopoxoiqataxanaxat!
2Ca na'le, ca seuane'talo saua seis ỹale' inoxondo quiñi lasom pa'aauo reloqota'gue da rapiguim, quiñi 'óna lo'qoota'a na nepon queda lqai'laxat. Quena lavinñi' saua ỹale' hueetañigui so liỹa saua loho nodaachiriñi lino, so'maxare nishitetañi so louenqaipi quiyim deraxan. Ca na' ỹovijta ada ncopatoxonaxalate bronce, ca' huere'e. 3Ca na'le da lauaq ñi qota'olec quiyi Israel quelgoto saua ise' 'vii laua' quiyí'maq hueeta'ñi, ca ỹalamaxata'a ñi lasom ñi no'ueenaxanaxaqui. Ca' ñi qara'gaxala' roỹaxana so ỹale ỹansañi saua noho lino só'maq nishitetañi so louenqaipi quiyim deraxan. 4Ca 'naapega: Quirougui na na'a' lodegaxat Jerusalén, ca' vite ca retanqui' quena latap cá'maq 'ue ca lachicoxo chaqai da nqui'ic quená'ogue ná'maq qanaqaica'a qaỹo'ueetetac quiyi'maxare.
5-6Ime, ca' sa'xaỹa ñi qara'gaxala' quiyim 'neetapegalo saua liỹa' ỹale': Co'uaachilec so'maxare, quiugui na na'a' lodegaxat, 'auaxañita ñi ỹo'ueenaxanaxaqui, qaica ca rqouaguigue, lauachii na qo'xoiquipi chaqai na ne'naqaipi, nequetegaxaipi, ñaaqaipioqui' chaqai na 'aallipi. Qam se quelolliỹa ná'maq 'ue na netanec.
Ca saua'maxare ỹa'auaxanchiriñi so qo'xoiquipi hueeta'gue da reloxoỹa'gue ñi no'ueenaxanaxaqui.
7Ime, ca 'naapegalo: Quiipegue' ñi no'ueenaxanaxaqui, ca na'axachii, no'xataxachilec yi nasoxoc quena leuaxaic.”
Ca saua'maxare que', nalauachiñi na qom quiyi na'a'. 8Ca na' saua'maxare ỹo'ueetesac dajo, ca ỹim yo'ueenañi qaỹimeta. Ca ñqa'paxañiguit na 'laua, soviraxatañi na ỹatap quena 'laua. Ca' paguec da nqui'ic caỹim, ca yaualaq, shinac: “Qami' qara'gaxala', ¿ỹaatqajam machiralec da qavilli' na Jerusalén vi'saque quiyim nomachiriñi naua sqo vito'olqai' quena Israel llaalqaipi?
9Ca' ñi qara'gaxala' 'naac caỹim: Da lasauaxaset na qomyipi quena Israel chaqai na Judá ỹaatqajam chalego lecaic. Na na'laua no'qajlec quena nalauatec; na na'a' lodegaxat no'qaachigui quena se no'uen. Ma' 'neetapega quiyim mashic shique'e najo 'laua chaqai quiyim 'neetapega se seuana na ỹo'ueetetac. 10Qam sqaica ca iqouagaxa ma'le quiyi'maxare, ta'ta'a quiyim sa'ue ca nqa'viic, chi ỹovireta'a ma' ỹa'xat dá'maq 'neetari'.
11Ca na'le, ca noviro só'maq ỹale imerañi saua loho lino, só'maq i'xateta so louenqaipi quiyim deraxan, ca 'naac queso qara'gaxala': Mashic somat dá'maq yilachirelec.
