Qaiuana dá'maq se qanqo'ta ỹo'ueetetaco' quen yi Jerusalén
1Quesaua cinco ñaxari, cinco shiriguiri chaqai cinco na'xata', ca' ỹim ñqa'xantañi quiñi iuo', llapoota'guita so qo'xoiquipi quiyi Judá. Ca' chi ne'laqataxanchiguiñi ñi qara'gaxala' ỹashil-lec aỹim, 2ca' 'ue so seuane'ta 'ec qom. Quedá'maq ta'anquira quena lasot 'ue so seuane'ta 'ec norec, ca' queda taashi'mquera, ca' qashilec 'ec na lecat lahi nqueuoguecsec qashilec nqohin. 3Ca' so ỹale ỹeguec so 'ec lqai'laxat, ca' iconougui na iue. Ca na'le da lquesaxanaxa ñi qota'olec, ca yi'xajshiguim. Ca' 'ue so iuanaxanaxac chicqo'ot ñi qota'olec yi'xategue da Jerusalén, ca yilla'ñi ñi lasom pa'aauo quiyi na'a' reloqota'gue da rapiguim yí'maq hueeta'ñi so nashiilec só'maq ỹo'uet da lauel ñi qara'gaxala'. 4Ca' yi hueeta'ñi da lauaq ñi qota'olec quiyi Israel, ca' chaqaida 'neeta na' seuana queso quemarelec. 5Ca na'le, ca' 'naac caỹim: Ñaq ra'itegue da rapiguim.
Ca' ya'igue da rapiguim, ca' quiñi ñigo lasom huaqate'e' ada ncopatoxonaxalate, ca seuane'ta so nashiilec ỹo'uet da lauel ñi qara'gaxala'.
6Ime, ca 'naapiguiỹa': 'Ajñi' ná'maq se yqo'ta ỹo'ueetetac na Israel llaalqaipi, chaqaina ná'maq 'em shique'e ñi co'teeta no'ueenaxanaxaqui. Qam qaiyiita 'ue yi liỹa huañita ma'le paguec la'aaxa.
7Ime, ca' yauega yi ñigo quiyi nasoxoc. Ca' quiyi napoxonaxat re'qoota 'ue ñi lauago. 8Ca 'naapiguiỹa': Lateetaxachirigui ñi lauago yi napoxonaxat.
Ca' ỹim llateetaxachigui ñi lauago, ca seuane'ta so ñigo. 9Ca na'le, ca 'naapiguiỹa': Noxoñiro, ca' huañita ma'le ná'maq yaqaica'a qaỹo'ueetetac quiyi'maxare.
10Ca na' senoxono, ca seuane'ta na ỹoreta'oguit iseripi nadenqatec qaỹa'meenta: 'ue na nanaic chaqai na liỹa iseripi se no'uen, chaqai ná'ogue na ỹoreta'oguit lashiilqaipi yi qomyipi quiyi Israel, ỹovirauec so napoxonaxat. 11Ca' setenta so qo'xoiquipi llaalqaipi so Israel nqouagaxaintacot so nashiilqaipi, ca' queso qomyipi ỹalequetaugui so llaalec so Safán, leenaxat Jaazanías. Sá'ogue quiñi 'óna lo'qoota'a na lichiinaxanaxat, ca' so'maxare chicqaugui so lecaugui lesalaxaripi so lichiinaxanaxat.
12Ca 'naac caỹim: Huañita dá'maq ỹo'ueetetac nañoxotetañi na qo'xoiquipi quena llaalqaipi so Israel, quiñi 'óna neetaugui ñi lauo'oqui' na lashiilec, 'neetapega se seuana chaqai quiyim shique'e na na'laua.
13Chaqai liỹa 'naac: Qaiyiita huañita ma'le dá'maq paguec la'aaxa ỹo'ueetetac.
14Ca' yauega ñi lasom ñigo quena' qainoxona'a ñi no'ueenaxanaxaqui quiñi qara'gaxala' reloqota'gue da rapiguim. Ca' quiyi, ca' neesa'ñi saua 'aalo nqa'xansañi, noỹenta'pe queso 'nerac qota'olec Tamuz. 15Na'le, ca 'naapiguiỹa': ¿Huañita najo? Qam qaiyiita paguec la'aaxa ca huañita ma'le.
16Ca na'le, ca' yauega'a yi pa'aauo nasoxoc ñi no'ueenaxanaxaqui quiñi qara'gaxala', ca quena' qainoxona'a yí'maq ỹaatqajam co'teeta, nqai'queetañi reloqota'gue da lqodoigue 'uo' ca veinticinco so ỹalliripi ỹodootañi na latap hueetañiguilo naua lavinñi' saua nasoxoc chaqai aso ncopatoxonaxalate, nqouagaxaintacot añi ra'aasa. 17Ca na'le, ca ñi qara'gaxala' 'naac caỹim: 'Ajñi', 'eco' se nalogoñi nqai'en dajo na qomyipi quiyi Judá, quiyim ỹo'uet dajo ỹaatqajam se yqo'ta, chaqai no'xataxajlec na 'laua quiyim se ra'maqataxan. Ỹopilaxateta'gue ca ỹo'ueetetac da ỹonogoxonaxac, ca ỹo'ueetetac quiyim na le'ne' ỹoviro'ot na imic. 18Qam nagui so'uet da ỹonogoxonaxac. Ca' ỹim sqaica ma' yqouaca'gue quet yi'maxare. 'Eno'm roỹaxantaque aỹim ỹaualqatagui, qam se ña'xaỹaxana.
