Ezequiel 18

₁Ñi qara'gaxala' noviriua', ca 'naac caỹim: ₂¿Chi'negue ma' quena Israel sqai ỹaxanñi da lliguec na la'qaatec quena' 'naac: Na neta'allipi ỹa'ic ana 'uva lochiviaxai, ca' na llaalqaipi ỹa'que'teguelo naua loue? ₃Ỹim na'gaxala', ñallitalta' queda ñachaalataxac quiyim qaica ma' liỹa quet qaỹopilaxata'gue dajo na'qaatec quena Israel. ₄Ỹim ỹaatqajam ỹalamaxaret ná'ogue na ỹoreta'oguit qomyipi, ca neta'a chaqai ca llaalec. Cá'maq 'ue ca lasauaxaset, ca' chaqaica ileu.

₅Cá'maq 'maxataxaraic ỹale chaqaica cá'maq ỹo'uet ca lo'yaxanec chaqai ca ỹa'maqachiguiñi: ₆ma' ca'maxare se ỹalecapegueu'a na nqui'ỹaxaquipi quenaua quemaralgoto quiyim qaimaqachin na nashiilec nqolaquipi, chaqai se pi'ỹa'a ná'maq qohinac qota'olqaipi quena Israel; chaqai se rouootaxana'gue aca loua ca liỹa, chaqai se nanoiquiñiguit aca loua no'm 'ue lqalaic; ₇sqaica ca pataxañi, ta'ta'a quiyim ỹopilaxatem cá'maq 'ue aca la'uale cá'maq icoñiguit louenec queca'maxare; qaica ca rocachot; chaqai nouante'e' cá'maq qopat chaqai ỹa'ue ca looỹac cá'maq neetauec; ₈se ra'ualaxanaxanot aca lam quiyim 'ue ca ỹahotaque, chaqai se ỹa'ue aca lauegue acá'maq lam ỹaanec; sqaica ca ỹo'maqajnac quená'ogue, ỹaatqajam se ỹo'maauec quena' imit ca lasauaxasete' caua liỹa'; ₉ca'maxare ipaquichiguilo nqai'ne' naua ilaataxanaxaco chaqai naua ỹaqataxaco. Cajo ỹale chaqaica cá'maq ỹaatqajam na'maxateta, vichiguiño' nca'leuec ma'le. Ỹim na'gaxala', se'taxajñi da ỹa'qaatec.

₁₀Qam cajo ỹale, no'm 'ue ca llaalec se ra'maqataxan chaqai lauataxanaxai, canchaqaica ỹo'uet dajo ₁₁quiyim só'maq leta'a se ỹauanapega ỹo'uet, dá'maq quiyim nalecqajno queca nqui'ỹaxaquipi quena' qaỹo'uet quenaua quemaralgoto quiyim qaimaqachin na nqolaquipi, chaqai quiyim rouootaxana'gue aca loua ca liỹa, ₁₂quiyim pataxañi ca 'xoraic chaqai cá'maq 'ue ca louenaxanaxa, chaqai rocachot na liỹaripi, chaqai se ỹopilaxat ca louenec cá'maq 'ue aca la'uale, chaqai 'ue da lpi'ỹaxac quena qohinac qota'olqaipi chaqai ỹo'ueetetac ná'maq se yqo'ta, ₁₃cá'maq ra'ualaxanaxanot aca lam quiyim qaỹouen chaqai nallijlec quiyim ỹa'ue aca lauegue, ca' cajo ỹale se ishit quiyim nca'leetauec, ma' ime quiyim ỹo'uet ná'ogue ná'maq se yqo'ta, ca' ileu ma'le. Ca' chaqaica ỹo'uet dá'maq chi lelauaxa.

₁₄Sqoue quiyim cajo ỹale 'ue ca llaalec iuana dá'ogue dá'maq ỹo'ueetetac se no'uen so leta'a, qam sqai que'uegue dá'maq 'neetari'; ₁₅quiyim se nalecqajneu'a na nqui'ỹaxaquipi qaỹo'ueetetac quenaua quemaralgoto quiyim qaimaqachin na nqolaquipi, chaqai se pi'ỹa'a na qohintapega qota'olqaipi quiyi Israel; chaqai se rouootaxana'gue aca loua ca liỹa, ₁₆chaqai sqaica ca pataxañi; chaqai qaica ca ñiguit nqai'en ca louenec cá'maq 'ue aca la'uale; quiyim qaica ca rocachot, ta'ta'a quiyim nouante'e' ca 'ue ca louenaxanaxa, chaqai ỹaanem ca looỹac cá'maq neetauec; ₁₇quiyim ỹa'maxate'tegue ca liỹa chaqai se ỹa'ue aca lauegue quiyim 'ue aca na'uale lam; chaqai ipacqajanchiguilo naua ỹaqataxaco chaqai ỹo'ueete' naua ilaataxanaxaco: ca' cajo ỹale se ileualec ca lasauaxaset so leta'a, ta'ta'a quiyim ỹaatqajam nca'leuec.

₁₈Ca' só'maq leta'a quiyim pataxasoxonaxai chaqai rocachi chaqai ỹo'uet dá'maq se no'uen queca lauo', ca' ileu chi nouaxanaxaset quecá'maq lasauaxaset. ₁₉Ca' qamiri nataxañii ma'le: ¿Chi'neco' ma' se ishiueten so llaalec cá'maq lasauaxaset so leta'a? Sá'ic, ma' só'maq llaalec ỹo'uet dá'maq no'uen chaqai da ỹa'maqachiguiñi, chaqai ipacqajanchiguilo naua ilaataxanaxaco chaqai ỹo'ueete' naua ỹaqataxaco. Vichiguiño' ỹaatqajam nca'leuec ma'le. ₂₀Ca' qaicaata cá'maq 'ue ca lasauaxaset, ca' ileu. Ca ñaalec se ishiueten ca lasauaxaset ca leta'a, chaqai ca neta'a se ishiueten ca lasauaxaset ca llaalec. Cá'maq ỹo'uet ca ỹa'maqachiguiñi, ca' icoñiguit cá'maq la'maxa da lo'ueenataxanaxac; chaqai cá'maq hualoxonaq, ca' 'ue ca nouaxanaxaset da leualoxonqaishic.

₂₁Chaqai ca hualoxonaq, no'm ỹaxanñi dá'maq se no'uen ỹo'ueetetac, ca ipacqajanchiguilo naua'que naua ỹaqataxaco chaqai ỹo'uet cá'maq ỹa'maqachiguiñi, ca' ỹaatqajam lliqueta nca'leuec, ca' se ileu. ₂₂Ca' ỹim tot so'leenta'a cá'maq se no'uen ỹo'ueetetac, ca' ca'maxare nca'leuec, ca' se ileu, ma' ỹo'uet dá'maq ỹa'maqachiguiñi. ₂₃Ỹim se yqo'ta quiyim ileu ca hualoxonaq, ta'ta'a quiyim netogochigui lauel, na'maxateta, qaiyi nca'leuec. Ỹim na'gaxala', se'taxajñi da ỹa'qaatec.

₂₄Qam no'm cá'maq ỹo'ueetetac ca ỹa'maqachiguiñi, ca' ỹo'uet ná'ogue na se no'uen ná'maq se yqo'ta lo'ueenataxanaxac ca hualoxonaq, ¿'neetapiguio' qavillii quiyim nca'leetauec? 'E', ma' ỹim tot so'leenta'a cá'maq no'uen ỹo'ueetetac, ta'ta'a quiyim ileu sauaxat quiyim se ỹaqamaq chaqai quedá'maq se no'uen ỹo'ueetetac. ₂₅Ca' qamiri 'ñiỹac quiyim ỹim se ỹa'maxañi dá'maq so'ueetetac; qam ñaq na'xaỹaxañiñi qamiri qomyipi quena Israel, ¿qamiri 'neetapigui qavillii quiyim se no'uen dá'maq shi'ntegue? Ca ¿mesqaido' dá'maq 'ñiitari' quiyim qamiri se no'uen dá'maq 'viichitac? ₂₆No'm ca 'maxataxaraic ỹaxanñi quiyim ỹo'uet ca ỹa'maqachiguiñi, ca' ỹo'uet dá'maq se no'uen, ca' ileu sauaxat dá'maq se no'uen ỹo'uet. ₂₇Qam no'm cá'maq hualoxonaq ỹaxanñi da leualoxonqaishic, ca' ỹo'uet cá'maq no'uen chaqai ỹa'maqachiguiñi, ca nca'laxatec da nachaalataxac. ₂₈Qam no'm ỹa'deena'uegue dá'maq se no'uen ỹo'ueetetac, ca' dá'ogue ỹaxanñi, ca' ỹaatqajam llic nca'leuec, se ileu.

₂₉Qam na qomyipi quena Israel 'naac ma'le quiyim se no'uen dá'maq shintari'. ¿Quiyim se no'uen dá'maq shintari'? Qam ¿mesqaino' ná'maq qomyipi quena Israel, ná'maq se no'uen da ỹo'ueetetac? ₃₀Ỹim semit quiñi 'óna caqamiri Israel laseripi, taachigui nqaishin cá'maq ỹo'ueetetac. Ỹim na'gaxala', se'taxajñi da ỹa'qaatec. 'Maxaraic quiyim chaqa'ma' 'xañiñi dá'maq se no'uen 'viichitac, qaiyi sqai soviỹalec, ca' chicqochigui ca re'xoriguii. ₃₁'Xañiñi ná'ogue ná'maq se no'uen 'viichitac caỹim, ca' dalaxachii da no'ueenataxaguii chaqai da ra'deenataxanaxaguii. Ca ¿chi'negue queta' rillivii, qamiri lalamaxarete' so Israel? ₃₂Ma' ỹim se sa'maxaren quiyim 'ue ca ileu. 'Xañiñi da se no'uen, qaiyi rca'lliiuec. Ỹim na'gaxala', se'taxajñi da ỹa'qaatec.