Ezequiel 16

₁Ñi qara'gaxala' retaqa, ca 'naac caỹim: ₂Qami' ỹale, 'ajnaxanaxañitegue yi Jerusalén ná'maq se no'uen ỹo'ueetetac. ₃'Ñiraco' ma'le quiyi'maxare: Ñi qara'gaxala' 'neetasa' da la'qaatec: Qami' Jerusalén, ỹaatqajam sqai 'chi' dá'maq no'ueenataxac só'maq chicqoiraugui, ma' ne'xaỹoxosqochi' yi 'laua Canaán; so qataa'i' chigoxougui na amorreoipi chaqai aso qachii'i' lauo' laseripi na hititaipi. ₄Queso na'xa'a na' ne'qa'iriñi se qaichaxaquio' so redami' lequet, chaqai se qarachilaxañi', chaqai se qara'miiñi' queso 'ue, chaqai se qaỹa'ue so lequet na qasochi'. ₅Ỹaatqajam qaica ca qaỹauaaque qami', ca' qaica ca qouaca'gue qami'. Queca na'xa'a na' ne'qa'iriñi, ca qaro'ueenaxachisañi queso no'ueenaxa, ma' qanaqaica'a qami'. ₆Ca' ỹim shique'tegueyi na'le, ca na' seuane'ta qami' chaxasoxoñi'sac, vi'sañigui ca reuoripi'i', ca so'uet quiyim rca'llirec. ₇Ca' da qachaxataxaqui' 'ec nqaishin ana qo'paq quena no'ueenaxa. Ca nqo'ñi'sashiguim, ca chi ỹoviretalec quiyim qami' late'ogue', ca' ỹaatqajam qami' 'aalo. Naua ro'viichi' ỹaatqajam ỹiqueterec, chaqai na qavi'i' ñaxat, qam ỹaatqajam ñi'sauec.

₈Ca lotqai liỹa shique'tot qami', ca' sa'ajñi'; ca mashic nalootañi pa'ii'. Ca' sepeguenlec qami' so ipo', ca' sapolec na roshicmaxa'e' neetauec na'le, ca' qami' ñapiitaxaua, 'ue na'le da qana'deenaxac caqami' quiyim qami' ỹalamaxarete. Ỹim na'gaxala', se'taxajñi da ỹa'qaatec. ₉Ca ñachilaxañi', ñquiỹouec so leuoripi caqami', chaqai socorelec qami' queso lo'daxaraic lahita; ₁₀sa'ue aso neloxoqui'i' lo'yaxanec na lashic chaqai sa'vii saua qapelachichi' ỹaatqajam lo'yaxanqa; chaqai sa'ue so nosaataxagui'i' chicqaugui na lino chaqai só'maq ỹaatqajam no'uen lo'lo neloxoquiriqui'; ₁₁chaqai sa'ue na no'ueetaxachi', sa'ue na rouaxashichi' chaqai ana rqola'e'; ₁₂chaqai sa'ue aso sanagui na rimiqui', chaqai sa'vii naua rishichii', chaqai sanagui na rqahiqui' asó'maq no'uen na'gaxalate nado'o. ₁₃Ca ná'ogue na no'ueetaxachi' nodaachiguiñi na 'oro chaqai na plata; chaqai na qatooỹaqui' nodaachiguiñi ná'maq no'uen lino chaqai lo'yaxanec naua lashiigo'. Chaqai 'qui'sac ná'maq no'uen pan chaqai rapic li'i chaqai na aceite chicqaugui ana oliva. Ca vichirau'a quiyim ỹaatqajam qami' lo'yaxana, chaqai vichirau'a quiyim qami' nashi na'gaxalate. ₁₄Chaqai vichirau'a quiyim qami' choxorai quená'ogue na ỹoreta'oguit qomyipi queda royaaqui'. Ỹaatqajam ralo'ichiriñi queda remaqachiqui' quená'maq no'ueetaxachi' sa'ue. Ỹim na'gaxala', se'taxajñi da ỹa'qaatec.

₁₅Qam neta'iseguelec dá'maq royaaqui', ca' nquipichira'pegue' dá'maq richoxoriqui', ca vire'ta na' vichirau'a quiyim qami' nanatqa lo'o', ca 'ỹaañirec na roshicmaxa'e' quená'ogue ná'maq ỹovira'a qami'. ₁₆Ca' quenaua neloxoquichi', ca 'viichi' ca nopele' na'daañi nqouagaxainaxagui'i' quena nqolaquipi quenaua quemaralgoto, ca' niyiquiñi'. ₁₇Ca' coñitalo saua no'ueetqachichi' 'oro chaqai na plata ná'maq saanem qami' na'le, ca chigoxochiraugui quiyim 'viichi' na radenqachiqui' ỹale, ca' niyiquiñichiguit na'maxare. ₁₈Ca ñi'riguilo naua neloxoquichi' lo'yaxanqa naua lashiigo', chaqai 'ỹaañitot na ñi'aceite chaqai na ichiinaxanaxat. ₁₉Chaqai na pan ná'maq saanem qami' na'le chicqaugui ná'maq no'uen 'aríña, chaqai na aceite chaqai na rapic li'i squi'ỹaxanta'pegue qami' na'le, ca' chitaxanataxañitegue quesaua'maxare, ca lo'daxaraic lahita so rachitaxanataxanaxachi'. Ỹim na'gaxala', se'taxajñi da ỹa'qaatec.

₂₀Chaqai qai'neeta coñitalo saua ỹaalqa caqami', ca 'ỹaañitoto na nashiilqaipi, qui'ỹaxañitegue na'maxare. Qam ¿ñaqai ñijiñi'saco' quiyim qami' nanatqa lo'o', ₂₁chaqai qai'neeta 'ỹaañirec so ỹaalqaipi, 'ỹaañirec quiyim qaỹalauat qaicopata'a, maqachiñi'sac na nashiilqaipi nqolaquipi? ₂₂Ca' queda qaica nqo'ta no'ueenataxaqui' ma' qami' nedequenaxai, ca' tot no'viñitegue dá'maq 'ñi'sari' quen na' ñaqai ñi'sauec quen chaxasoxoñi'sac vi'sañigui ca reuoripi'i'.

₂₃Dajo ỹim se'taxajñi, ỹim na'gaxala': ¡'Xoraiỹole qami'! Qam quená'ogue ná'maq se no'uen 'viichi'sac, ₂₄ca no'ueenaxachirelec quená'ogue ná'maq 'ue na no'ueenejlec quiyim nqouagaxaiñitot na nashiilec nqolaquipi, ca' quirelec da nedequenaxaqui'. ₂₅Ca' quena lqodoco na nayic, ca 'viichi' naua lomaate' da qatoiqui'. Ca' quedá'maq royaaqui', ca' ñigui nqai'ñi' quiyim se yqo'ta da no'ueenataxaqui', ma' ỹaxañisalec na roshicmaxa'e' quená'ogue ná'maq ỹoviro, ca' ỹaatqajam se neme da nedequenaxaqui'. ₂₆'Au niyiquiñichiguit na ra'aayaxaua'e' Egipto laseripi nedequenaxairipi, ca 'viichi' quiyim so'o, ma' mashic tot neme da nedequenaxaqui'.

₂₇Ca na'le, ca' ñanojshiguim da iqai'laxat, ma' sahotaque souaxañi'. Ca' sa'ue da re'xoriqui', tot sa'ue cá'maq viñisaque. Ca' saanougui qami' yi qomyipi filisteoipi, yi'maxare se nqo'ta qami' sauaxat dá'maq 'ñi'sari', qami' nayiloxo lahi'. ₂₈Qam se ỹa'maxagui qavilli' quedajo, ca' niyiquiñichiguit na Asiria laseripi. Qam qaiyiita se ỹa'maxagui na qavilli'. ₂₉Ca' qui'salec quiyim niyiquiñisa'piguit na Babilonia laseripi, yi'maxare naalec na nemeenaxaiquipi. Qam qaiyiita se ỹa'maxagui na qavilli'. ₃₀Ỹim na'gaxala', se'taxajñi da ỹa'qaatec: ¡Chalego' da ralolaxa añi re'taxanata'e' na' 'viichi'sac dá'maq loic aca nedequenaxai tot qaica ca layiloxo! ₃₁Ca' quenaua lqodoco naua nayico chaqai ná'ogue ná'maq hua'ñi ca no'ueenejlec, ca' no'xoñirishiguim aca ncopatoxonaxalate quiyim qanqouagaxainot na nashiilec nqolac, ca' quirelec da nedequenaxaqui'. Qam sqai 'ñiite' ana liỹa huogaxai, ma' ¡qami' sqa vite aca nishivichi'i'!

₃₂Aca 'aalo se na'maxajlec ca loua, ca' icoñiguit ca liỹa ỹoqa'a ỹale. ₃₃Ná'ogue ana huogaxai ỹa'ue añi nishiuete, qam qami' sqa vite aca nishivichi'i' quená'ogue ná'maq qami' lqo'itqate; chaqai shivichiñite', qaiyi chicqote'ogalo ná'maq ỹo'uet ca lasauaxaset caqami'. ₃₄Ca' queda nedequenaxaqui' sqai 'ñitetegue dá'maq 'neeta na liỹa 'aallipi: qaica ca nacpegue' qami' quiyim ỹa'ue ca lasauaxaset, chaqai na'maxare se rishivichiñi', ta'ta'a quiyim qami' aná'maq shivichiñi' na'maxare. Ca' ¡chaqaidaata ỹoqotec caqami' quena liỹa 'aallipi 'nejem qami'!

₃₅Vichiguiño' nagui qami' nedequenaxai, ñaq na'xaỹaxañitalo naua ỹa'qaatqa: ₃₆Ỹim na'gaxala' 'ue da shinac nagui caqami': Qami' ỹaatqajam qaica ca rayiloxo'e' na' huachirelec na roshicmaxa'e' na' quirelec dá'maq nedequenaxaqui' quená'maq qami' lqo'itqate chaqai quená'ogue ná'maq se yqo'ta nashiilqaipi nqolac chaqai 'ỹaañitot na qachaalaxai'ipi quiyim qaỹalauat rachitaxanataxanaxachi'. ₃₇Vichiguiño' ỹim llapoonta' ná'ogue ná'maq qami' lqo'itqate ná'maq netoonta'pegue qami', ná'ogue ná'maq rqo'chita chaqai ná'ogue ná'maq se rqo'chita; llapoonta' lapoỹau'a nqaishin aqami', ca ma' sá'ogue lapoỹaho, ca' ñosoxonaxañiriñi, qaiyi ỹa'ajanta qami' ma' ỹaatqajam ñi'sauec. ₃₈Sa'ue da nouaxanaxaset da nedequenaxaqui' chaqai da ralauataxanaxaqui', chaqai quedá'maq iuel ma' sco'uaalli', ca' saañirec quiyim qaralauachi'. ₃₉Saxantac na qomyipi quiyim ratoiquiñi'sac, ca' nopoxoỹaxajñi ma'le na nedequenqachi' chaqai na nqouagaxainqachi' quena nashiilec nqolac. Qanaqate' ma'le naua qatoohi' chaqai na no'uen no'ueetaxachi', ca' ỹaatqajam neetauec nqohin aqami'.

₄₀Ca ma'le, ca' qoỹilen na qomyipi quiyim npa'guene'e' qami', ca' qarenaqe' quena qa' chaqai qaralauachi' qaỹahote'e na lecat. ₄₁Ca' qaicopata'a ma'le ca qauochi', ca' qaỹo'uet ma'le ca nouaxanaxashichi', qaỹa'ajnaxanaxantac ca 'xoic 'aallipi. Ca' lqodoc nqaishin da nedequenaxaqui', ca' totqai shivichiñi' ná'maq qami' lqo'itqate. ₄₂Ca ma'le, ca' da iuel caqami' imigui, ca' qaica ma'le da ico'uaalaxanaxac, ca' yi'maxañi, tot so'ootari'. ₄₃Qami' 'laxachite na' ñaqai qami' nogot, ca yo'ooqochichi' quená'ogue ná'maq 'viichi'sac se no'uen; vichiguiño' ỹim sa'ue da nouaxanaxaset dá'maq 'ñi'sari'. Ỹim na'gaxala', se'taxajñi da ỹa'qaatec.

₄₄'Ue ná'maq ỹa'den ỹo'uet ca lliguec la'qaatec, ca 'naac caqami' Jerusalén: Dá'maq no'ueenataxac aso late'e ỹaatqajam 'nejem dá'maq 'neetari' aso llaale. ₄₅Qami' llaale asó'maq ỹaatqajam loquiiaxat so loua chaqai so llaalqaipi, chaqai saua rqaỹachi' 'aalo qai'neeta loquiiqate' saua loua' chaqai saua llaalqa. Qamia'que aso qachii'i chigoxougui na hitita laseripi chaqai so qataa'i amorreo le'ec.

₄₆Da rapiguim pa'aata'gue asó'maq ỹi rqaỹa'e', yi na'a' lodegaxat Samaria, chaqai naua liỹa' na'aaterolqai'; ca' queda 'guiñi pa'aata'gue añi rqaỹa'e' paguec nogot, yi na'a' lodegaxat Sodoma, chaqai naua liỹa' na'aaterolqai'. ₄₇Ca qami' qui'relec denaxachichirigui dá'maq 'neesari' chaqai 'viichi' dá'maq se yqo'ta ỹo'ueetetac. Qam se ỹa'maxagui qavilli' quedajo, ca dá'maq no'ueenataxaqui' paguec la'aaxa nqai'ñi' quesaua'maxare.

₄₈Ỹim na'gaxala', ñallitalta' quiyim vire'ta aso rqaỹa'e' Sodoma chaqai yaua liỹa' na'aaterolqai' se ỹo'ueete' dá'maq 'viichi' qami' chaqai naua liỹa' na'aaterolqai' na'deesau'a qami'. ₄₉Dajo dá'maq lasauaxaset aso rqaỹa'e' Sodoma chaqai saua liỹa' na'aaterolqai': ma' nemaqajnerari' ma' sqaica ca ỹouensac quena na'ic chaqai ỹa'maqachiriñi, qam se ỹauana quiyim ỹotauane' ca 'xoraic chaqai ca 'ue ca ỹouentac. ₅₀Paguec nemaqajnaxai chaqai 'ue na ỹo'ueetetac se yqo'ta; vichiguiño' ñopoxoỹaxajñi, ca' qami' huañichirigui na'le.

₅₁Ca' yi Samaria se ỹovi' yi lavinñi na rasauaxashichi'. Qami' paguec ná'maq 'viichi' se yqo'ta; ca' ñi'maxare no'm huaqataho caqami', ñi'maxare 'ec qaica ca lasauaxaset. ₅₂Ca' qami' na'ñaxachichiguit quiyim se qanqo'chiraxaua', ma' paguec la'aaxa ná'maq rasauaxashichi' cañi rqaỹa'e', ca 'ec qaica ca lasauaxaset nqai'ñi'. Ca' qami' hueetalec da rayiloxo'e', ca na'ñaxachichiguit quiyim se qanqo'chiraxaua', ma' 'ec qaica ca lasauaxaset añi rqaỹa'e'.

₅₃Ỹim sopilaxachichigui dá'maq 'au 'neesari' yaua rqaỹachi' Sodoma chaqai Samaria chaqai nauá'maq na'aaterolqai' na'deesau'alo yaua'maxare; chaqai qami' Jerusalén qai'neeta liỹa ñadalaxashiguim ma'le. ₅₄Qam na'ñaxachichiguit ma'le da ne'naxaqui' chaqai nayiloxoñi' quedá'maq 'viichi', ca' chaqaida dá'maq 'neeta quiyim yaua rqaỹachi' ỹa'maxaguilo lavilli'. ₅₅Ca ma' liỹa ñadalaxachishiguim yaua Sodoma chaqai yi Samaria chaqai nauá'maq na'aaterolqai' na'deesau'a yaua'maxare, sopilaxachichigui dá'maq 'auaxaic 'neesari', qai'neeta ñadalaxashiguim qami' chaqai nauá'maq na'aaterolqai' na'deesau'a qami'. ₅₆Qami' 'ñi'saiquen na' 'ue da nouaxanaxaset añi rqaỹa'e' Sodoma, chi nemaqajñirari' ₅₇na' saqa' re'oq dá'maq se no'uen 'viichi'sac; qam nagui yi na'aateripi quiyi Edom chaqai yi Filistea chaqai ná'ogue ná'maq sqoỹoqaque quena ñira'ñi, ná'ogue se nqo'ta qami', roviraxachisac. ₅₈Ca' nagui, ca' na'ñaxachichiguit da nouaxanaxashichi' quedá'maq se no'uen 'viichi'sac se yqo'ta. Ỹim na'gaxala', se'taxajñi da ỹa'qaatec.

₅₉Ỹim na'gaxala' shinac caqami' Jerusalén: Sa'ue ma'le cá'maq vi'saque, ma' sqai pacqajñirigui cá'maq 'ỹaañirec ra'qaachiqui' chaqai da qana'deenaxac. ₆₀Qam ỹim se sa'laxate ma'le da qana'deenaxac na' ñaqai qami' nequetegaxai, ca' so'uet ma'le caqami' ca qana'deenaxac, qam sqaica lqodoc. ₆₁Ma' ỹim saanem qami' quiyim 'ec qachaalli'i' aso ropillichi'i' chaqai aso rqaỹa'e' paguec nogot, 'eno'm da qana'deenaxac mesqai ỹa'ue ca ipagaxallic queda'maxare, ca' qami' 'yiiñira'a ma'le dá'maq 'auaxaic 'ñiisari', ca' 'ue ma'le ca rayiloxo'e'. ₆₂Ỹim sadalaxat ma'le da ña'deenaxac caqami', ca' 'yiiñira'a ma'le quiyim ỹim ra'gaxalachi'. ₆₃Ca' qami' ma' 'yiiñira'a, ca' chalego ma'le ca rayiloxo'e' chaqai nemanachichi', ca' totqai huachirigui ma'le na qadapi' quiyim taxahi', ma' ỹim sapalaxat ná'ogue ná'maq se no'uen 'viichi'sac. Ỹim na'gaxala', se'taxajñi da ỹa'qaatec.