Ñi qota'olec ỹaanem so Moisés quiyim ishit ỹo'uet na se qaỹauanapega
1—Caalata'm sqai huelec aỹim ma'le chaqai se na'xaỹaxañiua' —'naaco' so Moisés—. Ta'ta'a quiyim 'naac ma'le caỹim: Peeta'a se nachaxana qami' ñi qara'gaxala'.
2—¿Negue' ná'maq lo'qo'isa'a? —'naaco' ñi qara'gaxala'.
Ca so Moisés 'naaco':
—Ỹashilete.
3—Lli'riñi quena 'laua —'naaco' ñi qara'gaxala'.
Ca' so Moisés illiguiño' quena 'laua. Ca co'na' taañi quena 'laua, ca' aso nashilete ñigui nanaic. Ca' so Moisés 'eet, no'cha'a so'maxare. 4Qam ñi qara'gaxala' 'naaco' queso'maxare:
—Coñita na lqai'it yi'maxare.
Ca co'na' so Moisés ỹacona na lqai'it, ca' so nanaic pilchigui nashilete.
5Ca 'naaco' ñi qara'gaxala':
—Ca' dajo 'neeta ma'le, qaiyi qoyiuelec quiyim nachaxana qami' najo na'gaxala', qota'olec quesó'maq 'auaxaic qataa'illipi, qota'olec queso Abraham, Isaac chaqai so Jacob. 6Hua' nagui, ca' shichiri'ñigui ana rotogui'i' na rqai'laxachi'.
Ca' so Moisés ishichi'ñigui ana lotogue da lqai'laxat. Ca co'na' navicshiguim, ca' iuane'ta quiyim rishiita chaqai ỹalagaq 'ec ana loñi. 7Co'na'le, ca ñi qota'olec liỹo' 'naapega so'maxare:
—Liỹa shichiri'ñigui ana rotogui'i' na rqai'laxachi'.
Ca' chaqaida 'ne'tegue so Moisés. Ca co'na' liỹa navicshiguim, ca' no'ueenta, liỹa 'nejem ná'ogue na loshicmaxa. 8Co'na' ime, ca 'naaco' ñi qara'gaxala':
—No'm quesó'maq 'auaxaic netanec se qoyiuelec qami', qam casó'maq liỹa, ca' qoyiuelec qami' ma'le. 9Qam no'm se qoyiuelec chaqai se qana'xaỹaxana qami' quesauajo netanqa, ca' naqachirishiguim ca huaxaỹaq caso lachiugue, ca cochirelec na 'laua. Ca cá'maq huaxaỹaq taañi quena 'laua, ca' ñigui leuoripi.
10Qam so Moisés 'naaco' quiñi qara'gaxala':
—Qam naua ỹa'qaatqa se ỹa'machiñi, ma' na'perapeguec. Qam dajo sqai naquita quiyim taxaisa'pegue' najo relaachiqui'. Qam shi'gue quesom. Ma' quena' sham setaqa, ca' sqalanac dá'maq shim sa'xat.
11Ca' ñi qara'gaxala' 'naaco' queso'maxare:
—¿Nega'ỹo' cá'maq ỹo'ueeto' na'le na lap na qom? ¿Peeta'a sqaỹimo' ná'maq ỹo'uet quiyim 'ue ca qaicaua naua la'qaatqa, ra'ñaagui na lqahic, qai'laq, loqo'm quiyim neuanchiguiñi? 12Ca' vichiguiño' nagui qui', ca' qami' iỹaatac ma'le. Ca ma' taxahi', ca sapaxaguiñitegue cá'maq 'ñirac.
13Qam so Moisés liỹo' 'naac:
—¡Qami' ỹa'gaxala', qouaquiric vite ca ỹaxañita liỹa, ca' lachi'!
14Co'na'le, ca' ñi qara'gaxala' ro'ỹo' so Moisés. Ca 'naaco' queso'maxare:
—Qam neeta'anyi ñi rqaỹa'e' Aarón ñí'maq llaalec so Leví. Ỹim sa'den quiyim ñi'maxare ỹa'den da letaxaỹaxac. Chaqai ñi'maxare ca'guit ma'le qami', ca' netoon ma' nauañichiguit. 15Taqaira'pegue' ma'le ñi'maxare, 'xachitem dá'ogue dá'maq shim 'xachi' ma'le. Ca' ỹim seuetañiguilo qamiri ma' taxahi, chaqai sapaxaguiñiigue cá'maq 'neeta cá'maq 'viichii. 16Qami' taqaira'pegue' ma'le ñi Aarón shiquiaxam ỹim setaqata'pegue'. Ca' ñi Aarón 'naapega ma'le na qomyipi cá'maq 'ñirac. 17'Xachite' ma'le anajo nashilete, ma' chaqana aná'maq 'ueenataxañita ma'le quiyim 'viichi' cá'maq ỹo'uet ca ne'laxa.
(4.18-26 Ñi qota'olec 'au na'maxate'e' so Moisés, ca pil nqai'en queda Egipto.)
So Moisés liỹa neuañiguit so lqaỹa Aarón
27Ca' ñi qara'gaxala' shi'co' 'naapega so Aarón:
—'Itegue da 'laua qaica ca qom qachira'guit na Moisés.
Ca' so Aarón eec qata'guit so Moisés cada qa' ladocai lalamaxarete ñi qota'olec. Ca na' ime niquine'e', ca' nqo'goxoguit. 28Co'na'le, ca' so Moisés ra'qaataxanem so Aarón quená'ogue ná'maq qohinapega quiyim ỹa'xatem quiñi qara'gaxala' chaqai ná'maq chalego lecaic netanqaipi ỹo'uet da ne'laxa qailarelec quiyim ỹo'uet. 29Ca na' ime, ca saua'maxare que' lapoonta' ná'ogue ná'maq qo'xoiquipi quena llaalqaipi so Israel. 30Ca' so Aarón ỹa'xatemo' na'le dá'ogue dá'maq qohinapego' na'le so Moisés quiñi qara'gaxala', chaqai qai'neeta iuanchigui nqai'en so qomyipi ná'maq netanec ỹo'uet da ne'laxa qailarelec quiyim ỹo'uet quiñi qota'olec.
31Co'na'le, ca' na qomyipi ỹaatqajam huejlec. Chaqai co'na' ỹa'den quiyim ñi qara'gaxala' na'xaỹaxana so'maxare chaqai quiyim iuana da le'xoric so'maxare, ca ỹa'chi'iñi naua le'cootal, ca' nqouagaxainot ñi qota'olec.
