So huaxaỹaq chicqochigui aso qa'
1Ca sá'ogue so Israel llaalqaipi ca'e yi 'laua sqaica qom, leenaxat Sin. Queeta, qam chi rashiishita, ipaquichigui nqai'en dá'maq la'qaatec ñi qara'gaxala'. Ca na'le, ca na'ñi yi Refidim, qam qaica ca huaxaỹaq quiyi'maxare quiyim ni'chigui so qomyipi. 2Co'na'le, ca' ỹaatqajam qaỹoviraqta'a so Moisés, qohinaco':
—¡Vite ca huaxaỹaq, qaiyi ñi'taq!
—¿Chi'negue ma' 'ue dá'maq 'xachitac caỹim? ¿Chi'negue ma' 'guiñitac ñi qota'olec? —'naaco' so Moisés.
3Qam so qomyipi 'xoic na laquip. Ca' retaxaỹa'guit so Moisés, ca 'naaco':
—¿Chi'negue ma' qolqa'e nqai'ñi' qomi' yi Egipto? ¿Vi'saco' quiyim qaralauat na qaraquip qariỹaata'ñi' na qochaalqaipi chaqai na qoloipi?
4Co'na'le, ca' so Moisés ỹaualqot ñi qara'gaxala'. Ca 'naaco':
—¿Negue' cá'maq shinto' nagui quena qomyipi? ¡Mashic saqa'leca cocho'qui', ca' yalauat, ỹoda'a aỹim na qa'!
5Ca' ñi qara'gaxala' 'naaco' queso'maxare:
—Mo'e', 'avisauec quena qomyipi. Vite caua nauegaxauachi' quena qo'xoiquipi quena Israel. 'Xachi' qai'neeta aca rashillichi'i' cá'maq lo'o nqai'ñi' na'le aso huaaxai. Ca nagui chaqa'ma' qui'. 6Ca' ỹim ñauaanta'piguit qami' ma'le cada qa' ladocai, leenaxat Horeb. Ca' ma' huaxañirigui ada qa', ca nenoxonec ma'le na huaxaỹaq, qaiyi ne'et na qomyipi.
Ca' so Moisés co'na' 'ne'tegue dajo, qam iuanchigui nqai'en so qo'xoiquipi queso Israel llaalqaipi. 7Ca ỹanco' leenaxat novirqataxanqa' yijo 'laua, ma' so Israel llaalqaipi ỹaatqajam ỹoviraqta'a so Moisés. Chaqai qai'neeta ỹanco' leenaxat 'guenqa', ma' so qomyipi i'gueno' na'le ñi qota'olec, co'na' 'naac: ¿Ỹalequetauguilo' qomi' ca qara'gaxala', loqo'm 'e'?
Qanalauate'e' so Amalec llaalqaipi
8So Amalec llaalqaipi ỹalamaxata'gue da Refidim, ma' ỹahotaque nalauate'e' so Israel llaalqaipi. 9Co'na'le, ca' so Moisés 'naaco' queso Josué:
—Vite nca'a'ira'alo ỹale', ca' quiichiguit ma'le, ca nalauachire'e' na Amalec llaalqaipi. Ca' ỹim seuetalec ma'le ada qa' ladocai, llo'qoota'a ma'le aca qo'paq lashilete ñi qota'olec.
10Ca' so Josué ỹo'uet dá'maq qohinapega queso Moisés. Ca' eec, quiguit quiyim nalauate'e' so Amalec llaalqaipi. Ca' so Moisés chaqai so Aarón chaqai so Hur taarishi'megue aso qa' ladocai. 11Co'quena' so Moisés nanochishiguim naua lqai'laqate', ca' so Israel llaalqaipi nqo'neuec da lquesaxanaxa queso nalauataxaua. Qam co'quena' nanaqaiñi naua laua', ca lotqai nqo'neuec da lquesaxanaxa so Amalec llaalqaipi. 12Qam ma' so Moisés nco'terec naua lqai'laqate', ca' qaicono' so qa', ca nqa'xanlec nqohin. Ca' so Aarón chaqai so Hur nolliisañi ỹachaxansashiguim nqai'ne' naua lqai'laqate'. Quiñi 'óna lo'qootañi da lqai'laxat ỹiquesashiguim nqohine'. Ca' chaqaida qohine'teco' na'le queso Moisés, ca' se nanaqaiñi naua lqai'laqate', chi ỹovireto'o' na' inoxonñi aso ra'aasa. 13Ca' so Josué loxonec so nalauataxaua Amalec llaalqaipi, ỹodoota'a na lecat llaaxa. 14Co'na'le, ca' ñi qara'gaxala' 'naaco' queso Moisés:
—'Chiriñi dajo caca lere, qaiyi no'leentaxat. Chaqai 'ñirac queda Josué quiyim ỹim sapalaxat da 'neeta na Amalec llaalqaipi.
15Ca' so Moisés no'xonshiguim aso lcopatoxonaxalate quena lachitaxanataxanaxat, ca leenaxat nqai'en Ñi qara'gaxala' 'ec aca itana sa'auaxantauec. 16Ca 'naaco':
¡Aso letana ñi qara'gaxala' lo'xoita'a!
¡Ñi qara'gaxala' nalauateta'pegue' na Amalec llaalqaipi,
ca' se neme queetaugui qai'neeta na llaalqaipi!
(18.1-27 So Moisés na'xaỹaxane'ta so Jetro, ca' ỹo'uet so liỹa lotauaripi.)
