Éxodo 16

₁Ca sá'ogue so Israel llaalqaipi ca'e yi Elim, ca quepegue', ca' ỹovita yi 'laua sqaica qom leenaxat Sin. Queca lavinñi so liỹa shiraigo na' ime ca'e yi Egipto. Yi'maxare viichiguiñiguilo yaua Elim chaqai yi Sinaí. ₂Ca' quiyijo 'laua qaica qom, ca sá'ogue so'maxare queeteguelec quena se no'uen so Moisés chaqai so Aarón. ₃Ca 'naaco' quen so qomyipi:

—¡Saxanchi' ñi qara'gaxala' ileue' nqai'ne' qomi' na'le quiyi Egipto! Na' senqata'ñi quen yí, ñqa'xanqata'ñi' quen aca qana'ueena no'qaachigui quena la'at, chaqai ỹaatqajam qarquema' quena' squi'ỹaq, qam qamiri naviguiu'galo qomi' najo 'laua qaica qom, ma' viitaque qomá'ogue qaralauat qarqopaaxa.

₄Co'na'le, ca' ñi qara'gaxala' 'naaco' queso Moisés:

—So'uet quiyim 'ec ỹaxat nqaishin ca na'ic chicqashiguim quena piguim. Ca' na qomyipi lapoon cá'maq ỹouen quiyi na'xa'a. Sahotaque quiyim tegue' chi na'xaỹaxana da ỹa'qaatec loqo'm 'e'. ₅Qam ma' ime' saua cinco na'xata', ca' queso liỹa na'xa'a, ca' paguec ca lapoon quecajo na'xa'a, ca ỹodouo queca la'a'.

₆Co'na'le, ca' so Moisés chaqai so Aarón 'neraco' na'le queso Israel llaalqaipi:

—Quena avit, ca 'yiiñii ma'le quiyim chaqaiñi ñi qara'gaxala' ñí'maq naqata'alo qamiri na'le quiyi Egipto. ₇Chaqai ma' nete'e ma' nete'etam, ca' huañiỹa ma'le da lquesaxanaxa ñi qara'gaxala', ma' ñi'maxare 'xaỹa dá'maq 'xachitac se no'uen quiñi'maxare. Ma' ¿negue' queto' qomi' quiyim qarenaxaitac?

₈Ca' so Moisés liỹa 'naac:

—Ma' lavit ñi qara'gaxala' ỹa'ue ca qanoxohi la'at, ca' quiyi nete'eta, ca' ỹaanema qamiri ca 'xoic pan. Ma' ñi'maxare 'qaatapegalo qamiri na' se no'uen da 'xachitac quiñi'maxare. Ma' ¿negue' queto' qomi'? Qamiri sqai qarenaxaitac, ma' naxaitac ñi qara'gaxala'.

₉Na' ime, ca' so Moisés 'naac queso Aarón:

—'Ñiỹapega ná'ogue na Israel llaalqaipi quiyim nqo'neu'a ñi qara'gaxala', ma' ñi'maxare 'xaỹo' na'le dá'maq 'xachitac se no'uen quiñi'maxare.

₁₀Ca na' ñaq retaqatapougui so Aarón so Israel llaalqaipi, ca sá'ogue ra'ỹa'a yi 'laua qaica qom, ca re'oq so lauaq ñi qara'gaxala' hueetaugui so naueguelec. ₁₁Ca' ñi qara'gaxala' ỹalamaxachichigui so Moisés, ca 'naaco':

₁₂—Ỹim sa'qaatapega na Israel llaalqaipi na' queeteguelec aỹim yinaqatac. Taqaira'pegue' na'maxare, ca 'ñirapego': Ma' lavitari', ca' qui'ii ma'le la'at. Chaqai quiyi nete'eta, ca' qui'ii ma'le queca pan, chi ỹovireta'a rquemari. Qaiyi 'yiiñii ma'le quiyim aỹim ra'gaxalari qota'olec.

₁₃Ca' qaicaata ca avit, ca' novi'o' na nasalo, ca' ỹaatqajam no'qajlec so co'matqa'. Ca na' nete'etam queso liỹa na'xa'a, ca' 'ue ana 'ỹa' qoỹoqochiguiñi quenaua lahil yi qoyinta'ñi co'matqa'. ₁₄Ca na' ime taashiguim aso 'ỹa', ca' 'ue na no'ueenañi 'ec loñi queso 'laua qaica qom. ₁₅Ca ma' só'maq Israel llaalqaipi se ỹa'den so'maxare. Ca co'na' iuana, ca nenatetecta', 'naaco' quen: ¿Negue' ná'maq najo?

Ca' so Moisés 'naaco':

—Najo ná'maq pan ỹauaaque qanoxohi ñi qara'gaxala'.

₃₁Ca' so Israel llaalqaipi ỹanegue leenaxat maná, (¿negue' ná'maq najo?) ná'maq lapoontac. So'maxare lalagaxaic, 'ec ana la na nanecse leenaxat cilantro; lo'daxaraic, 'ec naqaulata 'aríña lalegue' na rapic li'i.