Ester 2

₁Ca co'na' mashic 'viom saua na'xata', ca' so nashi Asuero mashic nimishiguim so lauel, ca ỹo'leente'te dá'maq 'ne'tegue na'le aso Vasti chaqai dá'maq 'naac quiyim qaiqoshaxanec quiyim nashi. ₂Ca' so lotauaripi nashillipi 'naaco' queso'maxare:

—Nagui, ca' ỹouentaque quiyim qaidaanaque aca roua'e', qami' qarashi, cá'maq ỹaatqajam lo'yaxana chaqai quiyim saqa' iuanapega ca ỹale. ₃Ca 'maxaraic quiyim qami' qarashi vite ca 'chiro quená'maq neetalgoto naua liỹa' 'lauari, qaiyi qailarelec quiyim ná'ogue na nequetegaxaipi nauega'a ñi 'aallipi lauo' lodegaxat quiyi Susa, ca' reloxoỹa'a nqohin ñi Hegai só'maq rpi'iichi', qami' qarashi, ca' chaqaiso só'maq Hegai quelola quiyim ỹa'men chaqai no'ueenaxat so 'aallipi, qaiyi re'oq dá'maq ỹaatqajam loyac. ₄Ca acá'maq nequetegaxai paguec rqo'chita, qami' qarashi, ca' chaqaca qoỹanagui da lo'ueenataxanaxac aso Vasti.

Ca' dajo na'qaatec ỹaatqajam ỹa'maxarenta so nashi, ca' chaqaida qohine'tegue.

₅Ca' queso na'a' lodegaxat Susa neeta'ño' so judío le'ec, leenaxat Mardoqueo. So'maxare leta'a so Jair, chigoxougui so Simei chaqai so Cis, saua'maxare chigoxorougui so Benjamín. ₆So'maxare ỹalequetaugui na'le so 'xoic qomyipi na' so nashi Nabucodonosor naqata'a quiyi Jerusalén, ca' ỹaueguegue da Babilonia, liỹaatac so Jeconías, nashi quiyi Judá. ₇Ca' so Mardoqueo 'uo' aso lqaỹa liỹa. Aso'maxare na'pelqotam. Ca so'maxare ỹiro quiyim llaale na' tot qaicaua caua leta'al. Aso'maxare leenaxat Hadasa chaqai da liỹa leenaxat Ester. So'maxare ỹaatqajam imaañi lo'yaxana chaqai ta'chiguit da no'ueenataxac. ₈Ca co'na' ime qaiuagaxatec da la'qaatec so nashi, ca 'xoico' so nequetegaxaipi lapoỹau'a so 'imec lodegaxat lauo' so nashi quiyi Susa, chaqai reloqota'a so Hegai só'maq neloxoỹaq queso 'aallipi. Ca' ỹalequetaho aso Ester. ₉Ca sojo nequetegaxai ỹaatqajam nqo'ta so Hegai, ca chaqa'ma' ỹa'men, noquiigaxatec nqai'en da loyac, chaqai ỹaanem na no'uen na'ic, chaqai ỹa'vii saua siete lelaata quesauá'maq ỹaatqajam ỹa'deene' da ledaxague' neesaugui ñí'maq lauo' lodegaxat so nashi. Ca aso'maxare chaqai saua lelaatal nqo'naxata'alo saua 'imqa paguec loyaague' quesaua lauooto' na 'aallipi.

₁₀Aso Ester se ỹa'xat na lauo' laseripi chaqai so leta'allipi, ma' qaraqato' queso Mardoqueo quiyim se ỹa'xat. ₁₁Chaqai so Mardoqueo naua'que naua na'xata' ỹouoxontac yi naloote'oga yi nasoxoc ñi lauo' lodegaxat so 'aallipi, ma' ỹahotaque ỹa'den cá'maq 'neetari' aso Ester chaqai quiyim qaỹa'maxate'tegue.

₁₂Sá'ogue so 'aallipi qaỹa'meentac chaqai qaicochiitapega quesaua doce shiriguiri. Quesaua 'auaxaqa seis shiriguiri ỹa'meentac na loshicmaxa quena aceite chicqaugui ana mirra, chaqai quesaua liỹa' seis shiriguiri nocoretapigui na coraxat chaqai na liỹa na'meenaxat ana 'aalo. Ca na' ime'uegue so na'meenaxac, ca' 'onatac nqohin quiyim nachaxana'a so nashi Asuero. ₁₃Chaqai qaỹasene'tem na 'aallipi ná'ogue ná'maq ỹahotaque ỹachiitaho quiñi nashi lauo' 'imec lodegaxat. ₁₄Ca' quiyi pe, ca' tau'a ñi nashi lauo' 'imec lodegaxat, ca' quiyi liỹa na'xa'a, ca lotqai hueetaugui ca liỹa 'imec quiñi 'aallipi lauo' lodegaxat quiñí'maq neloxoỹaq so Saasgaz, só'maq ỹale lpe'eet so nashi chaqai neloxoỹaq caso leloxoỹaxanataipi so nashi. Co'quena'le, ca' totqai liỹa quepegue' so nashi, ta'ta'a quiyim so'maxare nqo'ta, ca pilac roỹaxana'a.

₁₅Ca co'na' aso Ester asó'maq llaale so Abihail só'maq neteesqo' so Mardoqueo ỹovira'a quiyim nachaxana'a so nashi, ca aso'maxare i'xate' qaisauate' sauá'maq 'neetapegalo' na'le so Hegai só'maq lpe'eet so nashi chaqai neloxoỹaq queso 'aallipi. Ca co'na'le, ca' aso Ester sá'ogue qanqo'ta quesó'maq cochiitapega so 'aallipi. ₁₆Ca' aso Ester qaỹauega'a ñi 'imec lodegaxat lauo' so nashi, ma' qaỹahotaque nachaxana'a so nashi Asuero queso shiraigo diez, leenaxat Tebet, quesaua siete ñaxari quiyim neetaho nashi. ₁₇Ca' so Asuero ỹaatqajam chalego' da lqo'iichi caso Ester, se ỹauanapego' quen 'neeta caca liỹa 'aalo. Ca aso'maxare ỹaatqajam imaalec da lqo'iichi so nashi Asuero, ca so Asuero ỹapacqajnauec aso'maxare queso liỹa 'aallipi ỹovira'a so'maxare, ca' ỹañigui na lqahic aso nashi nado'o, ca' ỹana'ñi yi loma' aso Vasti quiyim nashi. ₁₈Ca co'na' ime, ca' ỹo'uet so nqui'ỹaxac lodegaxat quiyim imaqachin aso Ester, ca' ỹal sá'ogue so lotauaripi nashillipi queda lo'ueenataxanaxac, chaqai nqo'naxajñi añi ishiueten naua na'aate' quenaua liỹa' 'lauari chaqai 'xoic na lachitaxanataxanaxat, ca ipaquichigui nqai'en da 'ne'tegue ca nashi quena' rachitaxanataxan.

₁₉Ca' quesaua liỹa' na'xata' na' so nequetegaxaipi qaỹauega so lauo' lodegaxat so 'aallipi, ca' so Mardoqueo nqa'xantañi quiñi lasom ñi lauo' so nashi. ₂₀Ca' aso Ester ỹaatqajam queetalec da laqataxac na'le so Mardoqueo, 'ec nqai'en quiyim ñaqai neeto'ot, quiyim aso'maxare se ỹa'xat cá'maq lalamaxaret lauo' laseripi. ₂₁Ca co'na' so Mardoqueo nqa'xantañi quiñi lasom ñi lauo' lodegaxat so nashi, ca 'qaatapegalo saua Bigtán chaqai so Teres, saua'maxare nashil neloxoỹa' queso nashi, reloqosa'a ñi lasom ñigo quiñi 'imec lodegaxat. Saua'maxare ỹaatqajam ro'ootasa'lo retaqasapigui cá'maq 'neesa'gue quiyim ỹalauate' so nashi Asuero. ₂₂Ca na' so Mardoqueo ỹa'den da na'xalenataxac so nashi, ca ra'qaataxana aso nashi Ester. Ca aso'maxare ỹa'ue la'xaỹaxac so nashi Asuero queda la'qaataxanaxac so Mardoqueo. ₂₃Ca' qanimichiguit dajo na'xaỹaxac. Ca co'na' qaỹa'den quiyim lliqueta, ca' saua dos nouaataxanaq lashil qaỹa'ue da nouaxanaxasete', ca' qaicoñirerashiguim. Ca dá'maq qohine'teque qoỹiriñi ỹauanchigui nqohin so nashi na' qoỹiriñi caso lere hueetalec ná'ogue na na'qaataxac na qomyipi queso neetalec 'laua.