So lqui'ỹaxac so nashi Asuero
1Dajo na'qaataxanaxac viichiguio' na' nashi so Asuero, ca so'maxare reloqota'a yi ciento veintisiete 'lauaripi, chicqochi'ñi yi 'laua India queda lqodoigue, ca ỹovira'a yi 'laua Etiopía queda lauashiguim. 2Ca so'maxare yí'maq hua'ñi yi la'a' quiyim ilaretac na nashillipi, ca na'ñi yi na'a' lodegaxat leenaxat Susa.
3Ca' quesaua tres ñaxari quiyim nashi so Asuero, ca' ỹo'uet so nemaqachic lodegaxat que'e, lqui'ỹaxaua só'maq lotauaripi nashillipi, chaqai so nouaataxanaq lashillipi na'ñi yi Persia chaqai yi Media, chaqai na na'gaxalateripi chaqai na nashillipi quenaua liỹa' 'lauari. 4Ma' ỹahotaque ỹachaxanem da lesallaxa, da lecaic quiyim nashi, chaqai dá'maq qaica 'nejem lauaq da lquesaxanaxa. Ca' so lqui'ỹaxac ỹoviraqterauec saua seis shiriguiri.
5Ca co'na' ime'ueque sauajo shiriguiri, ca' so nashi eec nqai'en so lqui'ỹaxac quesaua liỹa' siete na'xata', ca illa'ñi yi nasoxoc ñi lauo' lodegaxat. Ca ná'ogue ná'maq neeta'ñi yi na'a' lodegaxat Susa sá'ogue qaỹa'ue la'xaỹaxac, qaiyi ỹalequetaho ná'maq nesallaxanqaipi chaqai na 'xoraiquipioqui', ná'ogue qoỹal. 6Ca' so nasoxoc lemaqatet nqohin na no'uen lepate lo'lo lalagaxaic chaqai na icolaq, qaỹauo'chi naua lequeete' chicqoraugui na lino tocalec, ca queetouguilo naua lauaco 'ue na no'ueetaxat plata, chaqai naua lashil nodaachiguiñi qa' leenaxat mármol. Chaqai saua qa'xanaxalate', ca' naua neuaxaỹoxosoxolate' qaỹa'meenlgoto quena 'oro chaqai quena plata. Chaqai so nco'ỹaaqa' ta'ta'a qa' lo'yaxanec, 'ue na nácar, mármol lalagaxaic chaqai na laueraxaic. 7Ana 'taxaqui quena' qani'chigui na lataxa ta'ta'a 'oro, chaqai ỹoreta'oguit da no'ueenataxac. Chaqai na lataxa mashic naañi nqohin, ma' chaqaida dá'maq lamiaxanaxac ca nashi. 8Qam so nashi 'naapega so neloxoỹaripi quiñi 'imec lodegaxat quiyim sqai 'xoic ca nepagaxallic quiyim qane'taxan, ta'ta'a cá'maq sham ne'et quená'maq nalecseripi. 9Ca asó'maq loua so nashi, leenaxat Vasti, so'maxare qai'neeta ỹo'uet so lqui'ỹaxac asó'maq louaaripi só'maq nashillipi nalecseripi quiyi la'a' so nashi Asuero.
10Ca co'na' mashic siete na'xata' so nemaqachic, ca' so nashi ỹaatqajam ỹa'maqachiguiñi, ma' ne'teetac lataxa. Ca ila' so Mahumán, Bizta, Harbona, Bigta, Abagta, Zetar chaqai so Carcas, só'maq siete nalliripi ỹaatqajam lpe'eet, 11quiyim qaỹavigui'ñi yi reloqota'ñi aso nashi Vasti, ỹantañi nqohin aso nashi nado'o, qaiyi so qomyipi chaqai só'maq liỹa nashillipi ỹa'ajan dá'maq loyac aso nashi, ma' ỹaatqajam lo'yaxana aso'maxare. 12Qam aso'maxare se na'xaỹaxana dá'maq la'qaatec so nashi quesaua lelaatqa ỹale'. Co'na'le, ca' ỹaatqajam ro'o so nashi. Ca co'na' ñaq ro'ootari', 13ca' inate' sauá'maq ỹa'yiinchiguilo naua leloxoỹaxaco quiyim 'ue ca qaỹo'uet, ma' chaqaida dá'maq no'ueenataxac quiyim quecá'maq 'neeta ca nashi, ca' qana'yiiñigui quená'maq ỹa'deene' naua leloxoỹaxaco na 'ueenataxac. 14Ca' queso qomyipi sauá'maq paguec na'deenaxaua' so nashi, saua Carsena, Setar, Admata, Tarsis, Meres, Marsena chaqai so Memucán, siete saua ỹaatqajam na'gaxalate' quiyi Persia chaqai yi Media, chaqaisaua saua lotaua' quiyim ỹahotaque da lo'ueenataxanaxac so nashi. 15Ca' so nashi inate'o' saua'maxare:
—Quiyim qaiyi ipaquichigui na naqataxaquipi, ¿negue' ca qohinta'gue añi nashi Vasti, ma' se na'xaỹaxana so ỹa'qaatec quesaua ilaatqa?
16Ca' reloqotaho sá'ogue so lotauaripi so nashi, ca' so Memucán 'naaco' queso nashi:
—Añi nashi Vasti mese qaqamite' napaquiraxalec, ca ñi'maxare nagui napacalec ná'ogue na nashillipi chaqai ná'ogue na qomyipi quena 'lauari reloqota'a ñi nashi Asuero. 17Ca dá'maq ỹo'uet añi nashi qaỹa'den ma'le quená'ogue na 'aallipi, ca' chaqaida chicqochigui ma'le quiyim na 'aallipi se na'xaỹaxana na louaaripi. Ca ma'le, ca 'naac: “Ñi nashi Asuero roỹaxane'oga na'le añi nashi Vasti, qam añi'maxare se na'xaỹaxan, sqai eec.” 18Ana loua na nashillipi quiyi Persia chaqai yi Media, ma' ỹa'den dá'maq 'ne'tegue añi nashi, ca' sqoue quiyim nagui chaqa'ma' retaxaỹa'pegue' na louaaripi. Ca' dajo ma'le, ca' ỹo'uet ca qaliỹoqa'piguit chaqai ca nonogoxonaxac. 19Vichiguiño' qami' qarashi, no'm 'maxariñite', ca 'maxaraic quiyim 'viichi' ca ra'qaachiqui', ca' qoỹiriñi, qaiyi ỹalequetaugui na nelaataxanaxaquipi quena Persia laseripi chaqai yi Media, qaiyi se qaỹosogoñi quiyim añi nashi Vasti taachi'ñi quiyim tot reloqoto'ot ñi nashi Asuero, chaqai da lo'ueenataxanaxac quiyim nashi taalec nqohin aca liỹa 'aalo paguec huagaxarai. 20Ca' cajo ra'qaachiqui', ca qaỹa'deenaxanaxanegue ná'ogue ná'maq 'ue na reloqota'a qomyipi, qaiyi ná'ogue ana 'aallipi na'xaỹaxana na louaaripi canchaqaica 'neetari' ca no'ueenataxac, 'xorai loqo'm nesallaxana.
21Ca' dajo la'qaatec so Memucán ỹaatqajam ỹa'maxarenta so nashi chaqai sá'ogue so lotauaripi, ca' so nashi ipacqajanchigui ỹo'uet dajo na'qaatec. 22Ca' ỹo'uet ana lelaata quenaua 'lauari reloqota'alo, ỹahota'ahi nauá'maq chi la'qaatqa quená'maq ỹoreta'oguita 'lauari qareloqota'alo, hueetalec da la'qaatec quiyim na ỹalliripi ỹapacauec queca la'a' chaqai ỹa'xat cá'maq ipeeta'a quiyim ỹa'maqachiguiñi.
