Deuteronomio 15

₁Ca' quiyim ỹovirerec caua siete ñaxari, ca' qaỹapalaxat cá'maq 'ue aca la'uale queca liỹa.

₂Ca' da leloxoỹaxac quiyim tot qano'la cá'maq 'ue aca la'uale 'neetasa': Ná'ogue na qom quiyim ỹa'ualaxanaxan ca la'aayaxaua, ca' ỹapalaxat aca la'uale. Ca' tot repaquira'a quiyim ishiueten aca la'uale ca riỹa'e', loqo'm ca ra'aayaxaua'e', ma' cajo ñaaxa viichigui quiyim qaỹapalaxat aca na'uale, ca' qaimaqachin ñi qara'gaxala'. ₃Qam cá'maq ỹoqa'a ca chicqa'gue, ca' qaipaca'pegue' aca la'uale quiyim ishiueten; qam cá'maq chi qauochi' le'ec, ca' palaxachi' aca la'uale. ₄Ca' quiyim 'ñii'tegue dajo, ca' qaica cá'maq paguec 'xorata caqamiri, ca' ñi qara'gaxala' qota'olec ỹa'ue ca lqouagaxa caqamiri quecá'maq 'laua ỹaanema qamiri ỹauaaque ra'aari, ₅qam quiyim na'xaỹaxañii'ta chaqai 'viichii' naua'que naua lelaataxanaxaco dauá'maq saanema qami' nagui. ₆Ajá'a, ca' ñi qara'gaxala' qota'olec caqami' nqouaguegue qami', ipaquichigui nqai'en dá'maq la'qaatec, qaiyi 'ue ca 'negue ana qadami hueeto'ot qami'. Ca' ma'le, ca' shichi' 'ualaxanaxañi' ca 'xoic ỹoreta'oguit qomyipi, qam qami' qaica ca 'ualaxañita. 'Viiquiñi'sac ma'le na 'xoic ỹoreta'oguit qomyipi, qam na'maxare sqai ỹoiquentac qami'.

₇No'm 'ue ca 'xoraic quena ra'aayaxaua'e'ipi chaqai quená'maq na'aateripi quená'maq 'laua ỹaanema qamiri ñi qara'gaxala', 'neeto' qami' qa'uaic quiyim 'ue ca qauochi' le'ec 'ue ca louenaxanaxa. ₈Ta'ta'a quiyim qami' huagaxaraic queca'maxare, chaqai 'ualaxanaxañi' quecanchaqaica ỹouentaque. ₉'Neeto' viisaque loma' ca se no'uen na'deenataxanaxac caqami': Ma' mashic tot qoỹoxorec naua siete ñaxari quiyí'maq vigui ma' qaỹapalaxat ana na'uale, ca 'neeto' na'aqchisagui na qashiiqui' queca ra'aayaxaua'e' 'xoic ca le'xoric, ca' sqai 'ualaxanaxañi'. Ma' ca'maxare sqoue quiyim ỹaanshiguim ca lashiilaxanaxac quiñi qara'gaxala', ca' chicqochigui ca rasauaxashichi'. ₁₀Ca' qami' tauañi' ca'maxare, sqai 'miaqchira'guit ma' quiyim 'ñitetegue dajo. Ca ñi qara'gaxala' qota'olec caqami' re'oq ma'le nqai'en ná'ogue na lqouagaxa quená'ogue ná'maq 'viichi'. ₁₁'Neeto' 'xañisac quiyim 'ue ca 'ue ca le'xoric quena 'laua. Ca vichiguiño' shinac caqami' vite ca rami'i' queca qauochi' le'ec 'ue ca le'xoric queca louenaxanaxa queca 'laua ñiisa'ñi.

₁₂Ca no'm 'ue ca nemeenalta' caqamiri qauori le'ec quena hebreo laseripi, ỹale loqo'm 'aalo, qam seisolqai' ñaxari ro'ueenataxantacot qami'. Qam ma' ỹovire'oga ca liỹa ñaaxa, ca' 'xañirec. ₁₃Qam quiyim ỹovita 'xañirec, mese chi lauaróle nqai'ñi', qaica ca 'ỹaañitem. ₁₄Ta'ta'a quiyim 'viichi' caua laloo chigoxochirauguilo naua qalohi', chaqai 'xoic nqai'ñi' ca 'ỹaañitem quena trigo chaqai na lataxa. Ca' nouañitere'e' ca'maxare quená'maq re'qoochigui nqouagaxachi' quiñi qara'gaxala' qota'olec caqami'. ₁₅Se coua'ire'e quiyim qami' qai'neeta na'ac na'le quiyi Egipto, ca' ñi qara'gaxala' qota'olec caqami' naqata'a na'le qami'. Vichiguiño' nagui sa'ue da ỹaqataxac caqami'.

₁₆Qam no'm ca ra'aqui' 'naac quiyim ñaq ỹo'ueteto'ot qami' chaqai caua qachaalaxahi', ma' 'maxachitetegue ca'maxare, ₁₇ca' coñita ma'le ca lauac lo'o, ca' viquita ca lasom, ca' pataqaichiguit ca lasom aca lque'la, ca' tocqoirec, vite ca lauac. Ca' queda ma'le, ca' chaqa'ma' chaqai 'neetari' se reda ra'aqui'. Ca no'm 'aalo, qam qaiyiita chaqaida 'ñitetegue. ₁₈'Neeto' 'ec se ỹa'maxañi nqai'ñi' quiyim 'xañirec ca ra'aqui'. Ma' ỹoviraxaterauec caua seis ñaxari ro'ueenataxantacot qami', qam nauequetac ca lavinñi cá'maq ỹaatqajam laseuete quet cá'maq lo'ueenataxanaxac. Chaqai da liỹa quiyim ñi qara'gaxala' qota'olec caqami' nqouaguegue qami' quecá'ogue cá'maq ro'ueenachiqui'.