Deuteronomio 17

₁₄Ca no'ma' ỹovita quiyim noxoñiu'a cá'maq 'laua ỹaanema qamiri ñi qara'gaxala' qota'olec caqamiri, ma' ỹaatqajam qadoxoñiguii, ca' ñiỹalec ca'maxare, ca no'm 'ñiỹac: Sahoqotaque quiyim 'ue ca qarashi, qaiyi qara'gaxala', qaiyi shinqatari' ná'ogue na liỹa qomyipi sqoỹoqaque quena senqa'ñi, ₁₅ca' ñiuo quiyim rashii cá'maq chi qauori le'ec, qam quecá'maq lca'acsec ñi qara'gaxala' qota'olec. Sqai coñiu'a ca ỹoqa'a ca chicqa'gue, cá'maq se qauori le'ec. ₁₆Qam cajo nashi se rishiujnaxanaque ca 'xoic shipiguiripi, chaqai se ila' ca qomyipi queda Egipto, ỹahotaque nqo'naxatec ca laloipi shipiguiripi. Ma' ñi qara'gaxala' 'neetasa' da la'qaatec caqamiri: Tot qaica ma' liỹa quet rapilliỹa'gue najo nayic. ₁₇Chaqai mesqai 'xoic aca louaaripi, qaiyi se rashiiuec ca la'deenataxanaxac quiñi qara'gaxala', chaqai mesqai 'xoic ca rishiujnaxanaque quena 'oro chaqai na lecat plata.

₁₈Ca ma' ca nashi icoñiguit ca loma' quiyim na'gaxala', ca relaataxan quiyim qanaqajshiguim qoỹeretañi dajo napaxaguinaxac qaỹachigoxochichigui dá'maq qoỹeretañi caso lere hueeto'ot na netaxaỹaxanqajanqaipi quena' qaretaxaỹa'pegue' ñi qota'olec quena llaalqaipi so Leví. ₁₉Ca' se neme hueeto'ot aca nerecse, chaqai quiyim retaqateguelec naua'que naua na'xata' quiyim ñaq nca'leetauec, qaiyi ỹa'den quiyim no'cha'a ñi qara'gaxala' ñí'maq qota'a, chaqai se napacalec ná'ogue ná'maq napaxaguinataxanaxac hueetalec ana'maxare, chaqai napaxaguina quiyim ỹo'uet najo nelaataxanaxac; ₂₀qaiyi sqai 'neetapigui lauel quiyim ỹapacauec quena lauo' laseripi, qaiyi sqai ỹoxouec ca la'deenataxanaxac quena nelaataxanaxac, qaiyi na'maxare chaqai na llaalqaipi se neme quiyim nashillipi quena Israel.