Daniel 6

₁Ca' so nashi Darío ỹa'ue so ciento veinte lotauaripi quená'maq 'lauari reloqota'a nqai'en quiyí'maq loiquenatec so'maxare. ₂Ca' roỹaxanalo so Daniel chaqai saua dos liỹa' quiyim ỹa'ajandac da lo'ueenataxanaxac so liỹaripi, qaiyi qaica canchaqaica ỹo'maauec no'ueenataxanaxac queso nashi. ₃Ca' so Daniel chaqa'ma' re'oq quiyim paguec ỹa'den da lo'ueenataxanaxac quesaua liỹa' neloxoỹa', ca vichiguiño' so nashi ỹahotaque quiyim pataxalec nashi quiyá'ogue yi 'laua. ₄Ca' so lotauaripi so nashi idaantaque ca la'maqa' quiyim 'ue ca qaipataxalec ỹasauaxat queda lo'ueenataxanaxac quiñi lauo' so nashi, qam so Daniel ỹaatqajam 'maxataxaraic, ca' sqaica ca ỹasauaxat, ca' qaica quet cá'maq qaỹa'xat quet queso'maxare. ₅Qam ñaqai qoyiquetalec qaidaantaque ca la'maqa' quiyim qanaqajñi, ca 'neraco':

—Caalata'm qaica ca qoyigo quiyim 'ue ca shinqac quiñi Daniel, no'm sqai quiichigui nqaishinaq dá'maq huelec.

₆Ca' chaqaida 'neeto' so lotauaripi so nashi quiyim eec retaxaỹa'pegue' so nashi Darío. Ca co'na' reloqosa'guit, ca 'neraco':

—¡Qaica lqodoc da nachaalataxaqui', qami' qarashi! ₇Ca qomá'ogue qomi' seloxoiqata'a na 'laua sotauanqai'sac qami' qarashi llapoxota', ca setaxaỹaxata', ña'deenaxata' quiyim qaỹa'yiñi da qana'deenaxac caqami' qarashi, quiyim 'ñirac quiyim quesaua treinta na'xata' qaica ca qoỹaanot ca nashiilaxanaxac quena nashiilec nqolac loqo'm ca chaqai qom, qaqamite' qami' qarashi qaỹa'dooto naua ne'cootal. Ca no'm cá'maq se na'xaỹaxan, ca' qainaxa'ña so sauaxaic leta'allipi cañi tema hueeta'ñigui. ₈Ca vichiguiño' nagui, ca 'taxachiriñi qami' qarashi da qana'deenaxac chaqai 'chiriñi ca qadeenaxachi', qaiyi qaica ca nadalaxashiguim ma' chaqaida dá'maq naqataxac quena medoipi chaqai Persia laseripi qaica ca ishit ỹapalaxat.

₉Ca' quedajo, ca' ỹiriñi so leenaxat so nashi Darío, ca i'taxajñi so 'deenaxac. ₁₀Ca co'na' ỹa'den so Daniel quiyim qai'taxajñi so 'deenaxac queso nashi, ca' queuo quiyi la'a', ca' ỹauachigui añi nqote ñi lelaxasoxoqui, añí'maq pa'aata'gue yi Jerusalén, ca' ỹa'chi'iñi naua le'cootal, ca' nqouagaxainot chaqai imaqachin ñi qota'olec. Ca' chaqaida 'neeta'gue ỹovi' tres nqai'en quiyi na'xa'a. ₁₁Ca' saua ỹale' niỹaresaho inoxondo quiñi lauo' so Daniel, ca' iuandalec nqouagaxaintac chaqai imaqachintac ñi qota'olec. ₁₂Ca chaqa'ma' querepegue' so nashi, ca 'nerapega queso 'deenaxac, 'neraco':

—Qami' qarashi, shi'gue 'ỹaañirec saachichiguit so qana'deenaxac, ca so'maxare 'neetasa': Cá'maq nqouagaxainot ca nashiilec nqolac loqo'm ca chaqai qom quiyim mesqaiqami', qami' qarashi, ca' qainaxa'ña so sauaxaic leta'allipi cañi tema. ¿'Nesam chaqaida?

—Ajá'a chaqaida —'naaco' so nashi—. Ca' dajo 'deenaxac ipaquichigui nqohin ma' chaqaida 'neeta quena medoipi chaqai na Persia laseripi, ca' se ishit qaỹosogui.

₁₃Co'na'le, ca 'neraco':

—Ñi Daniel ñí'maq judío le'ec ỹoqa'a da 'laua qaỹachigoxota'gue, ñi'maxare qaica ca ỹauaaque qami', qami' qarashi, chaqai só'maq qana'deenaxac shi'gue 'deenaxanaxañitegue na qom, ma' qomi' seuanqalec quiyim tres nqouagaxain quiyi na'xa'a.

₁₄Ca co'na' so nashi 'xaỹa dajo, ca chaqa'ma' rachicotam, ca chaqa'ma' idaantaque ca la'maqa' quiyim nca'laxatec so Daniel. Chi ỹovireta'a na' inoxonñi aso ra'aasa, ỹahotaque quiyim nca'laxatec. ₁₅Qam so ỹalliripi quepegue', ca' liỹa ỹovira'a so nashi, ca 'naapega:

—Qami' qarashi ỹaatqajam 'yiiñite' quiyim da naqataxac ỹa'yiñi na medoipi chaqai na Persia laseripi 'neetasa': Qaica cá'maq qaỹollac loqo'm cá'maq mashic qaỹa'yiñi 'deenaxac queca nashi, qaica ishit ỹapalaxat loqo'm ỹosogui.

₁₆Co'na'le, ca' so nashi relaataxane'oga so Daniel quiyim qanauego, ca qainaxa'ñigui aso tema hueeta'ñigui so sauaxaic leta'allipi. Qam na' saqa' qaỹomachigui da na'qaatec, ca' so nashi 'naaco' queso Daniel:

—¡Ca qota'olec caqami' cá'maq 'ỹaañisacot da no'ueenataxaqui', rca'laxachirec!

₁₇Ca co'na' so Daniel hueeta'ñigui aso tema, ca' qanodouec so qa', ca' qaillaalec so lap aso tema, ca' so nashi pataxañi aso letanaxanqate chaqai ana letanaxanqate so lotauaripi queda lo'ueenataxanaxac, qaiyi quedá'maq qohine'tegue queso Daniel ipaquichigui nqohin dá'maq qaỹa'yiñi 'deenaxac.

₁₈Ca na' ime, ca' so nashi quepegue' yi la'a', ca' nenanñi, se que'e chaqai le'ne' nqai'ne' naua chaqai leuallaxaviaxaco, chaqai qaica ca lelaxac quesá'ogue so pe. ₁₉Ca ỹaatqajam chi richilecna, ca ne'laxashiguim, ca' quepegue' añi tema hueeta'ñigui so sauaxaic leta'allipi. ₂₀Ca co'na' so nashi ipalataxaso'ma añi tema, ca 'ue da lachicoxo, roỹaxantaxaso'ma so Daniel, 'naaco':

—Daniel, qami' lelaatec ñi nca'leetauec qota'olec, ¿ishit ñi'maxare nca'laxatec qami' quena sauaxaic leta'allipi, ma' qami' 'ỹaañisacot da no'ueenataxaqui' ñi'maxare?

₂₁Ca' so Daniel 'naaco' queso nashi:

—¡Qami' ỹashi, qaica ca lqodoc da nachaalataxaqui'! ₂₂Ñí'maq qota'olec caỹim nela' so lelaatec caỹim, ca' ỹapoguilo naua laapi' na sauaxaic leta'allipi, qaiyi qaica ca 'ne'tegue aỹim, ma' ñi qota'olec ỹa'den quiyim qaica ca sasauaxat quiñi'maxare chaqai caqami', qami' ỹashi.

₂₃Ca co'na'le, ca so nashi 'ue da netoonaxac, ca' relaataxan so nashi quiyim qanavicshiguim so Daniel cañi tema. Ca na' qanaqajshiguim, ca' qaica ca qaiuana natoc, ma' ỹaatqajam huelec ñí'maq qota'olec. ₂₄Ca na' ime, ca' so nashi relaataxan quiyim qoyigue'ogalo sauá'maq ỹale' sauá'maq 'em 'ue da qohine'tegue so Daniel, liỹaresaho nqohine' saua loua' chaqai saua llaalqa. Ca qainaxari'ñigui aso tema hueeta'ñigui so sauaxaic leta'allipi; ca na' saqa' ỹovichiñi saua'maxare cañi tema, ca chaqa'ma' qaỹopoxoỹaxatañi queso sauaxaic leta'allipi.

₂₅Ca co'na'le, ca' so nashi Darío ỹa'ue so lerec, taỹaugui nqai'en sá'ogue so ỹoreta'oguit qomyipi neetalec yi 'laua, 'naacsa': Sahotaque quiyim qaicanqaida chaqai 'ue nqaiyi caqamiri, ₂₆chaqai sa'ue da ỹaqataxac chaqai selaataxan quiyim ná'ogue na qomyipi quená'maq 'laua soiquentac quiyim se iualaxainari' ñí'maq qota'olec quiñi Daniel.

₂₈Ca' so Daniel ñaqai queetalec quiyim ro'ueenataxantac rotaanaxantac queda lo'ueenataxanaxac so nashi Darío chaqai qai'neeta queda lo'ueenataxanaxac so Ciro, so'maxare nashi Persia le'ec.