Qoỹerelec so 'imec lahi
1Ca' so Belsasar, nashi quiyi Babilonia, ỹo'uet so nqui'ỹaxac lodegaxat, ca' talaxanlec, ỹal so mil lotauaripi queda lo'ueenataxanaxac quiyi 'laua. Ca na' ñaqai que'eetac, ca' so nashi chaqai so lalecseripi chaqa'ma' 'xoic so lataxa ni'chirigui. 2-3Ca na' sham quiñiuguet queso lataxa, ca' so nashi Belsasar relaataxan quiyim qanodooro saua ỹoreta'oguit 'taxaquiripi 'oro chaqai na plata, só'maq so leta'a Nabucodonosor rocacho' na'le quiñi no'ueenaxanaxaqui quiyi Jerusalén. Ca' so ỹoreta'oguit 'taxaquiripi qaỹodouo, ca' qaiỹoxoguilo queso lataxa, ca' so nashi chaqai so louaaripi chaqai so leloxoỹaxanataipi, chaqai sá'ogue so liỹa qomyipi nqa'xantañi que'eetac, ni'chigui so 'taxaquiripi. 4Ca sá'ogue só'maq nqa'xantañi ne'teetac queso lataxa, ca imaqachintac so lashiilec nqolaquipi qaỹachigoxotaugui na 'oro, plata, bronce, fierro, qo'paq chaqai na qa'.
5Ca' queco'na'le, ca qaiuane'ta aso qom napoquena re'qoota caso ncoỹeraxanaxaqui, deraxantac quena lahi so 'imec lauo' so nashi. Ca na' so nashi iuane'ta quiyim deraxantac, 6ca no'chi, nalacqatec. Ca na' paguec so lqolonaxa, ca sá'ogue i'loxol. 7Ime, ca' ỹaualaq chaqai roỹaxanaque ná'maq richaauec nqai'en nanchaqaina, ná'maq 'deenaxanqachaqaic, chaqai ná'maq napaxaguintapega na piguim le'ec quiyi Babilonia. Ca 'naaco':
—Cá'maq retaqalec yí'maq naneretañi quenajo chaqai ichoxochim ca leloxoỹaxac, ca' qoỹañiguilo caua noho togue' nashi loho chaqai qaỹa'ue aca lqola 'oro, chaqai pa'aata'guit aỹim queda ỹo'ueenataxanaxac quiyim soiquentac na 'laua.
8Ca sá'ogue so 'deenaxanqachaqaiquipi ro'ueenataxantacot so nashi inoxonougui ñi 'imec, qam qaica ca ỹa'den ca leloxoỹaxac so naneretañi quiyim ichoxotem so nashi. 9Co'na'le, ca' paguec so lqolonaxa so nashi Belsasar, ca' ỹaatqajam nalacqatec na lashic. Ca' so lotauaripi se ỹa'deene' cá'maq 'neete'. 10Qam aso late'e so nashi ỹoviro, ma' 'qaataque da laualaxac so llaalec nashi chaqai só'maq lotauaripi lalecseripi, ca inoxonougui ñi 'imec nqui'ỹaxaqui. Ca 'naaco':
—¡Qaica lqodoc da nachaalataxaqui' qami' qarashi! Qaica huapigui qavilli', chaqai se nalacqatec qami'. 11Ma' queda ro'ueenataxanaxaqui' quiyim qami' qarashi 'ue so ỹale qaỹashaxantac queso ne'espíritu ñí'maq co'teeta qota'olec. Ma' cana' so qataa'i' qarashi, ca' sojo ỹale re'oq quiyim ỹaatqajam 'ue ỹa'den, 'ue da lco'ỹaxaric chaqai 'ec chicqashiguim da la'deenec. Vichiguiño' so qarashi Nabucodonosor só'maq qataa'i' ỹano na'le quiyim lashi ná'ogue na pi'xonyipi, na richaauec nqai'en nanchaqaina, na 'deenaxanqachaqaiquipi chaqai na napaxaguintapega na piguim le'ec quenajo 'laua. 12Ma' queso Daniel, só'maq so Nabucodonosor ỹanegue na'le leenaxat Beltsasar, 'ue so ne'espíritu chalego lecaic queda nco'ỹaxaric chaqai da na'deenec quiyim chaqa'ma' ỹa'den ca leloxoỹaxac ca ne'guemataxac, chaqai quiyim ichoxot ca leloxoỹaxac ca se qaiuanapega na'qaatec, chaqai quiyim ỹa'maxajñi ca 'xoic lqalaic. Vichiguiño' qami' qarashi, ỹaxañire'oga ca Daniel, ca ca'maxare ra'deenaxanaxañitegue ca leloxoỹaxac yi naneretañi quena 'imec lahi.
So Daniel ichoxot da leloxoỹaxac so nerec queso 'imec lahi
13Ca' so Daniel qaỹauega'a so nashi, ca co'na' ỹoviro, ca qainato' queso nashi:
—¿Qami'o' ná'maq qami' Daniel chicqoiraugui so judioipi loxonqaipi na'le so ita'a nashi Nabucodonosor ỹachigoxota'gue da Judea? 14'Ue da ỹa'xaỹaxac quiyim neetagui qami' ca ne'espíritu ñi qota'olec chaqai ỹaatqajam 'ue da rco'ỹaxariqui' chaqai da ra'yiinqui'. 15Ca só'maq qomyipi paguec 'deenaxanqachaqaiquipi quenajo 'laua hueete'e najo, ỹahotaque quiyim retaqalec yijo nerqaipi, ca ichoxochim ca leloxoỹaxac. Qam vire'ta se ỹa'den. 16Qam 'ue da ỹa'xaỹaxac caqami' quiyim shichi' choxochi' cá'maq sqa ỹaataxa'uegue chaqai 'xachi' ca leloxoỹaxac cá'maq 'xoic ca lqalaic. Ca no'm shichi' taqairelec yauajo nerqa chaqai choxochirim ca leloxoỹaxac, ca ỹim so'uet quiyim qoỹañiguilo qami' ma'le caua noho togue' nashi loho, chaqai qaỹa'ue aca rqola'e' 'oro, chaqai qami' ỹotaua queda ỹo'ueenataxanaxac quenajo 'laua soiquentac.
17Co'na'le, ca' so Daniel 'naaco':
—Qami' ỹashi chaqai vi'saxauoto naua ramichi', chaqai ỹoqa'a ca 'ỹaañitem quiyim rotaua'e'. Qam ỹim qaiyiita sichoxochiraxarom ca leloxoỹaxague' yaua nerqa quena 'imec lahi.
18Ñí'maq paguec lecaic qota'olec ỹaanem da lo'ueenataxanaxac, chaqai da lecaic, da lauaq chaqai da lemaqachic so Nabucodonosor só'maq qataa'i', qami' qarashi. 19Ca quesó'maq lquesaxanaxa, ca' ỹaanem ná'ogue na ỹoreta'oguit qomyipi ỹora'alo naua la'qaatqa se qanapacalec chaqai i'loxol quen na qom quena' idaana'a. Ca' so'maxare ỹalauat loqo'm nca'alaxateetauec canchaqai sham 'neeta'gue; 'ue na imaqachin chaqai na liỹa, ca' se imaqachin. 20Qam na' ỹaata da nemaqajnaxac, ca' se ra'maqataxan chaqai qa'uaic, ca qarouootaxana'gue da lquesaxanaxa chaqai da lecaic quiyim nashi. 21Ca' qaỹoỹootec quena qom, ca' ñigui 'ec isecỹac nqohin; ca ỹalequetaugui na lolgaqaipi, ỹa'ic na 'uaqapi 'ec na ñii'lola, chaqai ana 'ỹa' pi'guiloxolaxat na loshicmaxa, chi ỹovireta'a na' ỹa'deena'a quiyim ñi qota'olec qaica nqai 'nejem 'ue da lquesaxanaxa napacalec ná'ogue ná'maq nashillipi ỹoiquentac na 'laua, chaqai ñi'maxare ỹana'ñi quiyim nashi cá'maq sham ỹana'ñi.
22Ca' nagui qami' ỹashi Belsasar, qami' llaalec só'maq 'yiiñi' na'le dá'maq qohinta'gue, qai'neeta qami' se niñiiquishiñi'. 23Ta'ta'a quiyim qami' ỹashi chaqai 'ñirari' ñi qara'gaxala' queda piguim na' laataxañira'alo so 'taxaquiripi ỹoreta'oguit da no'ueenataxac lalamaxaret na'le ñi no'ueenaxanaxaqui quiyi Jerusalén, ca' ỹoxoiguilo queso lataxa, ca' ni'chiiguilo queso qatallicshichi'ipi, chaqai maqachiñi'sac so rashiilqui'ipi nqolaquipi chicqaugui na 'oro, plata, bronce, fierro, qo'paq chaqai na qa', najo nashiilqaipi se reuanaxan, sqai 'qaa chaqai qaica ca ỹa'den. Qa'chica qami' sqai maqachiñi' ñi qota'olec ñí'maq no'qootañi da nachaalataxaqui' qami' ỹashi, chaqai hueeto'ot ná'ogue ná'maq 'viichi'.
24Vichiguiño' ñi'maxare nela' so nqai'laxat quiyim ỹichiñi yauajo na'qaatqa, 25MENE, MENE, TEKEL chaqai PARSIN, 26ca' yaua'maxare 'neracsa': MENE: ñi qota'olec naloqojne' naua na'xatachi' qami' chaqai ỹovita nqai'en yi lqodoc; 27TEKEL: qami' ỹashi qaresallaxachi', qam pa'aachitem'; 28PARSIN: da relaataxanaxaqui' quiyim qami' nashi qaiuagaxachigui, ca' qoỹaanougui yi medoipi chaqai yi Persia laseripi.
29Ca' so nashi Belsasar relaataxan quiyim qoỹañiguilo saua togue' noho nashi loho so Daniel chaqai qaỹa'ue aso lqola 'oro, ca' ỹa'ue la'xaỹaxac ná'ogue quiyim chaqaiyi chaqa'ma' lotaua so Daniel queda lo'ueenataxanaxac quiyim nashi.
30Ca' chaqaisoota so pe, ca qaỹalauat so Belsasar só'maq lashi so caldeoipi, 31ca' so Darío le'ec yi Media pa'aauo quiyim nashi. So'maxare ỹovite' sesenta y dos niñaxari na'le.
