Amós 4

₁Na'xaỹaxañiỹa dajo, qamiri 'aallipi 'deenaxanqachaqaipi nesallaxanaipi,

aná'maq paguec loyac quiyi Samaria,

aná'maq pataxañi na 'xoraic chaqai se ỹaqamaxat ná'maq 'ue na louenaxanaxa,

aná'maq ila' na louaaripi quiyim idaanaque ca ne'taxat lataxa.

₂Ñi qara'gaxala' qota'olec nallitalta' queda lco'taxa na' 'naac:

Naate' naua na'xata' quiyim qamiri qaique'eena'alo, ca' qare'xachii,

chaqai naua qachaalaxahi qaique'eena'alo ma'le, qaỹahote'e na noqoinaxanaxat quena nallin.

₃Ca' nac qami' ma'le, 'ec ca canec lahi,

ca qainaxague ada qa' ladocai quiyi Hermón.

Ñi qara'gaxala' i'taxajñi da la'qaatec.

Mohi, 'iigue da Betel chaqai da Gilgal, nqouagaxaiñitac;

ca' ¡'viichii ca rasauaxashichii, nqo'naxachiuec na npa'guenaxaguii!

Viguii na rachitaxanataxanaxachii quiyi nete'eta

chaqai aná'maq naqachiu'a quiyi diez quecaua tres na'xata'.

₅Ca vigaxachii na pan qaca aca lpe'taqate quiyim 'ỹaañiuo queda na'aachicyaxaguii,

chaqai 'xachitac quená'ogue añi viỹaque rachitaxanataxanqachii,

ma' chaqaida dá'maq viitaque qamiri.

Ñi qara'gaxala' i'taxajñi da la'qaatec.

₆Ca 'eno'm ỹim so'uet quiyim ỹoviro'oto qamiri ca nqopaaxa

quenaua'que naua na'aate';

chaqai ỹim so'uet quiyim qaica ca qanoxohi

quenaua'que naua ra'aachiri,

¡qam qamiri se rapilliua'!

Ñi qara'gaxala' i'taxajñi da la'qaatec.

₇Qai'neeta so'uet quiyim qaica ca ỹaxat

na' saqa'lecaua tres shiriguiri quiyim qanaqat na nanecsec.

'Vii naua na'aate' 'ue nqaishin na ỹaxat, qam quena liỹa, ca' qaica nqaishin ca ỹaxat;

'ue na no'ueenaxa ta'ñi na ỹaxat, qam quena liỹa, ca' ỹaso, ma' qaica ca huaxaỹaq;

₈na qomyipi queetagui na na'aateripi, idaantaque na huaxaỹaq,

qam se nalogoñi ná'maq huaxaỹaq lanataxat, ma' se nomat na laquip,

¡qam qamiri se rapilliua'!

Ñi qara'gaxala' i'taxajñi da la'qaatec.

₉Nouaxanaxaset nqaishin na nonot pa'e chaqai ana lase nichigaxanaq,

so'uet quiyim nasogoñi naua lanaxanqate' chaqai naua 'uva lomaate',

ana piñai ỹa'ic naua 'igo lomaate' chaqai naua oliva lomaate',

¡qam qamiri se rapilliua'!

Ñi qara'gaxala' i'taxajñi da la'qaatec.

₁₀Selata na'le so ne'ne' qamiri 'ec cá'maq selata na'le yi Egipto;

so'uet quiyim ileu so ne'naqaipi caqamiri quiyi no'ueenaxa lauatqa',

chaqai so'uet quiyim so npa'guenaxauaripi rouootaxana'gue so laloipi shipiguiripi

chaqai ñcoỹaxanaxaneguelo qamiri na lahita so leuaxaiquipi quiyi nco'matqari,

¡qam qamiri se rapilliua'!

Ñi qara'gaxala' i'taxajñi da la'qaatec.

₁₁Ỹaatqajam chalego da re'xoriguii na' ñopoxoỹaxachiñi qamiri,

'nejem só'maq selata na'le yi Sodoma chaqai yi Gomorra;

ỹaatqajam chaqai 'nejme' qamiri ana poqo quena' chita'gue qanaqajta queca norec,

¡qam qamiri se rapilliua'!

Ñi qara'gaxala' i'taxajñi da la'qaatec.

₁₂Ca' vichiguiño' chaqaida dajo shine'tegue caqami' Israel;

ca ma' ỹim shine'tegue dajo,

ca ¡na'maxachisañi quiyim nachaachira'guit ñi qota'olec caqami'!

₁₃Ñi qara'gaxala' ñí'maq ỹo'uet ana qa' ladocai chaqai na nonot,

ñi'maxare ỹa'deenaxanaxaneguelo naua na'deenaxaco na qom,

ñí'maq ñigui pe nqai'en yi na'xa'a,

ñí'maq quelgoto nauá'maq paguec qoỹoqoshi'meguelo quena 'laua,

ñi qara'gaxala', ñi'maxare qota'olec sqaica lqalanec,

ca' chaqaida dá'maq dajo leenaxat.