Amós 3

₂Qaqamita qamiri ñca'au'alo quená'ogue na qomyipi quena 'laua.

Vichiguiño' sa'ue da nouaxanaxashichii quená'ogue ná'maq 'viichitac se no'uen.

No'm 'vii caua dos nauequetecta',

ca' caua'maxare na'deene'ejta';

₄no'm ca sauaxaic leta'a ronoqo queca 'oochi, ca re'oq quiyim mashic doxonaxan;

chaqai no'm ronoqo ca llaalec queca lauac, ca re'oq quiyim 'ue ca loxonec;

₅no'm 'ue ca qo'oolec najñi quena 'laua, ca' 'ue aca noqoina;

no'm aca noqoina nenojshiguim quena 'laua, ca re'oq quiyim 'ue ca loxonec;

₆no'm ilamigui aca npe'te queca na'a' lodegaxat, ca' no'chata' na qom;

no'm 'ue ca se no'uen taalec cajo na'a' lodegaxat, ca' chaqaiñi ñi qara'gaxala' taalec nqai'en.

₇Ñi qara'gaxala' se ỹauana quiyim 'ue ca ỹo'uet

quiyim se ỹa'deenaxanaxanegue na lelaatqaipi letaxaỹaxaquiripi.

₈¿Negue' ca se i'loxol quena lqolonaxa quiyim 'xaỹaque ronoqo ca sauaxaic leta'a?

¿Negue' ca se ỹa'xat da la'qaatec ñi qara'gaxala', no'm qailarelec quiñi'maxare?

₉Vii da la'xaỹaxac na nashillipi quena 'imqaipi leta'allipi quiyi na'a' Asdod

chaqai quena 'imqaipi quiyi 'laua Egipto, 'ñiỹac:

Naguipegue' ana qa' ladocaipi quena Samaria;

ñaqai 'ajñii ná'maq se no'uen 'ue quiyi'maxare

chaqai da nqa'viic 'ue quiyi'maxare.

₁₀Ñi qara'gaxala' i'taxajñi da la'qaatec:

Yi'maxare se ỹa'den ỹa'maxate'tegue da lo'ueenataxanaxac;

ỹa'maxatetac quenaua lauooto' ná'maq locataxat queda lqa'viic.

₁₁Vichiguiño', 'neetasa' da la'qaatec ñi qota'olec ñí'maq qara'gaxala':

Na npa'guenaxauahi nahiquinchiguiñi ma'le na na'lauahi,

nopoxoỹaxajñi ma'le na rquepaqataxanaxachii

chaqai icona na hueetaugui naua qauootori.

₁₂'Neetasa' da la'qaatec ñi qara'gaxala':

Dá'maq 'neeta na neloxoỹaq quena' louootaxanqate' caua dos lapiaate' ca lalo qagreta loqo'm ca lo'lo aca lque'la,

quena' sham qaiqo'oc queca sauaxaic leta'a,

ca' chaqaida 'neeta quiyim nañit ma'le na llaalqaipi so Israel neeta'ñi na Samaria,

ná'maq saqatalec ná'maq no'uen qa'xanaxala' ỹachigoxota'gue da Damasco.