3 Juan 1

₁Ỹim, mashic aỹim ñauapec na'gaxala', selata qami' ana ỹerecse, ma' qami' ñauochaxaua Gayo, ma' ỹaatqajam llic qami' ỹoqo'itaxat.

₂Qami' ñauochaxaua ỹaqaỹa, queda ñqouagaxainaxac sahotaque quiyim 'maxaraic ná'ogue ná'maq 'viichisac, chaqai quiyim qaicanqaida queda nachaalataxaqui', quiyim 'nejem dá'maq 'maxaraic no'ueenataxaqui'. ₃Ma' 'xoic da ñitoonaxac na' 'vii saua qarqaỹa' novite', na' ỹa'xatesapiguim dá'maq raqamaxa'e', ma' ỹaatqajam qui'salec da na'qaatec lliqueta. ₄Qaica quet cá'maq paguec ỹo'uet ca ñitoonaxac, ta'ta'a quiyim sa'den quiyim na ỹaalqaipi queetalec dá'maq ỹaatqajam lliqueta.

₅Qami' ñauochaxaua ỹaqaỹa, ỹaatqajam 'maxaraic dá'maq 'ñiisari' quiyim quelollita na qarqaỹaripi, qam paguec la'maxa quená'maq ỹoqa'a ca chicqa'gue. ₆Ma' na'maxare ra'qaataxantapeguem ná'ogue ná'maq mashic icoñiguit da na'qaatec quená'maq senta'ñi, ỹa'xatetac da re'xorenataxanaxa'e' quena'maxare. Ca' qouaquiric tauañi' quecá'maq ỹouentaque, qaiyi liỹa quelec dá'maq llicyaxac. Qam quedá'maq 'ñiitetegue, ca' ỹa'maxarenta ñi qota'a. ₇Ma' na'maxare queetalec da llicyaxac ro'ueenataxantacot so Jesucristo, ca' sqaca aca icoñiguit caná'maq lotaanaxanqate ná'maq se iuanapega ñi qota'a. ₈Vichiguiño' qomi' ñomatqalta' quiyim sotauanaq na'maxare, quiyim sotauanaq queda la'qaataxanaxac quiyim ỹa'xate' da na'qaatec ỹaatqajam lliqueta.

₉Ỹim 'ue aso shiriñi ilaata selata yí'maq mashic icoñiguit da na'qaatec. Qam ca Diótrefes se na'xaỹaxana da qarelaataxanaxac, ma' ca'maxare nqo'ta quiyim qaicaata na'gaxala' quiyi'maxare. ₁₀Ca' vichiguiño' no'm shic, ca' ño'lashiguim da'maxare quedá'maq 'neetari' ỹa'xatetac na la'axaic chaqai na'majanteguelgoto qomi'. Qam se ỹa'maxagui lauel quedajo, ma' qai'neeta se icoñiguit ná'maq qarqaỹaripi ỹoviretapego. Chaqai ná'maq ỹahotaque icoñiguit na'maxare, ca se ỹa'maxaren. Ca' se ỹasenem chaqai ỹo'daauec ca'e nqai'en ná'maq mashic icoñiguit da na'qaatec.

₁₁Qami' ñauochaxaua ỹaqaỹa, 'neeto' lotqai quire'uegue da se no'uen 'ueenataxac. Ta'ta'a dá'maq ỹaatqajam no'uen. Cá'maq ỹo'uet ca ỹa'maqachiguiñi, ca'maxare lalamaxaret ñi qota'a, qam cá'maq ỹo'uet ca se no'uen, ca' se iuana ñi qota'a.

₁₂Ná'ogue ỹaatqajam lo'yaxanec da la'qaataxanaxac quena' ỹa'xatetac ca Demetrio, chaqai qai'neeta dá'maq na'qaatec ỹaatqajam llic ỹa'xat dá'maq no'uen no'ueenataxac ca'maxare. Chaqai qomi' qai'neeta sa'xatqatac dajo, chaqai qamiri 'yiiñita quiyim llic dá'maq sa'xatqatac.

₁₃Ỹim 'xoic quet ná'maq sa'xat caqami', qam se sa'maxaren quiyim sahota'ahi caua ỹirqa. ₁₄Ma' ñauaanta'a quiyim qaỹaloq ñiuanaqta', ca' ma'le, ca' ỹaatqajam setaxaiqa'ajta'.

₁₅Ca' sahotaque quiyim 'ue ca reuagaxa'e'. Ná'ogue na qarqaỹaripi neeta'ñi najo ilata qami' da liquinaxanaxac. Qouaquiric 'ỹaañirec ma'le da iquinaxanaxac quiñi 'óna quena qarqaỹaripi.