2 Juan 1

₁Ỹim, mashic aỹim ñauapec na'gaxala', shiriñi anajo ilaata, tai'a nqaishin aca qarqaỹa lca'acse ñi qota'a, chaqai na llaalqaipi ná'maq ỹaatqajam llic se'xoren. Chaqai mesqaỹimeta se'xoren, ma' qai'neeta ná'ogue ná'maq ỹa'den da na'qaatec lliqueta. ₂Ỹaatqajam yqo'talo qamiri, ma' 'ue da na'qaatec ỹaatqajam lliqueta hueetaguilo naua qare'taxanata, chaqai chaqai 'neetari' se neme hueetauguilo qomi'. ₃Ñi qota'olec chaqai so qara'gaxala' Jesucristo, llaalec ñi qota'a, ỹaanema ma'le qamiri da lqouagaxa chaqai le'xorenataxanaxa chaqai da neuagaxa. Ca coñiguit ma'le qamiri quiyim ỹaatqajam 'yiiñii da na'qaatec ỹaatqajam lliqueta chaqai quiyim ne'xoriñiỹata'.

₄Ỹaatqajam 'ue na'le da ñitoonaxac na' 'vii caua seuanejlgoto quenaua qachaalaxai', ma' ỹaatqajam queesalec dá'maq na'qaatec lliqueta, ma' chaqaida dá'maq ilarelgoto qomi' ñi qota'olec. ₅Ca' qami' ỹaqaỹa, nagui ñi'xoresene'tot qami' quiyim ñi'xorenaqta'. Dá'maq shiriñi nagui caqami' mesqai dalaxaic nelaataxanaxac, ma' qaidaata dá'maq qohinapegalo qomi' na' ñaqai chita'gue seconaxaguit da na'qaatec. ₆Dajo ne'xorenataxanaxa chicqochigui quiyim ña'xaỹaxanqa'talo naua lelaataxanaxaco ñi qota'a. Chaqai da lelaataxanaxac chaqaida dá'maq shi'gue 'xahichigui na'le, quiyim 'xorenataxañii.

₇Ma' 'xoic na 'maatqaiquipi ỹouoxontac na 'laua quená'maq sqai huelec quiyim so Jesucristo ỹaatqajam qom na' novi'. Ca cá'maq 'neetari' dajo, ca' chaqaica cá'maq 'maatqaic chaqai npa'guenaxaua so Cristo. ₈Ca' rovichiỹari'o' quedá'maq 'ñiitari', 'neeto' na'laañi ná'maq ro'ueenachiguii. Ta'ta'a quiyim coñiguit cá'ogue ca lashivichaxac.

₉Canchaqaica quiyim paguec 'auapeguec quiyim se nollaalta' queda lapaxaguinataxanaxac so Cristo, ca' sqai hueeto'ot ñi qota'a. Qam cá'maq nollaalta' lo'qoochiguiñi da lapaxaguinataxanaxac so Cristo, ca hueeto'ot ñi qota'olec, chaqai qai'neeta hueeto'ot so llaalec. ₁₀No'm 'ue ca ỹovitalo qamiri, qam no'm se ỹodootauo dajo napaxaguinataxanaxac, ca' sqai coñiguit queca ra'aari chaqai se niquiñi'e'. ₁₁Ma' cá'maq niquine'e', ca' ỹalecau'a cá'maq se no'uen ỹo'ueetetac.

₁₂'Xoic quet ná'maq ỹa'qaatec caqamiri. Qam se sa'maxaren quiyim sahote'e aca lere ỹerecse, ca' selatalo qamiri. Ma' sahotaque sovira'alo qamiri, qaiyi ỹaatqajam setaxaiqa'ajta', qaiyi ỹaatqajam ỹovirichiguiñi ca qanetoonaxac.

₁₃Na llaalqaipi añi rqaỹa'e', ñí'maq qai'neeta lca'acse ñi qota'a, ilajta qami' da liquinaxanaxague'. Ajá'a, ca' chaqaida 'neeta dajo.