Yi Judá qanca'laxateguesop so Senaquerib
1Ca co'na' 'ue da la'xaỹaxac so nashi Ezequías, ca' nasectaqta'ahi saua loho queda nqui'ic, ca ỹañiñi saua nachicoxoqui' noho. Ca' quepegue' ñi qouagaxainaxaqui quiñi qara'gaxala'. 2Ca' ila' so Eliaquim só'maq neloxoỹaq quiñi 'imec lodegaxat, chaqai so neraxanaq Sebna, chaqai só'maq netaxaỹaxanqajnec paguec qo'xoic, ỹansañi saua noho nachicoxoqui' paguec da nqui'ic, querepegue' so qota'olec letaxaỹaxaqui Isaías só'maq llaalec so Amoz, 3quiyim ỹa'xatem dá'maq 'naac so nashi Ezequías:
—Nagui ỹaatqajam seuqataugui da nachitachic, qanouaxanaxaset chaqai sa'llaaqachiguiñi, shinqatari' aca 'aalo quiyim sham co'o, ca' tot qaica ca lquesaxanaxa. 4Sha'apiguito' ñi qara'gaxala' qota'olec 'xaỹalo daua la'qaatqa so lotaua ñi nashi quiyi Asiria, quiyim queetapegueu'a ñí'maq nca'leetauec qota'olec, chaqai sha'apiguito' quiyim ỹouaxan quedá'maq cajo 'naac quiñi qara'gaxala', ñí'maq qota'olec caqami' peeta'a 'xaỹa. Ca' nagui, ca' nqouagaxaiñitot ñi qota'olec quená'maq no'ueenañi.
5Ca' so lotauaripi so nashi Ezequías eec quepegue' so Isaías. 6Ca' so Isaías ỹa'uo' da laqataxac quiyim 'nerac queso na'coote':
—Ñi qara'gaxala' 'naacsa': Totaxan ro'chitalo naua na'qaatqa se no'viiñi qaỹa'xate' caỹim quesaua lelaatqa ñi nashi quiyi Asiria. 7'Ajñi', ỹim so'uet ma'le quiyim 'ue ca nillimiaxa, ca' ỹo'uet quiyim pil ma'le queda na'laua. Ca ma' ỹovi', ca so'uet quiyim qaỹalauat.
8Ca' so lotaua so nashi chicqa'gue da Asiria, co'na' ỹa'den só'maq nashi quiyi Asiria eec ca'e yi na'a' Laquis, ca' ca'e yi Jerusalén, ca' iuanejlec so nashi quiyi Asiria nalauateta'pegue' yi na'a' Libna. 9Ca' quiyo' na'le, ca' so nashi quiyi Asiria 'uo' da la'xaỹaxac quiyim so nashi Tirhaca na'ñi yi Etiopía inoxonec ỹahotaque quiyim nalauate'e' so'maxare. Ca' so nashi quiyi Asiria, ca' lotqai ỹa'uo' so ila' la'qaatec queso Ezequías, nashi quiyi Judá. 10Ca 'naaco':
—Ñí'maq qota'olec caqami', ñí'maq qami' pi'i'sapega, ca ñi'maxare i'taxajñi da la'qaatec quiyim qaica ma' ỹoxonec quet yi Jerusalén. Qam 'neeto' quire'uegue da nayinaxaqui'. 11Qami' 'yiiñite' dá'maq 'neeta na nashillipi quena Asiria, chaqai quená'ogue ná'maq 'lauaripi quena' ỹahotaque nalauajñi. Ca' ¿rca'llirec qami' ma'le? 12Ca' na nashiilqaipi nqolaquipi ¿ishito' nca'laxatec na'le na liỹa qomyipi quená'maq nalauajñi na'le so 'auaxaic ita'allipi yi Gozán, yi Harán, yi Resef chaqai yi qomyipi na'ño' na'le yi Bet-edén, ca na' qanalauajñi na'ño' yi Telasar? 13¿Negue' cá'maq hueeta'gue ca nashillipi quiyi Hamat, yi Arfad, yi Sefarvaim, yi Hena chaqai yi Iva?
14Ca' so Ezequías icona aso nelaata qoỹaanem quesaua netaxaỹaxanqajanqa, ca retaqalec. Ime, ca' ỹodougui ñi no'ueenaxanaxaqui aso lere, qaiyi ỹa'ajan nqai'en ñi qara'gaxala'. 15Ca' nqouagaxain, 'naacsa':
—Qami' ỹa'gaxala', qami' qota'olec quena Israel, ca nqa'xanqachi' hueeto'oto naua 'vii laua'. Chaqaqamite' 'viiquiñi'sac ná'ogue ná'maq hueetalec na 'laua, qami' ro'ueenachiqui' na piguim chaqai na 'laua. 16Na'xaỹaxañichiriñi, qami' ỹa'gaxala', chaqai na'xaỹaxañi'. Ñaq na'irañi, qami' ỹa'gaxala', 'ajñi'. Chaqai ñaq na'xaỹaxañitalo naua la'qaatqa so Senaquerib nelatalo aỹim. Ca' quenaua'que naua la'qaatqa chi ishiuentac qami', ma' qami' qota'olec rca'lli'sauec. 17Qami' ỹa'gaxala', ỹaatqajam lliqueta quiyim so nashillipi quiyi Asiria nalauajñi so ỹoreta'oguit qomyipi chaqai yi na'laua, 18chaqai quiyim inaxañigui ca norec na lashiilqaipi lqolaquipi, ma' llic quiyim se qota'olqaipi. Ta'ta'a quiyim chi qo'paq, loqo'm qa', chi lo'ueenatec na qom. Vichiguiño' qaỹopoxoỹaxachigui. 19Ca' nagui, qami' qara'gaxala', qami' qota'olec, qarca'laxachirec queda lquesaxanaxa na Asiria laseripi, qaiyi ná'ogue na qomyipi quena 'laua ỹa'den quiyim qaqamite' qami' qota'olec quená'ogue.
20Ca' so Isaías ilata da la'qaatec so Ezequías, 'naac:
—Da la'qaatec ñi qara'gaxala' ñí'maq qota'olec quena Israel 'neetasa': Ỹim ña'xaỹaxana da nqouagaxainaxaqui' caỹim queso Senaquerib, só'maq nashi quiyi Asiria.
21Ca' nauajo nauá'maq la'qaatqa ñi qara'gaxala' na' retaqa quiñi nashi quiyi Asiria:
Na na'a' Sión, 'ec aca nequetegaxai,
i'neetac aqami' Senaquerib.
Na Jerusalén chaqai ỹaxaỹaxantac na lqahic quiyim i'naari' qami'
ma' ỹovita quiyim qoshi'rec.
22¿Nega'ỹo' cá'maq 'ooqochichi' chaqai qui'sapegueu'a?
¿Negue' cá'maq relaqaisapega sqa la'ira'que naua ra'qaataxahi'
chaqai ra'i'so'ot napacqajñisac?
¡Qami' qui'sapegueu'a ỹim, ma' ỹim co'teeta qota'olec quena Israel!
23Chigoxochichiriguilo saua relaataxahi' quiyim quiisapegueu'a na na'gaxala'.
'Ñirac:
Cana 'xoic ỹahoglenaipi lauataxaqui,
ca saashi'megue na lo'lo ana qoỹoqoshi'megue qa' ladocai, aná'maq paguec qoỹoqoshi'megue quiyi Líbano.
Ca souaxanlec ana cedro paguec ladocai,
chaqai ana paguec loyac pino.
Sovirashi'megue da pa'aashiguim,
sovirashi'ma yi 'oochi, 'ec nananqa' ana no'uen nanecse.
24Ca quenauá'maq ỹoqa'alo 'lauari,
so'uet aca i'ỹa, ca' ñi'chigui ca le'ec,
chaqai quenaua ipiaate'
rashivigui nqaishin ná'ogue na lachiuguellipi quiyi Egipto.
25Qam ¿sqa 'yiiñi' quiyim aỹim ná'maq na'gaxala',
ma' ỹim ỹo'ueenatec ná'ogue najo?
Ca shi'gue nallaaqo' saqatqajantari' dajo,
ca' nagui, ca' so'uet.
Vichiguiño' qami' nopoxoỹaxachiriñi na na'aateripi napootau'a,
ca lapoỹañi nqai'ñi' na lahillipi.
26Ca ná'maq qomyipi neetalec yi'maxare qaica ca lquesaxanaxa,
ỹaatqajam 'xoic da lqolonaxa chaqai da lpocoxo,
'neetari' ana peue quena no'ueenaxa,
'nejem na 'uaqapi ñaxajlec na 'imec lelaq,
ỹasoxot na nonot lqodoiguesec.
27Ỹim sa'den dá'ogue da rqauaxaqui'
chaqai ná'ogue ná'maq 'viichi'sac;
ỹim sa'den quiyim roqui'raỹa'.
28Chaqai sa'den da ronogoxonaxaqui' chaqai da napacqajnaxaqui',
ca' nagui, ca' sa'ue aca sanagui na rimiqui'
chaqai caua la'gaqa na qadapi',
ca so'uet quiyim pillitetegue dá'maq chicqoisa'gue.
29Ca co'na'le, ca' so Isaías 'naaco' queso Ezequías:
Ca' dajo dá'maq netanec ma'le quecá'maq naata:
najo ñaaxa chaqai na liỹa ñaaxa
'guiitac ma'le na trigo chaqai ñaxajshiguim,
qam queca liỹa ñaaxa, ca' shichii danaxañii chaqai qataxañii,
shichii ñiiñi ana 'uva chaqai 'guii ana la.
30Ná'maq ca'laaxaiquipi quiyi Judá 'ec ma'le ana nanecse:
qoỹorichi'ñiguilo naua lpa'yii chaqai ñaxatec ana la.
31Ma' 'ue ma'le ca no'ueenañi quena Jerusalén;
cañi qa' ladocai Sión 'ue ma'le ca ca'laaxaiquipi.
Qam dajo chicqochigui dá'maq chalego lecaic le'xorenataxanaxa ñi qara'gaxala' qota'olec ñí'maq qaica ca lqalanec.
32Ca dá'maq la'qaatec ñi qara'gaxala' taỹalec ñi nashi quiyi Asiria 'neetasa':
Se qainoxona'a ma'le yi Jerusalén,
se qaỹahina'a queca novic,
se qoyiga'a qaỹahote'e aca nquepaqataxanqate,
chaqai se qaimejlec naua ñiquishiguim quenaua lahil.
33Ca' chaqaica cá'maq nayic naquetou'gue,
ca' chaqaica pilte'uegue ma'le;
ca' se nenoxona'a najo na'a'.
Ỹim na'gaxala' qota'olec saanec da ỹa'qaatec.
34Ỹim so'ootaxanlec ma'le najo na'a'
chaqai ñca'laxatec,
ma' sa'deena'a so ilaatec David,
chaqai ña'deenalta'.
35Ca' chaqaiso so pe, ca' so lelaatec ñi qara'gaxala' piguim le'ec nalauajñi so ciento ochenta y cinco mil qomyipi queso nco'matqa' so Asiria laseripi. Ca na' richiguiñi queso liỹa na'xa'a, ca sá'ogue shi'co' ileu. 36Ca co'na'le, ca' so Senaquerib, nashi quiyi Asiria, ca'e yi nco'matqa', ca' pilegue da Nínive. 37Ca 'uo' so na'xa'a co'na' nqouagaxaintac cañi qouagaxainaxaqui neetaugui so Nisroc só'maq lashiilec, ca' saua llaalqa Adramelec chaqai so Sarezer que', ca ỹalauate' so'maxare, ca 'eete' taategue da 'laua Ararat. Ime, ca' qoỹano quiyim nashi so llaalec Esarhadón.
