2 Reyes 17

₁Ca co'na' ỹovi' doce ñaxari quiyim nashi so Acaz quiyi 'laua Judá, ca' so Oseas, só'maq llaalec so Ela, qoỹano quiyim nashi quiyi Israel. Ca' ỹovi' nueve ñaxari neeta'ñi yi Samaria. ₂Qam ỹo'ueete' nauá'maq se no'viiñi quiñi qara'gaxala', 'eno'm sqailligueme' sqai 'nejem so liỹa 'auaxaic nashillipi quiyi Israel.

₃Ca' so Salmanasar, só'maq nashi quiyi Asiria, nalauate'e' so Oseas, ca' loxonec, ca ỹo'uet nqai'en añi ishiuetentac. ₄Qam so Salmanasar nauate'e so Oseas quiyim 'ue da ỹoiquentac quiyim shim npa'guene'e' so'maxare, chaqai mashic 'uo' so ilata so nashi leenaxat So, so'maxare nashi quiyi Egipto, chaqai mashic tot ishiueten asó'maq locana quiyi ñaaxa. Ca co'na'le, ca' so Salmanasar talaxanlec so Oseas quiyim qaicoñi', qoỹanaugui añi ncoñiitaxanaxaqui. ₅Ime, ca' so Salmanasar queugui sá'ogue so neetalec yi 'laua quiyim nalauate'e', chi ỹovireta'a yi na'a' lodegaxat Samaria, ca' queetalec da nalauataxac quesaua tres ñaxari. ₆Ca na' ỹovite' saua nueve ñaxari quiyim nashi so Oseas, ca' so nashi quiyi Asiria loxonec yi Samaria. Ca' loxonqaipi so llaalqaipi so Israel, ca' i'xategue da Asiria. Ca ỹanalec yi 'laua leenaxat Halah, chaqai yi 'laua Gozán huaqate'e' aso lachiugue Habor, chaqai yi na'aateripi quiyi Media.

₇Ca' so llaalqaipi so Israel ỹovirau'o' dajo, ma' 'uo' da lasauaxaset quiñi la'gaxala' qota'olec, ñí'maq naqatec na'le quiyi Egipto, ca' nca'laxatec queso Faraón só'maq nashi quiyi Egipto, ma' sauaxat quiyim so qomyipi nqouagaxainot na nqolac. ₈Ca' que'uegue da no'ueenataxac na ỹoreta'oguit qomyipi quená'maq ỹo'daauec na'le ñi qara'gaxala' quiyí'maq hueeta'ñi ñi'maxare, chaqai dá'maq se no'uen 'ueenataxac ỹa'yiñi na'le so nashillipi quiyi Israel.

₉Chaqai qai'neeta so llaalqaipi so Israel na'xaterec naua na'qaatqa quenauá'maq se ỹa'maxarene' ñi la'gaxala' ñí'maq qota'olec, chaqai no'xonshiguim naua qouagaxainqate' quiyim qanqouagaxainot na nqolaquipi quená'ogue na na'aateripi, vire'talo naua na'aaterolqai' 'ue ana na'ajnaxanaxalate, chaqai na na'aateripi 'ue na lquepaqataxanaxat. ₁₀Chaqai qai'neeta no'xonshiguim na qaripi qouagaxainqa' chaqai na lqui'illipi aso Asera, qoỹanalec na qoỹoqoshi'megue 'laua chaqai qoỹano'ot ana qo'paq 'oochaxarai. ₁₁Ca' ỹaatqajam quiichi'ñiguilo naua no'ueenataxaco na ỹoreta'oguit qomyipi quená'maq mashic ỹo'daauec ñi qara'gaxala', ma' ỹavigaxat na lichiinaxanaxat chaqai ỹaatqajam se no'uen na ỹo'ueetetac, ca' ỹaatqajam ro'o nqai'en ñi qara'gaxala'. ₁₂Chaqai qai'neeta nqouagaxainot na nqolaquipi ná'maq se ỹasen na'le ñi qara'gaxala'.

₁₃Ma' ñi qara'gaxala' shi'gue ichoxot, ỹachigoxochichigui na'le so letaxaỹaxaquiripi chaqai so 'vii naua leuanaxanaxaco, quiyim na llaalqaipi so Israel ỹaxañiñi naua se no'viiñi no'ueenataxaco, ca' quelgoto naua laqataxaco, lapaxaguinataxanaxaco ỹaanema saua 'auaxaqa qareta'al, chicqochigui nqai'en so lelaatqaipi letaxaỹaxaquiripi. ₁₄Qam so qomyipi se na'xaỹaxan. Ta'ta'a quiyim ỹaatqajam napacqajan, 'nejem so 'auaxaic leta'allipi só'maq sqai huelec ñi la'gaxala' ñí'maq qota'olec. ₁₅Se icoñiguita saua naqataxaco chaqai dá'maq 'deenaxac qaỹa'yiñi na'le, chaqai nauá'maq lelaataxanaxaco ỹaanema na'le. Chaqai qai'neeta qui'ñigui ná'maq qohinac qota'olqaipi qaica ca 'negue, naỹa'a ná'maq qomyipi sqoỹoqaque na na'ñi, quená'maq se ỹa'maxaren ñi qara'gaxala'. ₁₆Ỹaxanñi ná'ogue na lelaataxanaxaquipi ñi la'gaxala' qota'olec. Ca' icaxajñi na bronce, ca' ỹo'ueete' saua dos huaqui llaalqa ỹauaapigui lashiilqa chaqai so lqui'i aso Asera. Chaqai qai'neeta nqouagaxaintacot ná'ogue na 'ue na lauaq neeto'ot na piguim chaqai so nashiilec Baal. ₁₇Chaqai ỹaano quiyim qaỹavigaxat na llaalec chaqai ana llaale, chaqai napaxaguina quiyim richaauec nqai'en nanchaqaina chaqai cá'maq ñaqa naataho, chaqai ỹaatqajam qaỹo'uet ná'ogue na se no'uen quiñi qara'gaxala', ca' ỹaatqajam ro'o nqohin ñi'maxare.

₁₈Ca' vichiguiño' ñi qara'gaxala' ỹaatqajam ro'ỹa so neetalec yi 'laua Israel, ca' ỹaatqajam ỹo'daauec. Ca' qainaata na neetalec yi 'laua Judá no'ueenaxatañi.

₂₄Ca' so nashi quiyi Asiria naqata'a so qomyipi quiyi Babilonia, Cuta, Ava, Hamat chaqai Sefarvaim, ca' ỹanalec na na'aateripi quiyi Samaria, yí'maq la'a' na llaalqaipi so Israel. Ca' chaqaida 'neeta, ca' naalec yi Samaria, ca' naugui na na'aateripi. ₂₅Qam ma' so qomyipi se nqouagaxainot ñi qara'gaxala', ca co'na' naalec yi 'laua, ca' ñi qara'gaxala' nela' so sauaxaic leta'allipi, ca 'uo' na ỹalauat na'le so iseripi. ₂₆Ca co'na'le, ca' so qomyipi quepegue' so nashi quiyi Asiria, ca 'naaco':

—So qomyipi lachita na na'aateripi quiyi Samaria quiyim naalec, na'maxare se ỹa'den cá'maq 'ne'tegue quiyim qoyiuelec cá'maq nashiilec quiyijo 'laua. Ca' chaqaida ma' se ỹa'den, ca' ca'maxare ila' na sauaxaic leta'allipi, ca' mashic 'xoic na ỹalauat.

₂₇Ca co'na'le, ca' so nashi quiyi Asiria 'naac quiyim qaỹa'ue ca qaila' quena netaxaỹaxanqajanqaipi noxonqaipi, qaiyi iuorquen, ca' ỹapaxaguinegue cá'maq 'ne'tegue quiyim qanqouagaxainot ca nashiilec quiyijo 'laua.

₂₈Ca 'uo' so netaxaỹaxanqajnec chicqochi'ño' na'le yi Samaria ỹalequetaho, eec, ca na'ño' yi Betel. Ca' ỹapaxaguinegue cá'maq 'ne'tegue quiyim qanqouagaxainot ñi qara'gaxala' qota'olec. ₂₉Qam quiñi 'óna queso ỹoreta'oguit qomyipi ỹo'uet ná'maq chi lashiilec quená'maq na'a' neeta'ñi, ca ỹanauguilo naua nqouagaxainaxaqui' naalgoto naua qoỹoqoshi'mque 'lauari, quená'maq no'xonshiguimo' na'le so Samaria laseripi. ₃₀Ca' so Babilonia laseripi ỹo'ueeto' so ladenqatec lqui'i so lashiilec Sucot-benot, chaqai so chicqa'ñi yi Cuta ỹo'uet so ladenqatec lqui'i so lashiilec Nergal, chaqai so chicqa'ñi yi Hamat, ca ỹo'uet so ladenqatec lqui'i so lashiilec Asima. ₃₁Ca' so qomyipi chicqa'gue da Ava ỹo'uet so ladenqatec lqui'i so lashiilec Nibhaz chaqai so Tartac, chaqai ná'maq chicqa'gue da Sefarvaim ỹavigaxato' quen na llaalqaipi quiyim ỹaano lachitaxanataxanaxat queso nashiilec Adramelec chaqai so Anamelec. ₃₂Chaqai qai'neeta nqouagaxaintacot ñi qara'gaxala'. Qam chi ỹo'uet so letaxaỹaxanqajanqaipi quiyim ỹoiquentac na nachitaxanataxanqateripi quiyim qanqouagaxainot na lashiilec nqolaquipi. ₃₃Ca 'eno'm nqouagaxaintacot ñi qara'gaxala', qam qaiyiita huelec na nqolaquipi. Ca quiñi 'óna chaqai ỹaatqata da no'ueenataxac quecá'maq 'laua chicqochi'ñi.